شاندەكێ هەرێما بادن ڤورتمبێرگ یا ئەلمانی كو پێك هاتبوو ژ تیریزا باوەر وەزیرا ڤەكۆلینێن زانستی و هونەری و هەروەسا تیریزا شوپر وەزیرا دەولەتێ دگەل دوو پەرلەمانتارێن هەمان هەرێم دگەل قونسلا گشتی یا ئەلمانیا ل هەرێما كوردستانێ ل رۆژا 17/4/2019 سەرەدانا پەیمانگەها چارەسەریا دەروونی و چارەسەریا تراومایێ ل زانكۆیا دهۆك كرن و ژلایێ سەرۆكێ زانكۆیا دهۆك پ. د. مصلح دهۆكی و هژمارەكا مامۆستایێن زانكۆیا دهۆك پێشوازی لێ هاتە كرن.
مەرەما سەرەدانا ڤی شاندی بۆ زانكۆیا دهۆك بۆ ژ نێزیك ئاگەهدار بوون بوو ل دۆر وی پرۆژێ ئەكادیمی ئەوێ زانكۆیا دهۆك ب هەڤكاری ل گەل زانكۆیا تـوبیگـن ل هەرێما بادن ڤـورتـمبێرگ یا ئەلمانی بۆ خاندنا ماستەرێ ل بسپۆریا چارەسەریا دەروونی و چارەسەریا تراومایێ ئەوێ ل سالا 2016 دەست پێ هاتیە كرن.
سەرۆكێ زانكۆیا دهۆك پ. د. مصلح دهۆكی بۆ شاندێ ئەلمانی پێشنیار كر كو ئەڤ پەیمانگەهە بهێتە پێشخستن و ببیتە كۆلیژا چارەسەریا دەروونی و چارەسەریا تراومایێ و بەرسڤا وان ژی د ڤی بیاڤی دا یا ئەرێنی بوو، چونكو ئەڤ پەیمانگەهە ب هاریكاریا وان هاتیە ڤەكرن.
پشتی خاندنا پەیڤان ژ لایێ سەرۆكێ زانكۆیێ و هەروەسا ژلایێ شاندێ ئەلمانی گوهداریا پێشنیارێن قوتابیێن ڤێ پەیمانگێ كرن و تیریزا باوەر وەزیرا ڤەكۆلینێن زانستی و هونەری چەند پسیار ئاراستەی قوتابیان كرن ب تایبەتی ل دۆر مفا وەرگرتنا وان ژ ڤێ پەیمانگەهێ و مفا وەرگرتن ژ سەربۆرا ئەلمانی د ڤی بیاڤی دا، هەروەسا گرنگیا ڤی پرۆژی ژی بەحس كر و پشتەڤانیا خۆ ژی بۆ دیاركر.