ل رێکەڤتی ٢٠٢٢/١١/١١ و ل پارکا تەحسین تاهای ل باژێرێ دهۆکێ، قوتابیێن کولیژێن پزیشکی یا گشتی و پزیشکی یا ددانا و پشکا شیکاری نەخۆشی ل زانکۆیا دهۆک، ب هەڤکاری دگەل رێکخراوا ئاشتی یا تەندروستیێ، رۆژا جیهانی یا نەخۆشیا شەکرێ، سێ رۆژان بەری دەمێ وێ یێ دەستنیشانکری، کو ١٤ـی چریا دووێ یە ژ هەر سالەکێ، ساخکر.

ل دۆر ئەڤێ چەندێ، سەعەد ئەیاد قوتابیێ زانکۆیا دهۆک و بەرپرسێ رێکخراوا ئاشتی یا تەندروستیێ و سەرپەرشتێ چالاکیێ بۆ راگەهاندنا زانکۆیێ گۆت "ئەڤ چالاکیە ژ سێ برگا پێکدهێت، ئەوژی پشکنینا شەکری، دیارکرنا کێشا لەشی (BMI) و پشکنینا ددانا". ناڤبری هەروەسا دیارکر "ئەڤ پشکنینە بێ بەرامبەر بۆ وەلاتیان هاتنە ئەنجامدان، دیسان ئۆفەرەکا تایبەت بۆ وان کەسان هەبوو یێن پشکداری د ئەڤێ چالاکیێ داکری".

ژ لایێ خۆ ڤە ئێک ژ قوتابیێن پشکدارێن ئەڤێ چالاکیێ ژ کولیژا پزیشکی یا گشتی یا زانکۆیا دهۆک ب ناڤێ مەتین عومەر، ئەرکێ بەلاڤکرنا زانیاری و رێنمایان ل دۆر نەخۆشیا شەکرێ ب وەلاتیان پێ هاتبوو راسپاردن و زانیاری و رێنمایێن سەرەکی ل دۆر نەخۆشیا شەکرێ پێشکێشی ئامادەبوویان دکرن. هەروەسا ل دویڤ گۆتنا رێکخەرێن چالاکیێ، نێزیکی ٥٠٠ وەلاتیان ژ تەمەنێن جودا ژ ئەڤێ چالاکیێ مفاداربوون.

دهێتە زانین رۆژا جیهانیا نەخۆشیا شەکرێ هەوەکا هشیاریێ یە ل سەر ئاستێ جیهانێ و جەختێ ل سەر نەخۆشیا شەکرێ دکەت و هەر سال ل ١٤ـی چریا دووێ ئەڤ هەوە ل سەرانسەری جیهانێ دهێتە ئەنجامدان. ئەڤ هەوە ژ لایێ فیدراسیۆنا جیهانی یا نەخۆشیا شەکرێ International Diabetes Federation (IDF) ڤە دهێتە سەرکێشیکرن، کو ل هەر سالەکێ جەخت ل سەر بابەتەکێ گرێدای ڤێ نەخۆشیێ دهێتەکرن. نەخۆشیا شەکرێ یا ژ جۆرێ (٢)، دشیاندایە خۆ ژێ بپارێزین و هەروەسا چارەسەری ژی هەیە، لێ نەخۆشیا شەکرێ یا ژ جۆرێ (١) شیانێن خۆ ژێ پاراستنێ نینن، لێ ب رێکا ئەنسۆلینی دشیاندایە بهێتە کۆنترۆلکرن. زانکۆیا دهۆک ژی ب ڤێ هەلکەڤتێ، سالانە چەندین چالاکیێن جودا ئەنجام ددەت.