ب هەلكەفتا بۆرینا 25 سالان ل سەر دامەزراندنێ، زانكۆیا دهۆك ڤیستەڤالا یوبیلا زیڤی ل سەر ئاستێ هەمی كۆلیژ و سەنتەرێن زانكۆیێ ب چالاكیێن جودا جودا بۆ هەرسێ رۆژێن 24، 25، 26 ی نیسانێ گێرا.
رێورەسمێن ڤەكرنا ڤیستەڤالێ ل ناڤەندا قوتابیان ل كەمپێ زانكۆیێ هاتنە دەست پێ كرن، سەرۆكێ زانكۆیا دهۆك پ. د. مصلح دهۆكی د پەیڤەكی دا گۆت دڤان 25 سالان دا زانكۆیا دهۆك خزمەتەكا مەزنا ل دەڤەرێ یا كری، چ ژلایێ زانستی و ئەكادیمی ڤە، چ ژی ژلایێ رەوشەنبیری و پێگەهاندنا جڤاكی ڤە، كو ڤێ چەندێ ئەم هەردەم ب دەستكەفتەكێ مەزنێ زانكۆیا دهۆك دزانین، ئاماژە دا وێ چەندێ ژی كو سەرەرایی قەیرانا دارایی و شەرێ تیرۆرستێن داعش زانكۆیا دهۆك بۆ ئێك رۆژ ژی دەوام نە راوەستاندیە، بەروڤاژی پتر هزر دڤەكرنا هندەك سەنتەر و پشكێن زانستی یێن دیتر دا كریە و پەیوەندیێن خۆ یێن زانستی دگەل زانكۆ و ناڤەندێن ئەكادیمی یێن جیهانی بەرفرەهتر لێ كرینە.
پ. د. مصلح دهۆكی هەروەسا د پەیڤا خودا ئاماژە دا كارەساتەكا دلتەزین كو رژێما عیراقێ ل 24/4 ل سالا 1974 ب دوو فروكێن جەنگی زانكۆیا سلێمانیێ ل قەلادزێ تۆپ باران كری، گۆت كو قوتابی و مامۆستایا چ گونەها خۆ هەیە وەلاتەك ب دژی زانكۆیێن خۆ فروكا ببەتە سەر قوتابی و مامۆستا، گۆنەها وان بتنێ هەلگرێن مەشخەلا زانستی بوون و وەلاتیێن كورد بوون بەلێ تاوانەكە ب دژی زانست و زانینێ و هەمی بەهایێن مرۆڤاتیێ دهێتە كرن، دیار ژی كر كو ل شوینا زانكۆیەكی نوكە ب دەهان زانكۆ مە ل هەرێما كوردستانێ یێن هەین، ژ لایێ پەروەردە و فێركرنێ ڤە پشتی سەرهلدانێ شنی ژێرخانا پەروەردەی یا درست ل هەرێما كوردستانێ هاتە دانان، كو كەرتێ پەروەردە و خواندنا بلند هەردەم جهێ گرنگیا زێدەتر یا حكومەتا هەرێما كوردستانێ بوویە و پویتەكێ مەزن دایە ڤی كەرتی.
پارێزگەرێ دهۆكێ فەرهاد ئەتروشی د پەیڤەكی دا گۆت زانكۆیا دهۆك نموونا خزمەتا حكومەتا هەرێما كوردستانێ یە و گێرانا ڤێ ڤیستەڤالێ ئێك ژ وان خزمەتانە یێن حكومەتا هەرێمێ پێشكێشی خەلكێ دەڤەرێ كری، هەروەسا پەسەنا رۆلێ زانكۆیا دهۆك د بلندكرنا ئاستێ خواندنێ دا كر و بەحسێ بەردەوامیبوونا خواندنێ و بلندكرنا ئاستێ زانستی ل زانكۆیێ كر سەرارایی هەبوونا قەیرانا دارایی شیایین هەمی ئاستەنگان دەرباز بكەت.
د ڤێ ڤیستەڤالێ دا دێ چەندین چالاكیێن جودا جودا ب پشكداریا 18 كۆلیژ و هەمی سەنتەرێن زانكۆیا دهۆك هاتنە كرن هەر ژ چالاكیێن پزیشكی، وەكو پشنینا ددانان، ڤێراگەهشتنێن دەستپێكی، ئامۆژگاری ل دۆر نەخۆشیان، نیشادانا تاقیكرنێن زانستی یێن نوی ل دۆر دەرمانان، شرۆڤەكرن و پشكنینێن راستەوخۆ و نیشادانا ئامیرێن پشكنینان، چالاكیێن زانستی وەكو نیشادانا دیزاینێن قوتابیێن كۆلیژا ئەندازیاری و پرۆژێن دەرچوونێ یێن كۆلیژێن زانست، و پلاندانانا جهەكی، هەوەسا سازكرنا دادگەهێن نموونەی، دیبەیتێن ب زمانێ ئنگلیزی د ناڤبەرا پشكێن زمانێ ئنگلیزی و وەرگێرانێ دا، چالاكیێن چاندنێ و ڤێتێرنەی وەكو نیشادانا جۆرێن داروبارێ دارستانێ، جۆرێن گۆلا و شینكاتی، شیرەتكاری ل دۆر چاندنێ، هەروەسا نیشادانا جۆرێن گۆشتی، شیرەت و چارەسەریا راستەوخۆ یا گیانەوەرێن ل مالان دا دهێنە بخودان كرن، زێدەباری چالاكیێن ئابووری كو ئەو ژی ڤیستەڤالەكا بازاركرنێ بوو ب ئامادەبوونا پتر ژ 60 كۆمپانیێن بازرگانی و فرۆتنا راستەوخۆ یا كەلوپەلان، چالاكیێن كلتووری وەكو نیشادانا كارێن دەستی و جلوبەرگێن نەتەوەی و ئامادەكرنا خارنێن كوردەواری و گۆتنا سترانێن فلكلۆری، چالاكیێن هونەری وەكو پێشكێش كرنا شانۆگەریان ب زمانێن كوردی و ئنگلیزی، نیشادانا تابلۆ و كارێن شێوەكاری و ئاهەنگێن هونەری، زێدەباری گێرانا كۆربەندێ زانستی یێ ئێكێ یێ سەنتەرێ بێشكچی یێ ڤەكۆلینێن مرۆڤایەتی ل زانكۆیا دهۆك و ڤەكرنا چەند پێشانگەهێن پەرتووكان و چالاكیێن وەرزشی.
د ڤان 25 سالێن دەربازبووی دا زانكۆیا دهۆك 22 گەرێن دەرچوونێ هەلگرێن باوەرنامێن بەكالۆریۆسێ د 78 بسپۆریێن جودادا پێشكێشی جڤاكی كرینە، كو هژمارا ڤان دەرچوویان هەر ژ گەرا ئێكێ كو 197 قوتابی بوون و هەتا گەرا 22 دبنە نێزیكی 30 هزار دەرچوویان كو گەلەك ژ ڤان دەرچوویێن زانكۆیا دهۆك هەر ل زانكۆیێ خاندنا ماستەرێ و دكتۆرایێ ژی ب دووماهی ئیناینە و نوكە مامۆستانە ل زانكۆیا دهۆك.
راگەهاندنا زانكۆیا دهۆك: هەلز عەلی سەلیم