A seminar at UoD by Ismael Beşikçi
Oct. 18, 2018, 10:53 a.m.

سەنتەرێ‌ بێشكچی بۆ ڤەكولینێن مرۆڤایەتی ل زانكۆیا دهۆك و ئێكەتیا لاوێن دیموكراتا كوردستانێ‌ سمینارەك بۆ نڤیسەرێ‌ مەزن و دوستێ‌ مللەتێ‌ كورد پ.د ئیسماعیل بێشكچی لسەر (رەوشا هەرێما كوردستانێ‌ پشتی ریفراندۆمێ‌) ل هولا كونفراسان ل زانكۆیا دهۆك سازكر.
لدەسپێكێ‌ سەرۆكێ‌ زانكۆیا دهۆك پ.د. مصلح محەمەد سەعید دهۆكێ‌ گۆت:" سالا بوری وەك ئەڤرۆ كەركوكا دلێ‌ كوردستانێ‌ ژلایێ‌ حەشدا شەعبی و لەشكەرێ‌ عیراقێ‌ ڤە هاتە داگیركرن ب هیجەتا ئەنجامدانا ریفراندۆما سەربەخۆیا كوردستانێ‌، بەلێ‌ ئەڤە نە هیجەتەك بوویە داكۆ عیراق هێرش بكەتە سەر كەركۆكێ‌، ریفراندۆم نەهاتبایە ئەنجامدان ژی دا هەر حكومەتا عیراقێ‌ هێرش كەتە سەر سنۆرێن ئاخا كوردستانێ‌ ".
سەرۆكێ‌ زانكۆیا دهۆك بەحسكر، باشترین دەستكەفتا كوردستانیان ریفراندۆما سەربەخۆیا كوردستانێ‌ بوویە، جونكی پرۆسیسەكا یاسایی و شەرعی بوویە و بۆ هەمی جیهانێ‌ ب دەنگێ‌ خۆ دیاركر كوردستانیان برێكێن ئاشتی و یاسایی مافێن خۆیێن خۆ شەرعی دفێن و ریفراندۆم بوویە بەلگەك ددەستێن كوردستانیاندا و ئەڤێن بۆ سەربەخۆیێ‌ دەنگدایی دڤێت شانازیێ‌ پێ‌ بەن.
پ.د. مصلح دهۆكی ئاماژەدا:" پشتی داگیركرنا باژێرێ‌ كەركوكێ‌ و هێزێن عیراقی بەردەوامی دایە هێرشێن خودا لسەر ئاخا كوردستانێ‌، خەلكێ‌ كوردستانێ‌ خوراگری كر و پێشمەرگەیێ‌ قەرهرەمان داستانێن سەركەفتنێ‌ ل پردێ‌ و عوین عویز و محموودیە و تلسقوف توماركرین و نەهێلا دۆژمن پێشڤە بهێن".
پ.د.ئیسماعیل بێشكچی راگەهاند:" ل هەلبژارتنێن ئەنجوومەنێ‌ نوونەران پارتی دیموكراتی كوردستان شیا ببیتە پارتا ئێكێ‌ لسەر ئاستێ‌ هەمی عیراقێ‌ و كوردستانێ‌ و ل هەلبژارتنێن پەرلەمانێ‌ كوردستانێ‌ ل 30/9/2018ێ‌ شیا دەستكەفتەكا دیتر ب پرانیا كورسی ب دەنگێن خەلكی دئەنجامێن بەراهێدا بدەستخوڤە بینیت، ئەڤە وێ‌ ئێكێ‌ دگەهینیت چ جارا ڤێ‌ پارتی مساوەمە لسەر مافێن مللەتێ‌ خۆ نەكریە".
بێشكچی زەلالكر:" ل 16ی ئێكتوبەرا 2017ێ‌ كوردستانێ‌ چەندین دەڤەرێن رزگاركری ژ دەستێ‌ تیرۆرستێن داعشێ‌ ژدەستدان ژ ئەنجامێ‌ وێ‌ خیانەتا هاتیەكرن، هەر چەندە سەربەخۆیی مافێ‌ رەوایێ‌ هەر مللەتەكی یە و بنەمایەكا سەرەكییە بۆ چەسپاندنا دیموكراسیەتێ‌، ریفراندۆما سەربەخۆیا كوردستانێ‌ مافەكێ‌ شەرعیێ‌ مللەتێ‌ كورد بوویە و تاكە سەركردەیێ‌ رۆلەكێ‌ مەزن دئەنجامدانا ریفراندۆما سەربەخۆیا كوردستانێ‌ دا هەیی سەرۆك (مەسعود بارزانی) بوویە و ئەڤە جهێ‌ شانازیێ‌ یە".
ئیسماعیل بێشكچی خویاكر:" ل 16ی ئێكتوبەرێ‌، مللەتێ‌ كورد تووشی خیانەتەكا مەزن بوون ژدەستێن نافخۆ و ئەنجیدەێن دەرەكی و سەرەرایی دژایەتیا ل مللەتێ‌ كورد هاتیەكرن، بەلێ‌ كوردستانێ‌ د ریفراندۆمێدا سەركەفتن و بەلگەكا دیرۆكی بدەستخۆ ئێخست".
دوستێ‌ مللەتێ‌ كورد بەحسكر، كێشا مللەتێ‌ كورد نە ئێكگرتن و ئێكرێزیا وانە، ئەگەر ئەڤ كێشە جارەسەر كربایە دا بەری سەد سالا كورد بنە خودان دەولەت و بنیاتەكێ‌ بهێز لسەر ئاستێ‌ جیهانێ‌ دروست كەن، جونكی داعش و حەشدا شەعبی دوو رێكخراوێن هاتینە دروستكرن بۆ دژایەتیا كوردستانێ‌، ژبەر هندێ‌ گرنگە هزرا نەتەوەیی لسەر هزرا تاكە كوردی بهێتە دروستكرن و كار لسەر جارەنڤیسێ‌ مللەتێ‌ كورد بهێتەكرن داكۆ مەترسی لسەر پێگەهێ‌ هەرێما كوردستانێ‌ نەمینیت، دیسان هەر چوار وەلاتێن جیران (ئیران و توركی و سوریا و عیراق) هندی ناكوكی هەبن، دشێن ببنە ئێك ژبۆ ژناڤبرنا كوردستانێ‌، ژبەر هندێ‌ دڤێت كورد ببنە ئێك هەلویست و ئێكرێزیێ‌ پەیدا بكەن دا بگەهنە مافێن خۆیێن دروست".

راگەهاندنا زانكۆیا دهۆك/ هەلز عەلی سەلیم