پرۆژێ چاندنا ٥٠٠٠ دارا ل کەمپا زانکۆیا دهۆک دەستپێکر
Dec. 24, 2022, 2:29 p.m.

راگەهاندنا زانکۆیا دهۆک؛ ٢٤ـی کانوونا ئێکێ ٢٠٢٢

دەزگەهێ روانگە د چارچۆڤێ پرۆژێ "دارستانێن روانگە" دا و د دەستپێشخەریەکێ دا، ل کەمپا زانکۆیا دهۆک دەست ب چاندنا ٥٠٠٠ داران کر، ل دۆر ڤێ چەندێ ژی سەرۆکێ زانکۆیێ دیارکر"دەرگەهێ زانکۆیا دهۆک یێ ڤەکریە بۆ هەر رێکخراوەکێ بۆ ئەنجامدانا پرۆژەیان ب مەرەما پاقژکرنا ژینگەهی".

د رۆرەسمێن دەستپێکرنا پرۆژێ "دارستانێن روانگە" دا، ڤە عەبدولسەلام مەدەنی، رێڤەبەرێ گشتیێ دەزگەهێ روانگە د پەیڤا خۆ ب ئامار باس ل مەترسیێن ل سەر ژینگەهێ ل سەر ئاستێ جیهانێ ب گشتی و دەڤەرێ و کوردستانێ ب تایبەتی کر، هەروەسا پێزانینێن گشتی ل دۆر پرۆژێ (دارستانێن روانگە) و گرنگیا ڤان جۆرە پرۆژا بۆ رویبرویبوونا مەترسیێن ل سەر ژینگەهێ پێشکێشکرن.

ژ لایێ خۆ ڤە سەرۆکێ زانکۆیا دهۆک د. داود سلێمان ئەتروشێ، د پەیڤەکێ دا گۆت "ژ دل سوپاسیا دەزگەهێ روانگە دکەم، بۆ ڤێ دەستپێشخەریا گرنگ، کو کەمپا زانکۆیا دهۆک هەلبژارتی بۆ چاندنا نێزیکێ پێنچ هزار داران، کو مەرەم ژێ پاقژکرنا ژینگەها زانکۆیا دهۆک و پارێزگەها دهۆکێ و کوردستان ب گشتی یە".

هەروەسا سەرۆکێ زانکۆیا دهۆک دیارکر "دەرگەهێ زانکۆیا دهۆک یێ ڤەکریە بۆ هەر دەزگەهـ و رێکخراوەکا ناڤخۆیی و بیانی کو پرۆژە ل ناڤ کەمپا زانکۆیا دهۆک هەبن، ب مەرەما پاقژکرنا ژینگەهی و خزمەتکرنا جڤاکی ب رێکا زانکۆیا دهۆک، ب تایبەتی پرۆژێن وەکو پرۆژێ دارستانێن روانگە، کو دگەل وان ١٧ ئارمانجێن نەتەوەیێن ئێکگرتی کو بۆ سالا ٢٠٣٠ـێ هاتینە دانان، ل ژێ ناڤێ ئارمانجێن گەشەپێدانا بەردەوام Sustainable Development Goals".

ل دویماهیا گۆتارا خۆ، د. داود ئەتروشی تەکەزی ل وێ چەندێ کر کو"بۆ پشتەڤانی و بدەستڤەئینانا فەندێن باشتر و زێدەتر، گەلەک گرنگ و پێدڤیە رێنمایێن رێکخراوا نەتەوەیێن ئێکگرتی د ئەنجامدانا ئەڤان پرۆژان دا ل بەرچاڤ وەربگرین".

هەژی ئاماژێ یە، لژنەکا دەمکی هاتیە پێکئینان، بۆ کەسکرنا نێزیکی ١٤٥٠ دۆنەمێن ئەردی ل کەمپا زانکۆیا دهۆک.

ل رۆژا پێنچشەمبی، رێکەڤتی ٢٠٢٢/١٢/٢٢ـێ، ل کولیژا زمانان ل زانکۆیا دهۆک، و ب ئامادەبوونا سەرۆکێ زانکۆیا دهۆک د. داود سلێمان ئەتروشی، عەبدولسەلام مەدەنی رێڤەبەرێ گشتیێ دەزگەهێ رەوانگە، و هژمارەکا ئەندام جڤات و مامۆستا و قوتابیێن زانکۆیا دهۆک و کارمەندێن دەزگەهێ روانگە، و د چارچۆڤێ پرۆژێ"دارستانێن روانگە" دا، دەزگەهێ روانگە ب هەڤکاری دگەل زانکۆیا دهۆک، د رێورەسمەکی دا دەست ب چاندنا ٥٠٠٠ داران هاتەکرن ل کەمپا زانکۆیا دهۆک، ب ڤێ چەندێ ژی سەرجەمێ دارێن هاتینە چاندن ل زانکۆیا دهۆک و موصل گەهشتە ٢٣٥٠٠دارا.