ل رۆژێن سێ شەمبی و چار شەمبی(24)و(2015/11/25 ) ئاهەنگا دەرچوونا قوتابیێن بەكالوریۆسێ یێن زانكۆیا دهۆك یێن سالا خواندنێ 2014ـ2015 ل هۆلا كۆنفرانسان ل كەمپێ زانكۆیا دهۆك هاتە گێران.
ل رۆژا 24/11 ل دەمێ سپێدێ رێورەسمێن دەرچوونێ بۆ دەرچوویێن فاكۆلتیێن زانستێن پزیشكی، چاندن، زانست، پزیشكی ڤێتێرنەری هاتنە كرن، ل دەمێ ئێڤاری بۆ دەرچوویێن فاكۆلتیێن كارگێری و ئابووری، یاسا و زانستێن سیاسی هاتنە گێران، ل رۆژا 25/11 ل دەمێ سپێدێ بۆ دەرچوویێن فاكۆلتیێن زانستێن پەروەردەی، زانست و پەروەردە ئاكری، ل ئێڤاری ژی بۆ یێن زانستێن مرۆڤایەتی، ئەندازیاری، پلاندانان و زانستێن كارەكی هاتنە گێران، د رێورەسمان دا نوونەرێ وەزیرێ خواندنا بلند و ڤەكۆلینێن زانستی ل حكوومەتا هەرێما كوردستانێ د. عەبدولكەریم عەبدول بەرهەڤ ببو.
سەرۆكێ زانكۆیا دهۆك پرۆفیسۆر د. مسلح دهۆكی د پەیڤەكێ دا دیاركر كو د ڤێ ئاهەنگێ دا 2496 قوتابیان باوەرناما بەكالوریۆسێ ب 43 پسپۆریێن جودا ژ زانكۆیا دهۆك وەرگرتن، گۆت ژی ئەڤە ب گرنگترین گەڕا دەرچوونێ دهێتە هژمارتن هەر ژ دامەزراندنا زانكۆیا دهۆك و هەتا ئەڤرۆ ژ بەر ئەو رەوشا ئالوز یا سالا بۆری د سەر هەرێما كوردستانێ دا هاتی.
ئاماژە دا وێ چەندێ ژی كو سالا خوندنێ 2014 ـ 2015 دبیتە سالا بەرگری كرنێ ژ وان دەستكەفتێن هەرێما كوردستانێ بۆ ماوێ 24 سالان بدەستڤە ئیناین و شەرێ دژی داعش كو دبیتە قووناغەكا مێژوویی یا مللەتێ مە، سەرەرایی ئەو شەر و ئالوزی و قەیرانا ئابووری، لێ ئەوا دوژمنی ڤیایی چێنەبوو و ژیان نەراوەستیا، و چەوا ب سەربلندی پێشمەرگێ كوردستانێ ب سەروەریا سەرۆك بارزانی شەر ل چەپەران دكر، هەروەسا مامۆستا و قوتابیان ل زانكۆیێ بەردەوامی دا پرۆسا خواندنێ، لەورا ئەم ڤێ گەرێ ب شانازی ڤە دكەینە دیاری بۆ پێشمەرگێن كوردستانێ وەكو وەفاداریەك بۆ وی رۆل و بەرگریا ئەو ژ هەمی دەڤەر وپێكهاتێن كوردستانێ دكەن.
پرۆفیسۆر د. مسلح دهۆكی هەروەسا گۆت سالا خواندنێ 2014-2015 ب سەركەفتیانە ل زانكۆیا دهۆك ب دووماهی هات و دەرچوونا ڤێ هژمارا زۆر یا قوتابیان نیشانا سەركەفتنێ یە و بەرهەمێ سالەكا پری ماندیبوونا مامۆستا و كارگێریا زانكۆیا دهۆك و پشتەڤانیا بەردەوام یا حكوومەتا هەرێما كوردستانێ یە.
سەرۆكێ زانكۆیا دهۆك ئەو ژی دیاركر كو زانكۆیا دهۆك بۆ هاریكاریكرنا دەرچوویێن نوی و پەیداكرنا دەرفەتێن كاری ب رێكا سەنتەرێ گەشەپێدانا كاری ل زانكۆیا دهۆك ئەڤ خالە ل بەرچاڤ هاتیە وەرگرتن و بوویە ئەگەر كو كۆمپانی قەستا زانكۆیێ بكەن دەمێ دەلیڤێن كاری هەبن دا كو دەرچوویێن خودان شیان ل دەف وان بكەڤنە كاری، هەر وەسا پشتەڤانیا پێشانگەها كاری یا سالانە بكەن كو ئەڤە ژی دەستپێكا كلتۆرەكێ نوی یە د زانكۆیێ دا، كو خزمەتەكە بۆ دەرچوویێن زانكۆیێ داكو پشتی دەرچوونێ بزانن چەوا برێكێن زانستی بخۆ كاری بدەستڤە بینن، هەروەسا كۆمەلەك ب ناڤێ (Alumni Association) ل زانكۆیا دهۆك هاتیە دامەزراندن و دەرچووی دێ ئیمێل و هژمارێن تێلەفوون و ئەدرێسێن خۆ دەنێ داكو پەیوەندی هەر ل گەل ئێك بمینیت و پشتی دەرچوونێ مفا ژ ئەزموونا پراكتیكی بهێتە وەرگرتن.
سەرۆكێ لژنا بلندا ئاهەنگا دەرچوونێ د. جەمال عەلی حەسەن د پەیڤا لژنا بلندا ئاهەنگێ دا گۆت ب ناڤێ لژنا بلند بیرۆزباهیێ ل دەرچوویان دكەین كو گەرەكا دی ژ زانكویا دهوك دەرچوون و خواندنا خۆ یا بەكالوریۆسێ ب دووماهی ئینا و مە پێشكێشی وەلاتی كرن ب پەروەردەكرنەكا دورست و خودان باوەرنامە و ئەم ل وێ هیڤیێ ینە ببنە كارمەندین چالاك د رێڤەبرنا دەزگەهێن حوكمەتا هەرێمێ دا یان ژی ل كەرتێ تایبەت، گۆت ژی ئەم وەكو زانكویا دهۆك ب ڤێ چەندێ سەرفراز و شانازین و ب ئەركێ خۆ دزانین.
هەر د رێورەسمێن ئاهەنگا دەرچوونێ دا پەیڤا قوتابیێن دەرچووی ژ لایێ شێروان ئەحمەد ڤە هاتە خواندن و تێدا گۆت ئەم ل سوزێ ددەین كو وەفاداربین بۆ هەمی وەستیان و زەمینە خوش كرنا مامۆستا و پروسا خواندنێ بین، سوزبیت خۆ ژ خزمەتا مللەتێ خۆ لانەدەین هەتا دگەهینە رزگاریا ئێكجاری و رێكێ نەدەینە چ هزرێن ژەهراوی یێن دوژمنێن مە ل ژێر هەر پەردەكێ مللەتێ مە ب ترسینیت، سوزبیت وەفاداربین بۆ خوینا شەهیدان و رەنجا پێشمەرگێن قەهرەمان، كو دەولە سەرێ وان مە شیایە ب ئازادییێ بخوینین و بەرسینگێ مەزنترین رێكخراوا تیرۆرێ ل جیهانێ بگرین.
گۆت ژی ئەڤرو بارێ سەر ملێ مە گەلەك یێ گرانە چونكو زانكویا مە ئەمانەت و پەیامەك رادەستی مە كر كو ئەو ژی پەیاما زانست و فێربوونێ و بلندكرنا هشیاریا نەتەوەیی و .... هتد، لەورا پێدڤی یە ل سەر مە هەمیان كەم تەر خەم نەبین بۆ گەهاندنا ڤێ پەیاما پیرۆز كو ئەو ژی ب رێكا ئەنجامدانا كار و كریارێن باش و هەر ئیك ل دیف پسپۆری و تایبەتمەندیا خۆ تاكو رەنج و ماندیبوون و خۆ گوریكرنا شەهیدێن مە ب هەروە نەچیت.
رەمەزان رێكانی