راگەهاندنا زانکۆیا دهۆک؛ ١٩ـی چریا دووێ ٢٠٢٢

ل رێکەڤتی ١٧/١١/٢٠٢٢ و ل سەرۆکاتیا زانکۆیا دهۆک شاندەکێ زانکۆیا فەلۆجە، کو یێ پێکهاتی ژ سەرۆکێ زانکۆیێ د. صەباح ئیبراهیم حەمادی و جڤاتا زانکۆیا ناڤبری، ب مەرەما ئیمزاکرنا رێکەڤتننامەکا هەڤکاریێ د بوارێن زانستی و رەوشەنبیری دا، سەرا زانکۆیا دهۆک دا و ژ لایێ د. داود سلێمان ئەتروشی سەرۆکێ زانکۆیا دهۆک و د. لقمان هادی حەسەن و د. دلشاد عەبدولجەبار حەلیم هارێکارێن سەرۆکێ زانکۆیا دهۆک و د. رەند حەمۆدی رێڤەبەرا نڤیسینگەها پەیوەندیێن ناڤدەولەتی ل زانکۆیا دهۆک هاتنە پێشوازیکرن.

د روینشتنەکێ دا، سەرۆکێ زانکۆیا فەلۆجە کەیفخۆشی و مەندەهۆشیا خۆ ب وێ پێشکەڤتنا ل زانکۆیا دهۆک هەی دەربڕی د ڤی سەردەمێ هەستیار و تژی ئاریشە و گرفت دا. وەسا دا زانین ژی کو زانکۆیا دهۆک دهێتە هژمارتن دەولەمەندترین زانکۆ د پەیوەندیێن ناڤخۆیی و ناڤدەولەتی دا د بوارێن ئالۆگۆرکرنا قوتابی و مامۆستا و پرۆگرام و پرۆژێن زانستی دا. ژ لایەکێ دی ڤە سەرۆکێ زانکۆیا فەلۆجە باس ل ئاستێ پێشکەڤتیێ تاقیگەهێن زانکۆیا دهۆک و پێشکەڤتنا ئاڤاهی و هژمارا زۆرا قوتابیان و سیستەمێ خواندنێ کر.

ژ لایێ خۆ ڤە سەرۆکێ زانکویا دهۆک بەرهەڤیا زانکۆیێ دیارکر بۆ پەیوەندیێن دووقۆلی و پلانێن زانکۆیێ بۆ سەرەدانا هژمارەکا زانکۆیێن عیراقی ب مەرەما هەڤکاری و لێکنێزیکبوونێ د بوارێن زانستی و جڤاکی دا.

د لایەکێ ئاخڤتنێن خۆ دا، سەرۆکێ زانکۆیا فەلۆجە چیرۆکا تراژیدیا زانکۆیا ناڤبری ڤەگێرا کو تۆشی چەندین کارەساتا بوویە، ئەوژی ل سەردەمێ هێرشا تیرۆرستیا داعش، کو ل سالا ٢٠١٤ـێ ئەڤ زانکۆیە هاتە دامەزراندن و هەر د وێ سالێ دا داعش باژێرێن وان داگیرکرن و زانکۆیا وان ژناڤبر. لەورا ستاف و قوتابیێن وان ل سەر هژمارەکا زانکۆیێن عیراقێ و هەرێمێ بەلاڤەبوون، پاشی باس ل کاریگەریێن بەلاڤبوونا کۆڤید ١٩ وەکو گرفتەکا جیهانی کر ل سەر زانکۆیا فەلۆجە.

دهێتە زانین سەرۆکێ زانکۆیا فەلۆجە ئێک ژ دەرچوویێن زانکۆیێن هەرێمێ یە، سەرەدانا وان ئەڤ سەرەدانە ژی ب مەرەما مفاوەرگرتنێ یە ژ سەربۆرێن زانکۆیا دهۆک، نەخاسمە ناڤودەنگیا زانکۆیا دهۆک د بوارێ پەیوەندیان دا. ژ لایەکێ دی ڤە سەرۆکێ زانکۆیا فەلۆجە خویاکر "خەونێن مە گەلەکن و رێگریێن مە یێن ئەمنی و سیاسی پترن. لەورا هەر روینشتنەک یان هەر کەسەکێ بیانی ڤیای پەیوەندیان یان هەر کارەکێ دی دگەل زانکۆیا فەلۆجە بکەت، ژبەر کاودانێن ئەمنی داخوازا دیتنا مە ل هەرێما کوردستانێ کریە، ئەڤ چەندە بووینە ئەگەر کو پەیوەندیێن مە سنوورداربن”.

هەر دڤێ روینشتنێ دا، د. رەند حەمۆدی، رێڤەبەرا نڤیسینگەها پەیوەندیێن ناڤدەولەتی ل زانکۆیا دهۆک، کورتیەک ل دۆر زانکۆیا دهۆک پێشکێشکر و گۆت ”تەمەنێ زانکۆیا دهۆک بوو ٣٠ سال، زانکۆیا دهۆک ل سالا ١٩٩٢ـێ ب دوو کولیژان دەستپێکر، ب خۆشحالی ڤە نوکە ژ ١٩ کولیژ و نێزیکی ٧٠ پشکێن زانستی پێکدهێت. پرۆژە و بەرنامە و پەیوەندیێن مە دگەل زانکۆیێن دەرڤە رۆژ بۆ رۆژ بەرفرەهترن و زانکۆیا دهۆک باوەرنامێن هەڤپشک دگەل زانکۆیێن دەرڤە پێشکێشی قوتابیێن بەکالۆریۆسێ و خواندنا بلند دکەت، بۆ نموونە ل کولیژا پلاندانانێ، هەر قوتابی دەرچووی دبیتە خودان باوەرناما هەڤپشک دگەل زانکۆیا تەکنیکیا دۆرتمۆند TU Dortmund یا ئەلمانی و زانکۆیا دهۆک".

ل دویماهیا ڤێ روینشتنێ، رێکەڤتننامەکا هەڤکاریێ د بوارێ زانستی و رەوشەنبیری دا د ناڤبەرا هەردوو زانکۆیا دا ژ لایێ سەرۆکێ زانکۆیا دهۆک و سەرۆکێ زانکۆیا فەلۆجە ڤە هاتە ئیمزاکرن و بۆ بیرهاتن دیاری پێشکێشی هەڤدوو کرن.

زانکۆیا فەلۆجە دکەڤیتە پارێزگەها ئەنبار و ل سالا ٢٠١٤ـێ هاتیە دامەزراندن و ژ ٦ کولیژا پێکدهێت، ئەوژی کولیژێن پزیشکی، پزیشکیا ڤێتەرنەری، یاسا، کارگێری و ئابۆری، پەروەردا ئیسلامی و زانستێن تەکنیکی.