ل زانکۆیا دهۆک ناڤەرۆکا پەرتووکەکا لدۆر پەیوەندیێن هەرێمێ هاتە گەنگەشەکرن
April 25, 2022, 6:37 p.m.

 

ناڤەندا ڤەکۆلین و راپرسیێن کوردستان 24  ب هەڤکاری دگەل کولیژا زانستێن سیاسی ل زانکۆیا دهۆک روینشتنەک بۆ گەنگەشەکرنا ناڤەرۆکا پەرتووکا "هەرێمی کوردستان و دراوسێیەکانی"  یا نڤیسەر (د. زوبێر رەسوول ئەحمەد) ل هۆلا خەلەفێ زێباری ل زانکۆیا دهۆک سازکر.

 

لدەسپێکێ دکتۆر هەوار نێروەی راگرێ کولیژا زانستێن سیاسی بخێرهاتنا ڤەکۆلەری و مێڤان و مامۆستا و قوتابیان کر و دەستخۆشی ل ناڤەندا ڤەکۆلینێن کوردستان 24 کر کو خۆ ل ڤەکۆلینێن ئەکادیمی دکەتە خودان.

 

بەرپرسێ ناڤەندا ڤەکۆلین و راپرسیا یا کورڕستان 24 (د. نەهرۆ زاگرۆس) باس ل وان هەموو چالاکیێن ناڤەندا وان کر و مەرەما دامەزراندنا  ڤێ ناڤەندا گرنگ، کو قوتابی ژی لدویڤ مەرجێن پێدڤی دشێن بەرهەمێن خۆ لێ بەلاڤبکەن، ئەڤچا ئەو بەرهەمە چ پەرتووک بن، یان ڤەکۆلین و گۆتار، کو ناڤەندا ناڤبری دێ د بیاڤێن جودا دا پشتەڤان بیت.

 

پاشی د. زوبێر رەسوول مامۆستایێ زانکۆیا سەلاحەدین باس ل ئەگەرێن چاپکرنا ڤێ پەرتووکێ کر، و ئاماژە دا جهێ هەرێمێ د ڤەکێشا سیاسی دا کر و رۆلێ وێ دگەل وەلاتێن جیران و ماندیبوونا وان بۆ پاراستنا هەڤسەنگیا سیاسی د ڤێ دەڤەرا نەسەقامگیر دا.

 

نڤیسەری ئەو یەکە دیارکر کو پەرتۆک ژ حەفت پشکا پێکدهێت و شەش پشکێن دەستپێکی باس ل کەتوارێ پەیوەندیێن هەرێمێ دکەت دگەل تورکیا، ئیران، سۆریا، وەلاتێن کەنداڤی، ئەمریکا و رۆسیا، و پشکا دویماهیێ ژی دەرئەنجامان بخۆڤە دگریت. دیسان دیارکر کو گەلەک وەلات دشێن دەستێوەردانێ د هەرێمێ دا بکەن و مایتێکرنێ د سیاسەتا وێدا بکەن و نموونە بۆ ڤێ ئینان، پاشی باس پەیوەندیێن مە دکەل ئیرانێ و تورکیا کر کا ئایا بازرگانینە یانژی پەیوەندیێن لسەر بنەمایێ ئیمناهیێنە، دیسان کەتوارێ پەیوەندیێن هەرێمێ دگەل ئەمریکا ژ لایەکی ڤە و دگەل رۆسیا ژ لایەکێ دی ڤە شرۆڤەکر.

 

ل دویماهیێ، ئەڤ پەرتووکە بێبەرامبەر بۆ قوتابی و مامۆستایا هاتە پێشکێشکرن و ژ لایێ نڤێسەری ڤە هاتنە ئیمزاکرن.