سەرۆكێ زانكۆیا دهۆك پرۆفیسۆر د. مسلح دهۆكی ل سەر داخازا ئینستتیۆتا دیرۆك و ئاینێ كوردێن ئێزدی ل مۆسكۆ ئەوا سەر ب ئەكادیمیا زانستی یا روسی ڤە ل رۆژێن 15-16/12/2017 پشكداری ل كۆنفرانسەكێ دا كر ل مۆسكۆ.
پرۆفیسۆر د. مسلح دهۆكی دیاركر كو ئەڤ كۆنفرانسە ل ژێر ناڤێ (دیرۆك و كلتوورا كوردێن ئێزدی) بوو و ژلایێ ئینستتیۆتا دیرۆك و ئاینێ كوردێن ئێزدی ل مۆسكۆ هاتبوو رێكخستن و چەندین كەساتێن ناڤدار و ئەكادیمی یێن كوردێن ئێزدی تێدا د پشكدار بوون، هەروەسا گۆت مە ژی بابەتەك د وی كۆنفرانسی دا ل دۆر دیرۆكا كوردێن ئێزدی پێشكێش كر و تێدا مە بەحسێ وێ چەندێ كر كو ئێزدی كوردێن رەسەنن و هەروەسا مە د بابەتێ خۆ دا بەحسێ رۆلێ زانكۆیا دهۆك ژی كر ل دۆر وەرگرتنا پتر 2500 قوتابیێن كوردێن ئێزدی ئەوێن ئاوارەی دهۆكێ بووین كو هندەك ژ وان هەتا نوكە باوەرنامە ژی یێن وەرگرتین و ژ زانكۆیێ دەرچووین، كو بارەكێ گران بوو بۆ زانكۆیێ بەلێ مە ب ئەركێ خۆ یێ نشتیمانی زانی ڤی كاری بكەین.
سەرۆكێ زانكۆیا دهۆك ئەو ژی دیاركر كو ل گەل بەرێز (یورا داسنی) سەرۆكێ ئینستتیۆتا دیرۆك و ئاینێ كوردێن ئێزدی ل مۆسكۆ رێككەفتینە كو ئەو بهێن سەرەدانا زانكۆیا دهۆك بكەن و ئەم ل گەل وان ب رێكا سەنتەرێ بێشكچی ل زانكۆیا دهۆك ڤەكۆلینێن زانستی یێن هەڤپشك بكەین ل دۆر دیرۆك، ئاین، كلتوورێ كوردێن ئێزدی بهێنە چێكرن وەكو پارچەكا گرنگ ژ مللەتێ كورد، بریارە ل بهارا بهێت سەرەدانا دهۆكێ بكەت بۆ ئەنجامدانا ڤان كارێن هەڤپشك.
ئەو ژی دیاركر كو ژ كوردستانا باشۆر ئەو ب تنێ د ڤی كۆنفرانسی دا یێ پشكدار بوو، كو كۆنفرانسەكێ نەوعی بوو و زانایێن كوردێن ئێزدی ژ هەمی وەلاتانا پشكداری تێدا كربوو.