راگەهاندنا زانکۆیا دهۆک؛ ١٨ ـی چریا دووێ ٢٠٢٢

ب ئامادەبوونا سەرۆکێ هەرێما کوردستانێ و سەرۆکێ حکومەتا هەرێما کوردستانێ، و ل رێورەسمێن ڤەکرنا پەیمانگەها داهێنان و نویگەریێ KII ل ١٤ـی چریا دووێ ٢٠٢٢ و ل هەولێرا پایتەخت، د. داود سلێمان ئەتروشی سەرۆکێ زانکۆیا دهۆک پشکداری دیبەیتەکێ ل دۆر چەوانیا پێشڤەبرنا داهێنانێ و بلندکرنا کوالتیا دەرچوویێن زانکۆیان و دروستکرنا شیان و کارامەییا بوو.

ل دەستپێکا رێورەسمێن ڤەکرنا پەیمانگەها داهێنان و نویگەریێ KII، سەرۆکێ حکومەتا هەرێما کوردستانێ مەسرور بارزانی راگەهاند "ئێک ژ ئارمانجێن من یێن سەرەکی پەیداکرنا رێک و دەرفەتێ بوو ل هەمبەر بەهرە و شیانێن وەلاتیان، ب تایبەتی گەنجان. ئەو پەیمانگەها ئەڤرۆ دهێتە ڤەکرن دێ جهەک بیت ژیانێ ب هزر و بیرۆکەیان ببەخشیت و داهێنان تێدا پێشڤەچوونێ بخۆڤە ببینیت، زانست و زانین دێ گەشەکەت و داهێنان ژی دێ هێتە پاداشتکرن.KII دێ بیتە ناڤەندەک کو هەر ژ مێژە ئارمانجا مەیە ببیتە نشتیمانەک بۆ زانست و زانینێ و هەروەسا باشترین دەرفەتێ بۆ کەسێن زیرەک و خودان شیان پەیدابکەت. پەیمانگەها KII پێشوازیێ ل هەر کەسەکی دکەت کو دڤێت داهێنانێ بکەت. ئەم شانازیێ ب هەر داهێنەرەکی دکەین د ناڤ رەڤەندا کورد دا ل جیهانێ، هیڤیدارم کۆچکرنا داهێنەر و بەهرەیان ب هەر ئەگەرەکێ بۆ ژ دەرڤەی وەلاتی ب دویماهیک بهێت. ئەم هەمی پێکڤە ب رێکا ئەڤێ پەیمانگەهێ خزمەتا گەل و وەلاتێ خۆ بکەین".

هەروەسا نێچیرڤان بارزانی سەرۆکێ هەرێما کوردستانێ د گۆتارا خۆ دا د رێورەسمێن ڤەکرنا پەیمانگەها داهێنان و نویگەریێدا راگەهاند: "گەلەکێ کەیفخۆشم ئەڤرۆ بەشدارم د ڤەکرنا پەیمانگەها داهێنان و نویگەریا کوردستانێ دا، ژبەرکو ئێک ژ دامەزراوێن گەلەک گرنگ و پێدڤیە بۆ هەرێما کوردستانێ".

هەر د درێژیا گۆتارا خۆ دا، سەرۆکێ هەرێما کوردستانێ دیارکر "هەڤکاری و پشتگیریا هەڤپشکا حکومەتا هەرێما کوردستانێ و کەرتێ تایبەت و زانکۆیان د ئەڤێ دامەزراوێ دا گرنگە بۆ سەرئێخستنا ئەرکێ ئەڤێ پەیمانگەهێ د گرنگیپێدانا داهێنان و نویگەریێ دا".

ل دویماهیێ ژی نێچیرڤان بارزانی گۆت "گەنجێن کوردستانێ، ب تایبەتی هەر کەسێ کو خودان داهێنان و هزرێن نوی یە د هەر بوارەکی دا، بۆ بدەستڤەئینانا پشتگیریێ و سەرئێخستنا هزر و داهێنانا خۆ دشێن سەرەدانا ئەڤێ پەمانگەهێ بکەن و پشتبەستنێ ب ڤێ پەیمانگەهێ بکەن".

سەرۆکێ زانکۆیا دهۆک د. داود سلێمان ئەتروشی، د ئێکەم پانێلێ ڤەکرنا پەیمانگەها داهێنان و نویگەریا کوردستانێ دا وەکو پانێلیست پشکداربوو و تێدا راگەهاند "بێگومان ڤەکرنا پەیمانگەها KII بۆ قوتابی و گەنجێن وەلاتێ مە نووچەکێ گەلەکێ خۆشە، ژبەرکو دێ دەرفەتێ دەتە گەنج و قوتابیێن مە کو هزر و بیرۆکەیێن خۆ تێست بکەن و پێشڤەببەن، هەروەسا پەیمانگەها KII دشێت ببیتە پرەک د ناڤبەرا کەرتێ گشتی و تایبەت دا و دگەل زانکۆیێن هەرێما کوردستانێ و وان پێدڤیێن کۆمپانیان ئەوێن دڤێن بەرهەمێن خۆ پێشبێخن یان دڤێن بیرۆکەیێن خۆ نوی بکەن، ئەوان بیرۆکەیان بیننە زانکۆیان و ل زانکۆیان ڤەکۆلینێ ل سەر بکەن. ژبەرکو ڤەکۆلەرێن زانستی ل زانکۆیانن، ئەڤ چەندەژی دێ بیتە هەماهنگیەکا باش د ناڤبەرا زانکۆیێن کوردستانێ و پەیمانگەها KII دا بۆ پێشێخستنا وان بیرۆکەیان".

ئێک ژ داخوازکریێن رێورەسمێن ڤەکرنا پەیمانگەها داهێنان و نویگەریێ، داهێنەرێ کورد و قوتابیێ زانکۆیا دهۆک، ئەلند ئەمیر تاها بوو، ئەلند وەکو وەرگرێ باوەرناما داهێنانێ ژ حکومەتا عیراقێ و قوتابیا پشکا کیمیایێ ل کولیژا زانست یا زانکۆیا دهۆک راگەهاند "ب هەبوونا ئەڤێ پەیمانگەهێ ئێدی داهێنەرێن کورد دێ بنە خودان پشتەڤان و زێدەتر دێ کارکەین بۆ ئەنجامدانا داهێنانێن باشتر و مەزنتر. ئەز وەکو داهێنەرەک ل زانکۆیا دهۆک دبێژم: هەبوونا ڤێ پەیمانگەهێ خەونا من بوو".

هەژی ئاماژێ یە مەسرور بارزانی سەرۆکێ حکومەتا هەرێما کوردستانێ، سەرۆکێ بۆردێ برێڤەبرنا پەیمانگەها داهێنان و نوگەریا کوردستانێ یە، چەندین کۆمپانیێن مەزنێن کوردستانێ وەکو؛ کار گرۆپ ،قەیوان گرۆپ، زانکۆ و ناڤەندێن ئەکادیمیێن کوردستانێ د رێڤەبرنا ئەڤێ پەیمانگەهێ پشکدارن.