ب مەرەما پراکتیکرنا شیانێن قوتابیێن کولیژا یاسا ل زانکۆیا دهۆک د بوارێ برێڤەبرنا دادگەهان دا و وەرگرتنا رۆلێن جودا د کەیسێن جودا دا، ئەڤرۆ رێکەڤتی ٦ـی نیسانێ ٢٠٢٣ و ب ئامادەبوونا د. داود سلێمان ئەتروشی، سەرۆکێ زانکۆیا دهۆک و د. ئەڤین خالد عەبدولرەحمان، راگرا کولیژا یاسا و هژمارەکا مامۆستا قوتابیێن کولیژا ناڤبری، قوتابیێن قۆناغا چوارێ ل کولیژا ناڤبری دادگەهەکا نموونەیی برێڤەبر.
د رێڤەبرنا ڤێ دادگەها نموونەیی دا، قوتابیێن پشکدار رۆلێن سەرەکی یێن دادگەهێ گێران، وەکو سەرۆک و ئەندامێن دادگەهێ، داواکارێ گشتی، داواکار، داوالێکری و پێنووس. کو ل دویماهیا کەیسێ گریمانەیی، داوالێکری شیان دادگەهێ رازیبکەن کو بریارێ د بەرژەوەندیا وان دا بدەت. ئەڤ دادگەهە ژی گرێدای مافێن سڤیل یێن فەرمانبەرێن حکومی بوو و ب سەرپەرشتی و راهێنانا مامۆستا نێچیرڤان سدقی عومەر و ب چاڤدێریا د. فارس عەلی جانگیر، راوێژکارێ جڤاتا شۆرایێ ل هەرێما کوردستانێ هاتە برێڤەبرن.
ل دویماهیا ڤێ دادگەها نموونەیی، سەرۆکێ زانکۆیا دهۆک پەسنا شیانێن قوتابی و مامۆستایێن پشکدار کر و دەستخۆشی لێ کر و دیاکر "ب ڤێ دادگەها نموونەیی، قوتابی مامۆستایێن پشکدار ئاستێ خۆ یێ بلند و شیانێن خۆ یێن مەزن سەلماندن، کو ئەو سەقایە بۆ مە چێکر کو ئەم ل دادگەهەکا راستەقینە ئامادەبووینە"، پاشی سەرۆکێ زانکۆیێ سەرسامیا خۆ ب وی زمانێ کوردیێ رەسەن و پاقژ دیارکر ئەوێ د برێڤەبرنا ڤێ دادگەها نموونەیی دا هاتیە بکارئینان. پاشی باوەرنامەکا رێزگرتنێ پێشکێشی چاڤدێرێ ڤێ چالاکیا زانستی کر.
راگەهاندنا زانکۆیا دهۆک؛ ٦ـی نیسانێ ٢٠٢٣
راپۆرت: عسمەت خابوور
فۆتۆ: جەلال مەمانی