سەنتەرێ رەوشەنبیری و جڤاكی یێ زانكۆیا دهۆك ل روژا 7/4/2016 دیبەیتەك ل دۆر (پێشمەرگە د دیتنا ئاینان دا) ب ئامادەبوونا مامۆستایێن ئاینی و مامۆستایێن زانكۆیێ و چەند ئەكادیمیان ئەنجام دا.
ئەڤ دیبەیتە كو ب چاڤدێریا سەرۆكێ زانكۆیا دهۆك پرۆفیسۆر د. مسلح دهوكی بوو، د پەیڤەكی دا گۆت پێشمەرگە پشكەكا مەزنە ژ دیرووكا مللەتێ كورد و نوكە شیایە ناڤێ خۆ ل ناڤ سەنتەر و دەزگەهێن میدیایی یێن جیهانی پەیدا بكەت، كو د ماوێ چووی دا شیا گەلەك دەڤەرێن كوردستانی ژ دەستێ داعش رزگار بكەت و دوپات كەت كو هێزەكا مەزن و خودان شیانە و دشیچت هەردەم بەرەڤانیێ ژ ئاخا كوردستانێ بكەت.
د پەنەلێ ئێكێ دا مامۆستا رێنجبەر جەمیل بەحسێ شەرعیەتا یاسای و دستوری یا پێشمەرگەی كر و دیاركر كو ل دستورێ نوكە یێ عیراقێ ئەوێ ل سالا 2005 هاتیە دەرێخستن كورد شیان ناڤێ پێشمەرگەی د وی دەستوری دا چەسپینن و ئەڤە ژی دەستكەفتەكە بۆ هەرێما كوردستانێ، هەروەسا بەحسێ چەند وان یاسایا ژی كر ئەوێن گرێدایی هێزێن پێشمەرگەی.
د پەنەلێ دویێ دا مامۆستا كەریم گویا یەعقوب بەحسێ دیتنا ئاینێ مەسیحیەتێ كر ل هەمبەر بەرەڤانی ژ خو كرنێ و ئەو رولێ نوكە پێشمەرگە پێ رادبیت.
هەروەسا د پەنەلێ سیێ دا مامۆستا مام خواجەی بەحسێ رۆلێ پێشمەرگەی كر ب دیتنا ئاینێ ئێزدیان و چەند سەبەقە و قەول ژی ل سەر گۆتنێن خو ئینان و دیاركر كو ئەوا نوكە پێشمەرگە دكەت شەرەفەكا مەزنە بو كودان چونكو رولەكێ مەزن دگێریت د بەرەڤانی كرنێ دا ژ ئاخا كوردستانێ.
د پەنەلێ دیماهیێ دا ژی مامۆستا مەلا ئەنەس محەمەد شەریف بەحسێ دیتنا ئاینێ ئیسلامێ كر بو بابەتێ بەرەڤانی ژ خو كرنێ و گوت ئەوا نوكە پێشمەرگە دكەت جیهادە ل هەمبەر ئەو كەسێن زورداریێ دكەنە سەر ئاخا كوردستانێ كو داعشن، ل دیماهیا ڤان پەنەلان ژی گەنگەشە ل سەر ڤان بابەتان هاتنە كرن و راسپارد هاتنە نڤیسین بۆ جهێن پەیوەندی دا.