پشكا جۆگرافی ل كۆلیژا زانستێن مرۆڤایەتی ل زانكۆیا دهۆك ب هەڤكاری دگەل سەنتەرێ بێشكچی بۆ ڤەكۆلینێن مۆرڤایەتی و ل ژێر ناڤێ (ژینگەها چیایی، بیاڤێن وەبەرهێنانێ و رێكێن گەشەپێدانا بەردەوام) ل رۆژا 3/4/2019 ل هۆلا كۆنفرانسان و ل ژێر چاڤدێریا سەرۆكێ زانكۆیا دهۆك پ. د. مصلح دهۆكی كۆنفرانسێ زانستی یێ دووێ ل دۆر ژینگەها چیایی هاتە گێران.
ل دەسپێكێ پێشانگەهەكا پوستەر و وێنێن چیایێن كوردستانێ هاتە ڤەكرن و دیڤ دا پەیڤا سەرۆكێ لژنا بلندا زانستی یا كۆنفرانسی ژ لایێ د. ئەحمەد عەلی حسێن هاتە خواندن و د پەیڤا خودا گۆت ژبەر گرنگیا هەبوونا چیا و كارتێكرنا وان ل سەر ژینگەهێ ئەڤە دووەم كۆنفرانسە ل زانكۆیا دهۆك دڤی بیاڤی دا دهێتە گێران و نزیكی 40 ڤەكۆلین هاتینە پێشكێش كرن و 25 ژ وان هاتنە وەرگرتن ژلایێ لژنا زانستی یا كۆنفرانسی ڤە و بۆ ماوێ دوو رۆژان ئەڤ ڤەكۆلینە دێ‌َ هێنە پێشكێش كرن و ل سەر دوو تەوەران دابەش بویە ئەو ژی تەوەرێ سروشتی و مرۆڤایەتی و هەر تەوەرك چەند ڤەكۆلینا بخۆ ڤە دگریت.
سەرۆكێ زانكۆیا دهۆك پ. د. مصلح دهۆكی د پەیڤەكی دا گۆت ژ كەڤن دا كوردان یا گۆتی چیایێن مە دوستێن مەنە، یان ژ بلی چیا كوردان چ دوستێن دی نینن، ژ ڤێ گۆتنێ هوسا دیار دبیت كو چیایێن كوردستانێ خزمەتەكا مەزن یا گەهاندیە مللەتێ مە، ئەڤجا چ ل سەردەمێن شورەشێن رزگاری خواز بیت، كو باشترین پەناگەه بووینە بۆ شورەشگێران، یان ژی ل سەردەمێن ژیانا گۆند نشینیێ یان ژی ل سەردەمێن نوی تر، دەمێ خەلكێ مە قەستا چیایێن كوردستانێ دكرن بۆ پەیداكرنا كەدا رۆژانە یا ژیان و ژیارێ، كو د ڤان هەمی سەردەمان دا چیایێن مە دوستێن هەرە نێزیكێن مە بووینە.
هەروەسا پ. د. مصلح دهۆكی د پەیڤا خۆدا گۆت ژ بەر گرنگیا پێگەهێ چیایێن مە د بیاڤێ جوگرافیا دەڤەرێ دا، هەروەسا دا پتر گرنگیێ بدەینە وان ڤەكۆلینان ئەوێن ل دۆر ژینگەها چیایی دهێنە ئەنجام دان ئەڤرۆ مە ل كۆلیژا زانستێن مرۆڤایەتی ل زانكۆیا دهۆك ئەڤ كۆنفرانسە سازكریە، دیار ژی كر كو ل زانكۆیا دهۆك گرنگیی دایە هەمی بابەتێن گەشەپێدانێ و خۆ پێش خستنێ و هەمی ئاسانكاری ژی ل بەردەستن ژ بۆ وێ چەندێ خزمەتا جڤاكی و دەڤەرێ بهێتە كرن و ئەوا دشیان دابیت ژلایێ زانستی و ئەكادیمی ڤە ڤەكۆلین ل سەر دهێنە كرن و دهێنە ئاراستەكرن بۆ لایەنێن پەیوەندیدار، كو ئەنجامێ دووماهیێ خزمەت كرن بیت بۆ وەلاتێ مە.
دیسا د رێورەسمێن ڤەكرنێ دا تابلویەك ژلایێ تیپا دهۆك یا هونەرێ مللی ڤە هاتە نیشادان، و پاشی پەنەلێن كۆنفرانسی دەستپێكرن.
ژمارە بەشداربویان ٣٢