راگەهاندنا زانکۆیا دهۆک؛ ٣٠ـی چریا ئێکێ ٢٠٢٢

ل ناڤەندا قوتابیان ل کەمپا زانکۆیا دهۆک، ل رێکەڤتی ٢٠٢٢/١٠/٢٧، سەنتەرێ خواندنێن ئاشتیێ و چارەسەرکرنا ململانان، ب هەڤکاری دگەل ئێکەتیا لوترن یا جیهانی (LWF--Iraq) و ب پالپشتیا کەنیسا سویدی (ACT)، چالاکیەک بۆ خودان پێدڤیێن تایبەت ئەنجامدا.

د ڤێ چالاکیێ دا چەندین خودان پێدڤیێن تایبەت ب ئەنجامدانا چەند کارێن هۆنەری و جودا جودا پشکداربوون ب بەرهەمئینانا چەندین کارێن دەستی و ژەنینا ئامیرێن مۆزیکێ، ئەڤ چالاکیە بۆ جهێ سەرنجراکێشانا قوتابیێن زانکۆیێ، ب دەست قوتان و کەیفخۆشی، قوتابیێن زانکۆیێ دەستخۆشی ل پشکداربوویێن چالاکیێ کر.

دەربارەی ڤێ چەندێ ژی، شرین سالح حەسەن، هاریکارا رێڤەبەرێ پرۆژەی ل سەنتەرێ خواندنێن ئاشتیێ و چارەسەرکرنا ململانان ل زانکۆیا دهۆک دیارکر "ئەڤ پرۆژە ل ژێر ناڤونیشانێ (ئاڤاکرنا جڤاکێن گشتگیر ل ئیراقێ، ب رێکا هەڤگرتنا جڤاکی بۆ دووبارە ئاڤاکرنا باوەریێ) یە، پرۆژە ژ سێ قۆناغا پێکدهێت، قۆناغا ئێکێ ئەنجامدانا وۆرکشۆپەکا سێ رۆژی بوو، بۆ ٤٠ گەنجا، د قۆناغا دووێ ژی دا دوو چالاکی هاتنە ئەنجامدان، کو یا ئێکێ روینشتنەک بوو، بۆ خودان پێدڤیێن تایبەت، تێدا باس ل وێ چەندێ هاتە کرن کا ب چ شێوە خودان پێدڤیێ تایبەت دێ خۆ ژ عنرینێ (تنمر) پارێزیت، هەروەسا چالاکیا دووێ ژی بۆدیارکرنا وێ چەندێ بوو کو خودان پێدڤیێن تایبەت وەکو کەسێن ئاسایی یێن جڤاکی دشێن گەلەک کارێن جودا ئەنجامبدەن و خودان بەهرەیێن تایبەتن.

هەژی ئاماژێ یە کو بریارە د قۆناغا سێیێ دا ژ پرۆەی فەستیڤالەکا گشتگیر ل دۆر هەڤگرتنا جڤاکی ل زانکۆیا دهۆک بهێتە ئەنجامدان.