بۆ پتر رێکخستنا ترافیکێ ل ناڤ کەمپا زانکۆیا دهۆک و ئاسانکرنا هاتنوچوونا قوتابی و مامۆستا و فەرمانبەران، لیژنا رێکخستنا ترافیکا کەمپا زانکۆیێ ب هەڤکاری دگەل رێڤەبەریا پولیسێن دهۆکێ و رێڤەبەرییا پۆلیسێن هاتنوچوونا دهۆکێ پلانەکا نوی بۆ کێمکرنا قەربالغێ کەمپا زانکۆیێ دانا، کو ئێدی راوەستاندنا ترومبێلا ل جۆتسایدێ سەرەکیێ کەمپا زانکۆیێ قەدەغەیە و هەر شۆفێرەکێ سەرپێچیا ڤێ بریارێ بکەت، لدویڤ یاسایێن هاتنوچوونێ دێ هێتە سزادان.
د. دلشاد عبدالجبار راگرێ کولیژا پلاندانانێ و ئەندامێ لیژنا رێکخستنا ترافیکێ ل ناڤ کەمپا زانکۆیێ دیار کر کو لڤێ قوناغێ هیچ ترومبێلەکێ قەدەغە ناکەین بهێتە ناڤ کەمپا زانکۆیێ، نە یێن تەکسی و نە ژی یێن تایبەتێن فەرمانبەر و قوتابیان، تا جهێن تایبەت لدەرڤەی کەمپا زانکۆیێ، یان ل دەوروبەرا بۆ دهێنە دەستنیشانکرن.
هەروەسا د. دلشاد عبدالجبار راسپاردەک ئاراستەی شۆفێرا کر کو ترۆمبێلێن خۆ ببەنە گەراجێن راوەستاندنا ترومبێلا ل کولیژان و وان گەراجێن لپشت کولیژێن زانکۆیا دهۆک هەین.
ژ لایێ خۆ ڤە رێڤەبەرێ پولیسێن کەمپا زانکۆیێ، موقەددم پێشکەت عزەت دیارکر کو ب هەڤکاری دگەل رێڤەبەرییا هاتنوچوونا دهۆکێ، لڤێ قوناغێ ئێدی دێ تیمەکا گەرۆک و خوجهـ یا پولیسێن هاتنوچوونێ ل ناڤ کەمپا زانکۆیێ هەبیت بۆ دویڤچوونا وان شوفێرێن ترومبێلێن خۆ لسەر جاددێن سەرەکی رادوەستینن.