كولیژا پزیشكی ل زانكۆیا دهۆك ب هەڤكاری دگەل رێكخراوا (IFMSA-Kurdistan) پرۆژەك بۆ قوتابیان دانایە بۆ ئەنجامدانا ڤەكۆلینێن زانستی، ژ بۆ هایداربوونا قوتابیان ل سەر ڤەكۆلینێن زانستی و ب پشتبەستنێن پزیشكی، كو ئەڤ پرۆژە یێ هاریكارە بۆ پێشخستنا شیانێن قوتابیان بۆ ئەنجامدانا ڤەكۆلینان، و ئاگەهداریا وان ل دۆر پێشكەڤتنێن زانستی، ئەڤی پرۆژەی ب وۆرکشۆپەکا دوو رۆژی، کو ل پەرتووکخانا ناڤەندی هاتە ئەنجامدان، دەستپێکر و پێنج قووناغان ب خۆ ڤە دگریت.
بۆ برێڤەبرنا ڤی پرۆژەی، لژنەك هاتیە پێكئینان، ژ پێنج كەسان ژ مامۆستا و قوتابیێن پزیشكی پێکدهێت، ئەندامێ ڤێ لژنێ، ئەلند بەنگین، دیاركر كو ئەڤ پرۆژە قوتابیێن قووناغێن چوارێ و پێنجێ و شەشێ بخۆڤە دگریت، كو دێ ڤەكۆلینان چێكەن و پێشكێشی لژنا هەلسەنگاندنێ كەن، و داكو قوتابیێن پشكدار د ڤی پرۆژەی دا پتر ئامادەبن بۆ ئەنجامدانا ڤەكۆلینان، دوو وۆركشۆپ دێ بۆ هێنە ئامادەكرن ل دوو دەمێن جودا دا.
ئەلند بەنگین، ئەو ژی دیاركر كو ئەڤ پرۆژە د چەند قووناغان دا دبۆریت، قوناغا ئێكێ، قووناغا ئامادەكاری و كارگێری و تەكنیكی یە، قووناغا دووێ دەستپێكرنا پرۆژەیە ب وۆركشۆپەكی كو دوهی دەستپێکر و ئەڤرۆ ب دویماهی هات، ئەڤ ووركشۆپە ل دۆر دەستپێكرن و چاوانیا ئەنجامدانا ڤەكۆلینێ یە كو دێ تیشكێ ددەتە بابەتی هەمیێ، و وۆركشۆپا دووێ دێ بۆ وان قوتابیان بیت ئەوێن پرۆژێن خۆ یێن ڤەكۆلینان پێشكێشی لژنا زانستی كرین، و پشتی پرۆژێن وان دهێنە وەرگرتن، ئەو قوتابی دێ د وۆركشۆپا دووێ دا پشكدار بن، كو یا تایبەتە ب نڤیسین و بەلاڤكرنا ڤەكۆلینان، و ئەو ژێدەرێن ڤەكۆلەر پێدڤی دبیت دێ چاوا ب دەستخۆڤە ئینیت.
گۆت ژی قووناغا سێیێ دویڤچوون و پێرابوونێن پێدڤینە بۆ قوتابیان، كا دێ پێدڤی ب چ بن هەتا دگەهیتە دویماهیێ، قووناغا چارێ، قووناغا بدویماهی ئینانا ڤی پرۆژەیە، كو ل بەرە سیمپوزیۆمەكی دابنن بۆ وان ڤەكۆلینێن هاتینە چێكرن كو تێدا ڤەكۆلین بهێنە گەنگەشەكرن و یێن ئێكێ و دووێ و سیێ بهێنە خەلاتكرن، قووناغا پێنجێ ژی د بەرنامەی دایە ئەڤ پرۆژە ببیتە سالانە، چ ل كولیژا پزیشكی یانژی ل هەمی كولیژێن زانكۆیا دهۆك.
ل دویماهیێ ژی، ئەلند بەنگین، دیاركر كو د ئەنجامدانا ڤەكۆلینان دا مامۆستایێ سەرپەرشت دێ هاریكاریا قوتابی كەت، و بۆ مامۆستایی ئەو ڤەكۆلین دێ هێتە هژمارتن بۆ بابەتێن پلە بلندكرنێ، كو ئەڤ ڤەكۆلینە دێ د هەمی پرۆسێن ڤەكۆلینا زانستی دا دەرباز بیت، و دبیت ژی ل هندەك گۆڤارێن ناڤخۆیی و جیهانی ئەڤ ڤەكۆلینە بهێنە بەلاڤكرن.