زانكۆیا دهۆك ل دویف بریارا جڤاتا وەزیران و خواندا بلند و ڤەكۆلینێن زانستی ل حكوومەتا هەرێما كوردستانێ ل دۆر كێم كرنا هژمارا رێڤەبەری و پشكێن كارگێری ل زانكۆیێ و كێم كرنا خەرجیان وەك چارەسەریەك بۆ قەیرانا دارایی كو پشكەكە ژ پرۆسا چاكسازیێ یا حكومەتا هەرێما كوردستانێ.
ل دۆر ڤی بابەتی هاریكارێ سەرۆكێ زانكۆیا دهۆك بۆ كاروبارێن كارگێری و دارایی (د. جەمال عەلی حەسەن) دیاركر كو زانكۆیا دهۆك لژنەكا تایبەت پێك ئینا ب سەرۆكاتیا (د. جەمال عەلی حەسەن) ژ بۆ پێداچوونێ ل سەر پەیكەرێ كارگێری یێ زانكۆیا دهۆك، و ل رۆژا 28/3/2016 لژنا پێداچوونێ ئەڤ پەیكەرێ بیشنیاركری بۆ وەزارەتا خواندنا بلند و ڤەكۆلینێن زانستی هنارت بۆ پەسەند كرنا وێ ژ لایێ هەردو وەزارەتین (خواندا بلند و ڤەكۆلینێن زانستی و وەزارەتا دارایی و ئابوری).
د. جەمال عەلی حەسەن ئەو ژی دیاركر كو د ڤێ گوهورینێ دا نێزیكی 14 رێڤەبەریا هاتنە لێكدان و هەلوەشاندن كو دبیتە نێزیكی 40% ژ كێمكرنا هژمارا رێڤەبەریان ل سەرۆكاتیا زانكۆیا دهۆك، هەروەسا گۆت ژی 25 پشكێن كارگێری یێن ب سەر رێڤەبەریێن سەرۆكاتیا زانكۆیا دهۆك كو دبنە نێزیكی 30% ژ هژمارا پشكێن كارگێری هاتنە كێم كرن.
سەرۆكێ لژنا پێداچوونێ ل پەیكەرێ كارگێری یێ زانكۆیا دهۆك هەروەسا دیاركر كو ل هەر كۆلیژەكا زانكۆیا دهۆك پێنج پشكێن كارگێری هاتنە هەلوەشاندن و ئەو پشكێن مایی ژی هاتنە گوهورین بۆ (هوبە).
د. جەمال عەلی حەسەن ئەو چەند ژی ئاشكرا كر كو ب ڤێ رێكێ دێ شێن خەرجیێن زانكۆیێ كێم كەن، كو ئەڤە قوناغا ئێكێ یە یا چاكسازیان، هەروەسا گۆت لژنا پێداچوونێ پشتی ئەڤ پەیكەرە بهێتە پەسەند كرن دێ دووبارە پێداچوونێ ل سەر پەیكەری كەن بۆ پتر كێم كرنا رێڤەبەری و پشك و هوبێن كارگێری ل زانكۆیێ.