ئەڤرۆ رێکەڤتی ١٦/٥/٢٠٢٢ و ب ئامادەبوونا د. داود سلێمان ئەتروشی سەرۆکێ زانکۆیا دهۆک و هاریکارێن سەرۆکێ زانکۆیێ و نوینەرێن سازیێن جودایێن پارێزگەهێ، كولیژا پەروەردا جەستەیی و زانستێن وەرزشی ل زانكۆیا دهۆك لژێر درویشمێ (دیدەڤان د خزمەتا جڤاكی دا) خیڤەتگەها دیدەڤانی یا چواردێ بۆ قوتابیێن قووناغا ئێكێ ڤەکر.
راگرێ كولیژا پەروەردا جەستەیی و زانستێن وەرزشی ل زانكۆیا دهۆك د. ئەحمەد قاسم د پەیڤەكێ دا دیاركر کو ئارمانجا كولیژێ پەروەردەكرن و ئاڤاكرنا كەسایەتیەكا باشە دناڤا جڤاكی دا، گۆت ژی "ئەڤ خیڤەتگەها دیدەڤانی بۆ قوتابیێن قووناغا ئێكێ یە بۆ ماوێ سێ رۆژان، كو ١٠٠ قوتابیێن قووناغا ئێكێ و ٤٠ مامۆستا تێدا پشكدارن، زانكۆیا دهۆك ئێكەمین زانكۆیە ل سەرانسەری كوردستانێ ڤان جۆرە خیڤەتگەهان بۆ قوتابیان ڤەدكەت".
د. ئەحمەد قاسم ئەو ژی گۆت "دماوێ ١٧ سالان دا ئەڤە خیڤەتگەها ١٤ێ یە دهێتە ڤەكرن، كو ژ هەشت گرۆپان دگەل هەشت خیڤەتگەهان پێكدهێت، تێدا پێشانگەهەكا كارێن دەستی ژی ژ لایێ قوتابیان ڤە هاتیە ڤەكرن".
خیڤەتگەهـ هەر ل ناڤا گورەپانێن كولیژێ دهێتە ڤەكرن و تێدا چەند چالاكی دهێنە ئەنجامدان، ئێك ژ وان، ل رۆژا دووێ دێ ب رێپیڤان چنە پاركا تەحسین تەهای، کو ل وێرێ دێ چەند چالاكیێن دیدەڤانی ئەنجامدەن.