ل رێکەڤتی 9/11/2022 ماستەرناما قوتابیا خواندنا بلند ل پشكا مێژوو ل كۆلیژا زانستێن مرۆڤایەتی ل زانكۆیا دهۆك، شرین عمر موسا، ل ژێر ناڤونیشانێ (رۆژناما پەیمان و پێشهاتێن سیاسی ل هەرێما كوردستانێ - عیراق 1994 - 2003) هاتە گەنگەشە كرن.
ل دەستپێكا ڤێ ڤەكۆلینێ ئاماژە ب وێ چەندێ هاتیە كرن، رۆژناما پەیمان ئێك ژ گرنگترین رۆژنامان بوو ل وی سەردەمی، كو ژلایێ زۆریا هژمارێن وێ و ب دیالێكتا كرمانجی دەركەڤتی، رۆلەكێ مەزن گێرایە بەرامبەر پێشهاتێن سیاسی ل هەرێما كوردستانێ ل وێ قۆناغا دیرۆكی ژ دیرۆكا كوردستانێ یا هەڤچەرخ، كو ئارمانج ژ هەلبژارتنا ڤی بابەتی وەكو د ڤەكۆلینێ دا هاتی "رۆنكرنا لایەنەكێ گرنگە ژ دیرۆكا رۆژنامەگەریا كوردی ل هەرێما كوردستانێ، و دیاركرنا هەلویستێ رۆژناما پەیمان ژ پێشهاتێن سیاسی، و ئەو رویدانێن ل ڤێ قۆناغا گەلەك هەستیار ژ دیرۆكا كوردستانێ یا هەڤچەرخ پەیدابووین"، كو پەیمان ئێكەمین رۆژنامە بوو ل دەڤەرا بەهدینان دەركەڤتی و بۆ ماوێ نەهـ سالان بەردەوامی ب كارێ خۆ دای، ل دویڤ گۆتنا ڤەكۆلەری.
ئەو ئەنجامێن ڤەكۆلەر د ڤێ ڤەكۆلینێ دا گەهشتیێ ئەو بوون، كو رۆژناما پەیمان رۆژنامەكا حزبی بوو، بەهرا پتر یا بابەتێن خۆ ژ رۆژنامێن دیتر یێن (پ.د.ك.) یێن سەرەكی وەكو (خەبات و برایەتی) وەردگرتن، و رۆژناما پەیمان یا ناڤخۆیی بوو، و پتریا گرێدایی پارێزگەها دهۆكێ بوو ب هەڤبەركرن دگەل یێن دی، و گرنگیدانا وێ ب بابەتێن دەرڤەی پارێزگەها دهۆكێ یا كێم بوو. هەروەسا رۆژناما پەیمان رۆلێ خۆ د هەلبژارتنێن باژێرڤانیان دا گێرابوو، ژمارە نەبوو، باس لێ نەكری د ماوێ هەلبژارتنان دا. دیسا ڤەكۆلەری دیاركریە كو رۆژناما پەیمان یا كەمترخەم بوو د ڤەگوهاستنا رویدانێن چالاكیێن ئۆپۆزسیۆنا عیراقی و كوردی بۆ گوهورینا رژێما عیراقێ.
ئەڤ ڤەكۆلینە ب سەرپەرشتیا د. نازم یونس عوسمان بوو ژ زانكۆیا دهۆك، و لژنا گەنگەشێ ژی ب سەرۆكاتیا د. هۆگر تاهر تەوفیق بوو ژ زانكۆیا زاخۆ، و هەر ئێك ژ د. مەهدی محەمەد قادر ژ زانكۆیا سەلاحەدین و د. خەلیل مستەفا عوسمان ژ زانكۆیا دهۆك ئەندام بوون د لژنا گەنگەشێ دا، و پشتی گەنگەشەكا زانستی ل سەر ڤێ ڤەكۆلینێ هاتیەكرن، بریار ب بەخشینا باوەرناما ماستەرێ ب ڤەكۆلەری هاتە دان.