ب بەرهەفبوونا سەرۆكێ زانكۆیا دهۆك (پ. د. مصلح محەمەد سەعید دهۆكی) و جڤاتا زانكۆیێ دگەل مامۆستایێن كولیژا پلاندانانا جهەكی و زانستێن پراكتیكی ری و رەسمێن ئێكەم خولا دەرچوویێن قۆتابیێن پشكا پلاندانا جهەكی یا ب بەرنامەكێ هەڤپشك دناڤبەرا زانكۆیا دهۆك و زانكۆیا دورتموند یاتەكنیكی یا ئەلمانی پریڤەچوو.
سەرۆكێ زانكۆیا دهۆك (پ. د. مصلح محەمەد سەعید دهۆكی) گۆت: ئەڤرۆ رۆژەكا گرنگە د دیروكا زانكۆیا دهۆك دا، جونكە پەیوەندیێن زانستی یێن زانكۆیا دهۆك چوونە د قووناغەكا دیتر دا، بۆ جارا ئێكێ یە ل هەرێما كوردستانێ و عیراقێ باوەرنامێن هەڤپشك دگەل زانكۆیەكا ئەلمانی بۆ قوتابیان ل زانكۆیا دهۆك دێ ئێنە دان، ئەڤە ژی جهێ شانازیێ یە بۆ هەرێما كوردستانێ ب گشت و زانكۆیا دهۆك ب تایبەت.
سەرۆكێ زانكۆیا دهۆك گۆت ژی: حكومەتا ئەلمانیا كا چاوا پشتەڤان و هاریكارێ پێشمەرگەیێ قەهرەمان بوویە ب پرچەككرن و راهێنانێن سەربازی، هەروەسا ژ لایێ زانست و تەكنەلوژی ڤە ژی پشتەڤانیا زانكۆیێن هەرێمێ كریە، ب تایبەتی زانكۆیا دهۆك كو نوكە مە دوو پشكێن زانستی و پەیمانگەهەك ب هەڤكاری و ب هەڤپشكی ل گەل زانكۆیێن ئەلمانی ڤەكرینە، ئەو ژی (پشكا پەروەردا تایبەت ل كۆلیژا پەروەردا بنیات، پشكا پلاندانانا جهەكی ل كۆلیژا پلاندانانا جهەكی و زانستێن كارەكی، هەروەسا پەیمانگەها چارەسەركرنا دەروونی) و ڤەكرنا ڤێ پەیمانگەهێ و ڤان هەردوو پشكان بۆ جارا ئێكێ یە ل عیراقێ و هەرێما كوردستانێ دئێنە ڤەكرن، ژبلی ڤان ژی ژلایێ پەیوەندی و رێككەفتێن زانستی ڤە زانكۆیا دهۆك پەیوەندیێن باش یێن ل گەل زانكۆیێن ئەلمانی و دەزگەهێن زانستی و ئەكادیمی هەین ب تایبەتی (رێكخراوا داد) كو ژلایێ خو ڤە وێ ژی رۆل هەبوویە د گەلەك چالاكیێن زانستی دا ل زانكۆیا دهۆك كو ڤەكرنا پشكا پلاندانانێ ئێك ژ وان بەرنامان بوویە یێن وێ پشتەڤانی لێ كری.
باوەرنامێن هەڤپشك د ڤی دەمی دا بۆ زانكۆیا دهۆك دەستكەفتەكێ زانستی یێ مەزنە ب تایبەت دگەل زانكۆیەكا ناڤدارا جیهانی وەكو زانكۆیا دۆرتموند یا ئەلمانی وەك (پ. د. مصلح محەمەد سەعید دهۆكی) گۆتی: جونكە ڤێ زانكۆیێ د بیاڤێ تەكنەلوژیاێدا سەربۆرەكا دەولەمەند یا هەی، ئەم وەكو زانكۆیا دهۆك و پشكا پلاندانانێ دێ مفایی ژ ڤێ سەربۆرا وان وەرگرین د بیاڤێ پلاندانانا جهی دا، كو وەلاتێ مە نوكە ژ هەر دەمەكی پتر پێدڤی یا ب ڤێ بسپۆریێ هەی، بۆ پلان كرنا باژێر و جه و دەڤەرێن نوی دهێنە ئاڤاكرن و هەروەسا ئەو دەڤەرێن دوبارە پلان بۆ دهێنە دانان بۆ دوبارە رێكخستن و ڤەژاندنا وان.
ئاڤاكرن و گەشەپێدانان ئەگەر پلانەكا زانستی یا ئەكادیمی دگەل دا بیت دێ ب رەنگەكێ مودرن تر و تازە تر و بلەز تر بەرهەمێ وێ ئاڤەدانیێ جهێ خۆ گریت، كو نوكە گەلەك دەڤەرێن هەرێما كوردستانێ ب تایبەتی ئەو دەڤەرێن شەر لێ پەیدابووی ئەم پێدڤی ب ئاڤەدانكرنا بلەز یا وان دەڤەراینە كو دڤێت ب پلانەكا زانستی یا گشتگیر بهێنە ئاڤاكرن، لەورا ل ڤێرێ گرنگیا پلاندانانا جهی بۆ ڤی وەلاتی دیار دبیت وەك سەرۆكێ زانكۆیا دهۆك گۆتی.
زانكۆیا دهۆك هەردەم زانستی دكەتە د خزمەتا جڤاكی دا و گرنگیێ ددەتە ڤەكرنا وان پشك و كۆلیژ و سەنتەران ئەوێن جڤاكێ مە پێدڤی پێ هەین و ب هەبوونا وان ڤالاهیەكا مەزن پێ دهێتە پركرن، لەورا ڤێ دووماهیێ چەند پشكێن دەگمەن ل سەر ئاستێ عیراقێ ل زانكۆیا دهۆك هاتنە ڤەكرن و بۆ ئایندەی ژی زانكۆیا دهۆك دێ گرنگیێ دەتە وان بسپۆریێن هەتا نوكە ل زانكۆیێن دەڤەرێ نەهاتینە ڤەكرن، چونكو د بیاڤێ دەست پێشخەریێن زانستی دا زانكۆیا دهۆك هەردەم خۆ ل رێزێن بەراهیێ دبینیت وەك سەرۆكێ زانكۆیا دهۆك (پ. د. مصلح محەمەد سەعید دهۆكی) گۆتی: راستە قەیرانا دارایی ئەوا ب سەر هەرێما كوردستانێ دا هاتی كو هەر كەرتەكی تەمەت قەبارێ خۆ زیان یێن گەهشتینێ و زانكۆیا دهۆك ژی دبیت ژ لایێ ئاڤاكرنا ئاڤاهیان و لابۆران بەهرا خۆ ژ ڤێ زیانێ دابیت، بەلێ ژلایێ زانستی و پەیوەندیێن ئەكادیمی ڤە هەردەم پێنگاڤ یێن بەرەف پێش هاڤێتین و چ جاران ئەڤ پێنگاڤێن هەنێ سست نەبووینە، لەورا دەستخوشیێ ل وان كەس و لایەنان دكەم ئەوێن هەردەم پشتەڤانێن زانكۆیا دهۆك كو نەهێلاین ئێك رۆژ ژی لاوازیەك تێدا پەیدا ببیت.
لدووماهیێ سەرۆكێ زانكۆیا دهۆك گۆت: من دڤێت لڤێرێ سوپاسیەكا بێ سنوور ئاراستەی هێزێن پێشمەرگێن قەهرەمانێن كوردستانێ بكەم، كو ب گیانێ خۆ بەرەڤانیێ ژ ئاخا پیرۆزا ڤی وەلاتی دكەن، خوینا خو درێژن بۆ سەقامگیریا ڤی وەلاتی، دەولەت سەرێ وان شەهیدێن هەردەم ساخ ئەڤرۆ ئەم ل كوردستانێ ب ئارامی و سەربەستی دژین، هزار سلاڤ ل گیانێ هەمی شەهیدێن كوردستانێ بن، ئەم سوزێ ددەینە وان كو وەكو قوتابی و مامۆستایێن زانكۆیێ دێ ب زانستێ خۆ تمامكەرێن خەباتا وان بین داكو وەلاتێ مە ژلایەكی ڤە یێ ئارام بیت و ژلایەكێ دیڤە یێ روهن بیت ب زانست و زانینێ، دێ دبەردەوام بین ل سەر ڤێ خەباتا زانست و زانینێ هەتا ئومێدا هەرە مەزنا مللەتێ مە بجه دهێت ئەو ژی دەولەتا سەربەخۆیا كوردستانێ یە، لەورا دڤێت پشتەڤانیێ ل پێنگاڤێن دەولەت بوونێ بكەین، كو ئەو ژی پشتەڤانیە ل ئەنجام دانا ریفراندومێ داكو ئەڤ ئومێدا هەرە مەزن بجه بهێت.
دووڤدا قوتابیان سوندا سوز و وەفایێ بۆ كارێ خۆ لدووڤ (د. مێڤان عارف بادی) ه. سەرۆكێ زانكۆیێ بۆ كارۆبارێن قۆتابیان خواند و باوەرنامەیێن هەر 23ێ قوتابیێن دەرچوویی هاتنە دان.
راگەهاندنا زانكۆیا دهۆك: هەلز عەلی سەلیم
فوتو: محەمەد بێسكی