ب هەلکەڤتا ب دویماهی هاتنا سالا خواندنێ ٢٠٢١-٢٠٢٢ و ب مەرەما ئاراستەکرنا سوپاسی و دەستخۆشیان و هەلسەنگاندنا کار و خزمەتێن یەکەیێن کارگێری و خزمەتگوزاری ل زانکۆیا دهۆک، د. داود سلێمان ئەتروشی سەرۆکێ زانکۆیا دهۆک دگەل رێڤەرێن یەکەیێن کارگێری و خزمەتگوزاری ل زانکۆیێ کۆمبوو.
د ڤێ کۆمبوونێ دا و ب ئامادەبوونا د. ئەحمەد محەمەد سالح هاریکارێ سەرۆکێ زانکۆیێ بۆ کاروبارێن کارگێری و دارایی و م. هشیار عەبدی رێڤەبەرێ کارگێری و خۆیەتی ل زانکۆیا دهۆک، سەرۆکێ زانکۆیێ سوپاسی و دەستخۆشیێن سەرۆکاتیا زانکۆیێ ئاراستەکرن و دیارکر "رێڤەبرن بناغەیە و سەرکەڤتنا کارێ ئەکادیمی ب کارێ کارگێری ڤە گرێدایە و پێدڤیە ئەم هەمی پێکڤە هەولبدەین ناڤێ زانکۆیا دهۆک پتر بلندبکەین".
د. داود ئەتروشی ژ لایەکێ دی ڤە گرنگیەکا مەزن دا بوها و پرەنسیپێن سەرەکی د کارێ رێڤەبرنێ دا و ب تایبەتی پرەنسیپێن رێزگرتن، دادپەروەری، زەلالی و دەستپاکیێ و خویاکر "پێدڤیە رێڤەبەر سەرکردە بیت و نموونا هێز و کارکرنێ و پێگیریێ بیت و هێزەکا پۆزەتێڤ بدەتە کارمەندان"، هەرەسا ئاماژە دا رۆلێ ڤان یەکەیان د پێشڤەبرنا زانکۆیا دا و گۆت "پێدڤیە زانکۆیا دهۆک بەردەوام پێشڤەبچیت و ئەگەر سالەکێ ل ئاستێ خۆ ما، واتە ئەم یێن پاشکەڤتین".
ژ لایێ خۆ ڤە د. ئەحمەد محەمەد سالح، پشتی ئاراستەکرنا سوپاسی و دەستخۆشیان، خویاکر "زانکۆیا دهۆک ئێکە ژ زانکۆیێن پێشکەڤتی ل دەڤەرێ د بوارێ کارگێری دا"، هەروەسا دیارکر کو بەردەوام دێ دویڤچوون و هەلسەنگاندن هەبن ب مەرەما پتر پێشڤەبرنێ.
ل دویماهیا ڤێ کۆمبوونێ، دانوستاندن لدۆر هویرکاریێن کارێ کارگێری و خزمەتگوزاری ل زانکۆیا دهۆک هاتنە ئەنجامدان و گوهداریا بۆچوون و پرسیارێن ئامادەبوویان هاتەکرن و دانوستاندن لدۆر ڤان هویرکاریان هاتنە ئەنجامدان.