زانکۆیێن دهۆک و واست رێکەڤتننامەکا لێکتێگەهشتنێ ئیمزاکر
Sept. 25, 2022, 9:13 a.m.

ئەڤرۆ رێکەڤتی ٢٢ی ئیلوونا ٢٠٢٢ـێ و ل سەرۆکاتیا زانکۆیا دهۆک، د. داود سلێمان ئەتروشی سەرۆکێ زانکۆیا دهۆک و د. مازن حەسەن جاسم ئەلحەسەن سەرۆکێ زانکۆیا واست رێکەڤتننامەکا لێکتێگەهشتنێ ئیمزاکر.

د کۆمبوونەکێ دا و ب ئامادەبوونا د. ئەحمەد محەمەد سالح و د. لوقمان هادی حەسەن هاریکارێن سەرۆکێ زانکۆیا دهۆک و د. مزگین محەمەد حەسەن راگرێ کولیژا زانستێن مرۆڤایەتی و د. ژیار سەدیق سەرۆکا پشکا شینواران ل کولیژا ناڤبری، دگەل مەحموود حەموود راگرێ کولیژا پەروەردێ ل زانکۆیا واست، دانوستاندن لدۆر دەلیڤێن هەڤکاری و هەماهەنگیێ د ناڤبەرا زانکۆیا دهۆک و زانکۆیا واست هاتنە کرن.

د کۆمبوونێ دا سەرۆکێ زانکۆیا دهۆک باس ل وێ یەکێ کر کو زانکۆیا دهۆک مالا هەمی پێکهاتەیانە و هەمی رۆلێ خۆ تێدا دبینن، هەروەسا خویاکر "زانکۆیا دهۆک د بوارێ پەیوەندیان دا د ئاستێن هەرە بلند دایە و ئەم بەرهەڤین پەیوەندیێن خۆ دگەل زانکۆیێن دی یێن عیراقی پتر بهێزبێخین و فراوانتر لێبکەین".

ژ لایێ خۆ ڤە سەرۆکێ زانکۆیا واست خۆشحالیا خۆ ب پێشوازیا زانکۆیا دهۆک ل شاندێ وان دەربڕی و خویاکر "زانکۆیا دهۆک زانکۆیەکا مەزن و ناڤدارە، ئەم شانازیێ دبەین ب ئیمزاکرنا ڤێ رێکەڤتنێ و هەروەسا مە بەری نوکە کارێن سەرکەڤتی ب هەماهەنگی دگەل زانکۆیا دهۆک ئەنجامداینە".

ل دویماهیێ و د رێورەسمەکی دا، رێکەڤتننامەکا لێکتێگەهشتنێ د ناڤبەرا هەردوو زانکۆیان دا ژ لایێ سەرۆکێ زانکۆیا دهۆک و سەرۆکێ زانکۆیا واست ڤە هاتە ئیمزاکرن، کو ئەڤ رێکەڤتننامە چەندین بواران بخۆڤە دگریت.