وەزیرێ خواندنا بلند و ڤەكۆلینێن زانستی ل حكومەتا هەرێما كوردستانێ د. ئارام محەمەد قادر ل رۆژا 26/8/2019 سەرەدانا زانكۆیا دهۆك كر و دكۆمبوونەكی دا دگەل جڤاتا زانكۆیا دهۆك بەحسێ چەند بابەتێن گرێدایی پرۆسا خواندنێ و كارناما نوی یا وەزارەتێ كرن.
د كۆمبوونێ دا كو سەرۆكێ زانكۆیا دهۆك پ. د. مصلح دهۆكی و چەند شیرەتكار و رێڤەبەرێن گشتی یێن وەزارەتێ و هاریكارێن سەرۆكێ زانكۆیێ و راگرێن كۆلیژێن زانكۆیا دهۆك د بەرهەڤ بوون، د. ئارام محمد قادر د پەیڤەكی دا گۆت دهۆك د مێژویا گەلێ مە دا خودان قوربانی و بەرخودانە و د بەرامبەر ڤێ خەباتا زۆر بەرپرسیاری دكەڤیتە سەر ستویێ مە كو كاربكەین بۆ گەشەپێدانا زانكۆیا دهۆك وەكو سازیەكا ئەكادیمی و ستراتیژی بۆ بەرەبابێن داهاتی.
سەرۆكێ زانكۆیا دهۆك پ. د. مصلح دهۆكی د پەیڤەكی دا ب ناڤێ جڤاتا زانكۆیێ و مامۆستا و قوتابیێن زانكۆی دهۆك، ب خێرهاتنا وەزیرێ خواندنا بلند و ستافێ وەزارەتێ كرد، هەروەسا بكورتی بەحسێ زانكۆیا دهۆك و مێژوویا دامەزراندنا وێ و هژمارا كۆلێژ و پشكێن زانستی كر و گۆت زانكۆیا دهۆك ژ 18 كۆلیژان پێكهاتیە وپتر ژ 22 هزار قوتابیان یێن هەین، هەروەسا ئاماژە دا پرۆژێن زانكۆیا دهۆك ب تایبەتی پرۆژێن هەڤپشكێن نێڤدەولەتی وەكو ئیراسمۆس و دیاركر كو ل دوو پشكێن زانستی باوەرنامە دناڤبەرا زانكۆیا دهۆك و زانكۆیێن دەرڤە دهێنە دان.
د. ئارام محەمەد قادر وەزیرێ خواندنا بلند و ڤەكۆلینێن زانستی هەروەسا خوشحالیا خۆ نیشادا ب كۆمبوونا دگەل جڤاتا زانكۆیا دهۆك و رۆلێ سەرۆكێ زانكۆیێ بۆ پێشخستنا زانكۆیێ بلند نرخاند و گۆت هەر ژ دەستپێكا دامەزراندنا زانكۆیا دهۆك ل سالا 1992 و هەتا نوكە گەلەكن ئەو كەس و لایەنێن كو رۆل د گەشەپێدان و سەرخستنا زانكۆیێ دا دیتی و ئاماژە دا وێ چەندێ ژی كو دڤێت ئەم هەمی پێكڤە درێژەپێدەر و هاریكار بین بۆ پێشخستنا سێكتەرێ خواندنا بلند ل هەرێما كوردستانێ، بەرهەڤیا وەزارەتێ ژی نیشادا كو ژ هەمی رویەكی ڤە دهاریكاربن بۆ هەر پرۆژە و بەرنامەكی كو ئارمانج ژێ پێشخستن و بلندكرنا ئاستێ زانستی بیت.
وەزیرێ خواندنا بلند هەروەسا ئاماژە دا پشتەڤانیا سەرۆكاتیا جڤاتا وەزیران و سەرۆكێ حكومەتێ بەرێز مەسرو بارزانی بۆ تێگەهشتن و گرنگی پێدانا وان ب سێكتەرێ خواندنا بلند ل كوردستانێ و دڤی چارچووڤەی دا گۆت ئەڤ تێگەهشتنە بۆ گەشەپێدان و پێشخستنا كارێن مە دێ پشتەڤانیەكا باش بیت و ئەم ژی ب رێكا شیرەتكار و مامۆستایێن شارەزا و ئەكادیمیان دێ شێین ریفورما راستەقینە ل خواندنا بلند ل كوردستانێ ئەنجام دەین.
د پشكەكا دی یا كۆمبوونێ دا هەر ئێك ژ سەرۆكێ زانكۆیێ و هاریكارێن سەرۆكی و شیرەتكار و رێڤەبەرێن گشتی یێن وەزارەتێ و راگرێن كۆلیژێن زانكۆیا دهۆك بۆچوون و پێشنیازێن خۆ ل دۆر كاروبارێن گرێدایی زانكۆیێ و بیاڤێ كاركرنا وان دیاركرن