ل كۆلیژا پەرستاری ل زانكۆیا دهۆك گەنگەشا ماستەرناما ڤەكۆلەر عەمار خالد صابر ل رێکەڤتی ٢٧/١٠/٢٠٢٢ ل دۆر خۆراكدانا تمامكەر بۆ زارۆكی ب سەركەڤتیانە هاتە ئەنجامدان.
د ڤێ ڤەكۆلینێ دا، ڤەکۆلەری ئەو دایكێن زارۆك هەین و ژیێ زارۆكێ وان د ناڤبەرا ٦ تا ٢٣ هەیڤان دا ژ بنگەهێن چاڤدێریا ساخلەمیێ ل باژێرێ دهۆكێ هەلبژارتینە، كو ژ ٤٠٠ پشكداران پێكدهێت، ئەوێن ل بنگەهێن چاڤدێریا ساخلەمیا دەستپێكی ئامادەبووین.
د ڤەكۆلینێ دا هاتیە دیارکرن كو خۆراكدانا تمامكەر رێكا پێدانا خوارنێ یە بۆ زارۆكی، کو ل وی دەمی دەستپێدكەت، دەمێ شیردانا سرۆشتی بتنێ بەس نەبیت بۆ بجهئینانا پێدڤیێن خوارنێ بۆ زارۆكێ ساڤا، و دەست ب خوارنێن دی دهێتە كرن د تەمەنێ ٦ هەیڤیێ دا بۆ تمامكرنا شیرێ دایكێ، كو ئارمانجا ڤەكۆلینێ هەلسەنگاندنا سەرەدەریا دایكانە ل خۆراكدانا تمامكەر بۆ زارۆكێ ساڤا، ل ژێر رێنمایێن بەرنامێ خۆراكدانا تایبەت ب یۆنسێف ڤە.
ئەنجامێن ڤەكۆلینێ دیاركریە كو دەستپێكرنا خۆراكدانا تمامكەر ل دەمێ گونجایی، راددێ كێمتر یێ هەمەجۆریا دانێن خوارنێ و یێ ژمارا دانێن خوارنێ ژی (٢٥,٤٩٪)، (٧,٤١٪) و (٥,٥٧٪) بوون ل دویڤ وان نموونێن ل دهۆكێ وەرگرتین، كو رادێ كێمتر یێ ژمارا دانێن خوارنێ پەیوەندی ب كارێ دایكێ ڤە هەبوو، و دایكێن كارمەند پتر پێگیر بوون، و رادێ كێمتر یێ هەمەجۆریا دانێن خوارنێ ب شێوەكێ مەزن پەیوەندی ب تەمەنێ زارۆكی ڤە هەبوو.
ژ لایەکێ دی ڤە زارۆكێ ب تەمەنی مەزنتر پتر یێ پێگیربوو ب راددێ هەمەجۆریا دانێن خوارنێ، و هەروەسا پتریا دایكان ب خۆراكدانەكا تەماكەر، یا نە تەمام رادبن، و سەرەدەریێن خۆراكدانێ پەیوەندیا ب تایبەتمەندیێن جڤاكی و دیمۆگرافی یێن دایكێ ڤە هەی، ئەڤێ ژی پێدڤی ب وێ چەندێ یا هەی ئەڤ ئاریشە بهێتە چارەسەركرن بۆ باشكرنا سەرەدەریێن خۆراكدانێ بۆ زارۆكی.
ئەڤ ڤەكۆلینە ل ژێر سەرپەرشتیا د. ئەكرەم مستەفا بوو ژ زانكۆیا دهۆك، كو ئەندام ژی بوو د لژنا گەنگەشێ دا دگەل هەر ئێك ژ د. محەمەد مەحموود / زانكۆیا دهۆك، د. نزار ئۆسمان / زانكۆیا هەولێر یا پزیشكی، و لژنا گەنگەشێ ب سەرۆكاتیا د. صالح عەبدوللا بوو ژ زانكۆیا هەولێر یا پزیشكی.
ب ناڤێ سەرۆکاتیا زانکۆیا دهۆک پیرۆزباهیێ ل ڤەکۆلەری دکەین، هیڤیا پلە و سەرکەڤتنێن مەزنتر بۆ دخوازین بۆ خزمەتکرنەکا زانکۆیا دهۆک.