بۆ پتر هەڤکاریێ د پرۆسێسا ئەکادیمی دا و ئارمانجێن پەروەردەیی و زانستیێن هەڤپشک، زانکۆیا دهۆک و زانکۆیا ئەمریکی یا کوردستانێ، رێککەڤتنامەکا تێکگەهشتنێ لدۆر کارێ هەڤپشک ئیمزاکر. رێورەسمێن ئیمزاکرنێ ئەڤرۆ رێکەڤتی ٢٠٢٢/٣/٩ و د کۆمبوونەکێ دا ل بارەگایێ زانکۆیا ئەمریکی یا کوردستانێ و ب ئامادەبوونا د. داوود ئەترووشی، سەرۆکێ زانکۆیا دهۆک و د. راندل رۆدس، سەرۆکێ زانکۆیا ئەمریکی یا کوردستانێ و د. رەند حەموودی، رێڤەبەرا پەیوەندیا ل زانکۆیا دهۆک و د. نزار نوعمان، هاریکارێ سەرۆکێ زانکۆیا ئەمریکی بۆ کاروبارێن زانستی برێڤەچوون.
د ڤێ کۆمبوونێ دا، د. داوود ئەترووشی دیارکر "زانکۆیا دهۆک رۆلێ سەرەکی گێرایە بۆ دابینکرنا ستافێ ئەکادیمی بۆ هەمی زانکۆیێن پارێزگەها دهۆکێ، زانکۆیا ئەمریکی یا کوردستانێ ژی هەڤپشکەکا نێزیکە و مە گەلەک ئارمانجێن هەڤپشک هەنە، گرنگە مە هەماهەنگی و هەڤگونجان د بوارێن جودا دا هەبیت، وەکو مفاوەرگرتن ژ ستافێ ئەکادیمی و پەرتووکخانە و ژێرخانەیان".
ژ لایێ خۆ ڤە د. راندل رۆدس راگەهاند "ئەم خۆشحالین ب هەڤکاریێ دگەل زانکۆیا دهۆک پێخەمەت پێشکێشکرنا باشترین خزمەتێن زانستی و پەروەردەیی بۆ قوتابیێن پارێزگەها دهۆکێ، وەکو فێربوونا قوتابیان، پێشڤەچوونا کولیژان و پێنگاڤێن دی یێن گرێدای ئارمانجێن مە یێن هەڤپشک".
ژ لایێ خۆ ڤە د. نزار نوعمان ئاماژە ب رۆل و گرنگیا زانکۆیا دهۆک دا و گۆت: "زانکۆیا دهۆک کۆگەکا کەسێن کارامە و خودان شیان و شارەزاییە ل دهۆکێ".
هەژی ئاماژێ یە زانکۆیا دهۆک پلانەکا پتر هەماهەنگیێ د گەل سازیێن ئەکادیمی، حکوومی، تایبەت و نەحکوومی هەیە، بۆ پتر بجهئینانا کار و پێرابوونێن زانستی و ئەکادیمیێن گرنگ د جڤاکی دا.