شاندەکێ بلندێ وەلاتێ ئیتالیا سەرەدانا سەڕۆکاتیا زانکۆیا دهۆک کر
Oct. 16, 2022, 12:59 p.m.

راگەهاندنا زانکۆیا دهۆک؛ ١٥ـی چریا ئێکێ ٢٠٢٢

ب مەرەما ئەنجامدانا کارێن زانستیێن هەڤپشک و خورترکرنا پەیوەندیان دگەل زانکۆیا دهۆک، شاندەکێ بلندێ وەلاتێ ئیتالیا سەرەدانا سەڕۆکاتیا زانکۆیا دهۆک کر.

ئێڤاریا رۆژا شەمبی رێکەڤتی ١٥ـی چریا ئێکێ ٢٠٢٢، د. داود سلێمان ئەتروشی سەرۆکێ زانکۆیا دهۆک ل سەرۆکاتیا زانکۆیێ پێشوازی ل شاندەکێ ئیتالی کر کو پێکهاتبوون ژ بالیۆزێ ئیتالیا ل بەغدا، قونسلێ گشتیێ ئیتالیا ل هەرێما کوردستان، سەرۆکا زانکۆیا ئودینا و بەرپرسا پەیوەنیێن بلند و سەرۆکێ شاندێ ڤەکۆلینێن جهێن شینورای ل زانکۆیا ئودینا.

دڤێ سەرەدانێ دا بۆ زانکۆیا دهۆک، کۆمبوونەکا بەرفرەهـ ب سەرۆکاتیا د. داود ئەتروشی و ب بەرهەڤیا هەردوو هاریکارێن سەرۆکێ زانکۆیا دهۆک د. لقمان هادی حەسەن و د. ئەحمەد محەمەد سالح و د. رەند حەمۆدی رێڤەبەرا ئۆفیسا پەیوەندیێن نیڤدەولەتی ل زانکۆیا دهۆک و د. دیلان روستەم شیرەتکارێ سەرۆکێ زانکۆیا دهۆک، دگەل شاندێ ئیتالی ل سەرۆکاتیا زانکۆیا دهۆک هاتە ئەنجامدان.

ل دەستپێکا کۆمبوونێ بالیۆزێ ئیتالیا کەیفخۆشیا خۆ و شاندێ دگەلدا ب ڤێ سەرەدانێ دیاکر، سوپاسیا سەرۆکێ زانکۆیا دهۆک کر بۆ وێ پێشوازیا گەرما ل شاندێ وان هاتیە کرن.

هەژی ئاماژێ یە دڤێ کۆمبوونێ دا ب تێروتەسەلی دانوستاندن ل دۆر خورتکرنا پەیوەندیان د ناڤبەرا زانکۆیێن وەلاتێ ئیتالیا و هەرێما کوردستانێ دا ب گشتی و زانکۆیا دهۆک ب تایبەتی ژلایێ زانستی و خواندنا بلند و هنارتنا قوتابیان بۆ زانکۆیێن وەلاتێ ئیتالیا هاتەکرن.

ل دویماهیێ ژی سەرۆکێ زانکۆیا دهۆک خۆشحالیا خۆ ب سەرەدانا شاندێ ئیتالیا بۆ زانکۆیا دهۆک دیارکر و هیڤی خواست د داهاتی دا زانکۆیا دهۆک و زانکۆیێن وەلاتێ ئیتالیا بشێن کارێن هەڤپشکێن زێدەتر د بیاڤێن جودا دا ئەنجام بدەن.