كۆلیژا پەروەردە بنیات ل زانكۆیا دهۆك ل ژێر درووشمێ كەلتور ناسنامە و هەبوونە فستیڤالا خۆ یا كەلتوری یا سالانە ل ژێر چاڤدێریا سەرۆكێ زانكۆیا دهۆك پ. د. مسلح دهۆكی ل رۆژا 25/4/2017 ل ئاڤاهیێ كۆلیژێ گێرا.
د پەیڤەكی دا سەرۆكێ زانكۆیا دهۆك پ. د. مسلح دهۆكی گۆت كەلتور ناسناما مللەتانە و هەر مللەتەك شانازیێ ب كەلتورێ خو دبەت، چونكو رابردویێ مللەتان و هێزا زانین و بەرخودان و تێگەهشتن و تێگوشانا وان تێدا دیار دبیت، كەواتە ئەو مللەتێن خودان دیروكێن دویر و درێژ خودان كەلتورێن دەولەمەندن، مللەتێ كورد ژی ئێك ژ وان مللەتانە كو خودان كەلتورەكێ دەولەمەندە، ئەڤ كەلتورە ژی نیشانا دیروكا كەڤنارا گەلێ مەیە.
سەرۆكێ زانكۆیا دهۆك هەروەسا گۆت دەمێ بەحسێ كەلتوری دهێتە كرن هەردەم خالەكا گرنگ دهێتە پێش، ئەو ژی پاراستنا ڤی كەلتوریە، كو پاراستنا وی ئەركە ل سەر مللێن هەمیان، ئەم ژی وەكو زانكو ب رێكا كولیژ و پشكێن زانستی و سەنتەرێن تایبەتمەند ب رەنگەكێ زانستی ئەڤ كەلتورە بهێتە كۆمكرن و ڤەژاندن و ب رەنگەكێ زانستی پێشكێشی بەرەبابێن نوی و قوتابیان بكەین كو ژ ناڤچونێ بهێتە قورتال كرن، گێرانا ڤان جورە ڤیستەڤالان ژی د ڤی چارچوڤەی دایە، لەورا هەردەم زانكۆیا دهۆك گرنگیێ ددەتە ڤان جورە چالاكیان.
ئاماژە دا وێ چەندێ ژی كو مە كەلتورێ خو یێ تایبەت یێ هەی، مە زمانێ خو یێ هەی، مە ئاخا خو یا هەی، كو ئەڤە هەمی شەنگستێن دەولەت بوونێ نە، لەورا نوكە و ژ هەر دەمەكی پتر مە پێدڤی ب راگەهاندنا دەولەتا كوردیە، ل سەر مەژی وەكو زانكو وەكو سازیێن ئەكادیمی ئەم پشتەڤانیێ ل پێنگاڤێن راگەهاندنا دەولەتێ و پشتەڤانیا ریفراندومێ بكەین داكو ببینە خودان دەولەت.
هەر د ڤێ فستیڤالا كەلتوری دا چەندین چالاكیێن جودا جودا یێن كەلتوری هاتنە ئەنجام دان و چەندین خارنێن كوردی هاتبوونە دروستكرن، هەروەسا نیشادانا چەندین كارێن كلتوری، ل دووماهیێ ژی ئاهەنگەكا سترانێن فلكلوری هاتە گێران.