کۆلیژا زمانان بەریکانا سەمفۆنیا پەیڤان یا هەلبەست خواندنێ بۆ قوتابیێن زانکۆیا دهۆک ئەنجام ددەت
کۆلیژا زمانان ل زانکۆیا دهۆک بەریکانا سەمفۆنیا پەیڤان یا هەلبەست خواندنێ یا قوتابیێن زانکۆیا دهۆک ل ناڤەندا قوتابیان ئەنجام دا ب پشکداریا قوتابیێن هەمی کۆلیژێن زانکۆیا دهۆک و لیژنەکا هەڵسەنگاندنێ ژ زمانەڤان و شارەزایێن زمانێ کوردی وکێشەناسی ژ وانا: د. مسعود جمیل و د. حلیمە خۆرشید و د. سەگڤان عەبدولرەحمان تاها، هارێکارێ راگرێ کۆلیژا زمانان، و م. بارزان حسێن، بریاردەرێ بەشێ زمانێ کوردی ل کۆلیژا زمانان، و هەروەسا ب ئامەدەبوونا راگرێ کۆلیژا زمانان، د. ئەبوعوبەیدە عەبدوللا زیاد، و ماموستایێن کۆلیژێ و کۆلیژێن دی یێن زانکۆیا دهۆک وهەلبەستڤان ورەوشەنبیرێن باژێرێ دهۆکێ و قوتابیێن زانکۆیێ.
مەرما سەرەکی ژ ئەڤێ بەریکانێ ئەو بوو گرنگیدان ب بەهرەیێن قوتابیێن زانکۆیێ و دا کو ئەو قوتابی بشێن شیانێن خو پێشان بدەن. ل دەستپێکێ، راگرێ کۆلیژا زمانان ب هەلبەستەکێ پەیڤا خو پێشکێش کر و تێدا دیار کر کو ئێکەم بەریکانا هەلبەست خواندنێ ل سالا ٢٠١٣ ژ لایێ یانا رەوشەنبیری یا کۆلیژا ئادابێ و رێڤەبەریا رەوشەنبیری هاتبوو رێکخستن. و جەخت ل وێ چەندێ کر کو ئەڤ بەریکانە دێ بیتە نەریتەکێ سالانە بهێتە ئەنجام دان ب باشترین شێوە.
پاشان، پەیڤەک ژ لایێ لیژنا هەلسەنگاندنێ ڤە هاتە پێشکێشکرن تێدا هاتە دیار کرن کو ژمارەکا مەزنا قوتابیان هەوڵا پشکداریکرنێ کریە و ل دویڤ چەندین پیڤەران وەکی ناڤونیشان، بابەت، لایەنێن زمانی، و رێکا گۆتنێ، ژمارەکا هەلبەستان هاتنە ژێگرتن ژبو پێشبرکیێ. دیسان، لیژنا ناڤبری باس ل وێ چەندێ کر کو مەبەستا بەریکانێ پشکداریکرنە و هەمی بەهرە د سەرکەفتی نە مەرج نینە چ پلێ بدەست خو ڤە بینن.
ل دویڤ دا، پشکداران هەلبەستێن خو پێشکێشکرن. هەژی گۆتنێ یە کو د ئەڤێ بەریکانێ دا ١٥ قوتابیان پشکداری کرن ب هەلبەستێن جوراوجور ب دیالێکتێن کورمانجی و بەهدینی و سۆرانی یێن زمانێ کوردی و زمانێ عەرەبی، و ژ لایێ لیژنا هەلسەنگاندنێ ڤە هاتنە هەلسەنگاندن و سێ قوتابی یێن ئێکێ و دووێ و سیێ هاتنە دەستنیشان کرن وخەلاتکرن و ئە و ژی: زەردەشت نەوزاد ژ کۆلیژا زانست ب هەلبەستا (ئەی وەلات)، و داستان فتحی ژ کۆلیژا زانستێن مرۆڤایەتی ب هەلبەستا (بویکا کوردان) ، و ئەحمەد لوقمان ژ کۆلیژا ئەندازیاری ب هەلبەستا (کەڤالەک ژ ل خو گەریانێ)، ل دویڤ ئێک. دیسان هەمی قوتابیێن پشکدار د بەریکانێ دا هاتنە خەلاتکرن ژ لایێ راگرێ کۆلیژا زمانان ڤە.
فاطمە محمود
ن جانگیر