زانكۆیا دهۆك ئاهەنگا دەرچوونا گەرا 24 گێرا

زانكۆیا دهۆك ل رۆژا 7/11/2019 ئاهەنگا دەرچوونا گەرا 24 یا قوتابیێن بەكالوریوسێ‌ یێن سالا خواندنێ‌ 2018-2019 گێرا، كو ژ 18 كۆلیژان پتر ژ چار هزار قوتابیان باوەرناما بەكالوریوسێ‌ وەرگرت.
سەرۆكێ‌ زانكۆیا دهۆك پ. د. مصلح دهۆكی د پەیڤەكی دا گۆت شانازیەكا مەزنە بۆ مە وەكو زانكۆیا دهۆك ئەڤرۆ ئەم رێورەسمێن دەرچوونا 4007 قوتابیێن خۆ بگێرین، ئەو قوتابیێن ب درێژاهیا چار سالان و هندەك پێنج سال و شەش سالان قوتابیێن مەبوون، دبیت دڤان سالان دا و داكو بگەهنە ڤێ‌ رۆژێ‌ قوربانی ب گەلەك تشتا دایە، ئەڤە ئەو رۆژە یا ئەم و هین و مالباتێن وە ل هیڤیێ‌، كو تاجا زانست و زانینێ‌ بدانە سەرسەرێ‌ خۆ و ب شانازیڤە ژ زانكۆیێ‌ ب دەرچن و بكەڤنە د قادا خزمەتێ‌ دا بۆ مالبات و گەل و وەلاتێ‌ خۆ، گەنجێن خودان شیان و ئەكادیمی هەردەم گەنجینا وەلاتانە و داینەمویا كاری نە.
پ. د. مصلح دهۆكی هەروەسا گۆت زانكۆ ژینگەه و نامە و هەمبێزا دەربرینا هزری و جهێ‌ ئافراندن و داهێنانێ‌ و زانینێ‌ یە داكو د هەڤرێ‌ بین دگەل شارستانیەتا سەردەمیانە و پێگیری كرنا مە ب ڤێ‌ نێرینێ‌ زانكۆیا دهۆك ئاڤاكرنا كەسایەتیەكێ‌ ب هێز ب زانست و زانینێ‌ دانایە د بەراهیا كارێن خۆدا، ژ پێخەمەت بەرەف پێش برنا پرۆسێسا خواندن و ڤەكۆلین و ئامرازێن نوی یێن گەهاندنێ‌ یێن گرێدایی ب سیستەمێ‌ ئەكادیمی ب رێكا پێشكێش كرنا نویترین پرۆگرامێن خواندنێ‌ كو ل ناڤەندێن ئەكادیمی و نێڤدەولەتی د باوەرپێكری نە.
سەرۆكێ‌ زانكۆیا دهۆك بۆ دەرچوویێن گەرا 24 گۆت دەرچوونا وە ژ زانكۆیێ‌ رامانا وێ‌ ئەو نینە ب ئێكجاری دێ‌ خاترا خۆ ژ زانكۆیێ‌ خازن و دێ‌ ژێك هێینە دابرین، بەروڤاژی دڤێت پشتی دەرچوونێ‌ پەیوەندیا وە ل گەل زانكۆیێ‌ ب مكومتر بیت، بۆ ڤێ‌ مەرەمێ‌ ژی ل سالا 2017 زانكۆیا دهۆك پرۆژێ‌ تۆرا دەرچوویێن زانكۆیێ‌ دانا ب پشتەڤانیا تۆرا دەرچوویێن زانكۆیا ئەمریكی ل بەیروت (AUB) كو پتر ژ 150 سالایە سەربۆر دڤی بیاڤی دا هەی و مەرەم ژێ‌ ئەوە ئەو قوتابیێ‌ ژ زانكۆیێ‌ دەردچیت پەیوەندی هەر دگەل زانكۆیێ‌ هەبیت و ئەڤ تۆرە دەرگەهەك بیت هەردەم دەرچوویێن زانكۆیا دهۆك خۆ تێدا ببینن و ب رێكا ڤێ‌ تۆرێ‌ دەرچووی هەر زانكۆیێ‌ ب مالا خۆ بزانن و هەست ب وێ‌ چەندێ‌ نەكەن كو ڤالاتیەك یا پەیدابووی و ژ زانكۆیێ‌ هاتینە ڤەقەتیان، هەر دەرچوویەكێ‌ دهێتە تۆمار كرن ل ڤێ‌ تۆرێ‌، دێ‌ ئەكاونتەك بۆ هێتە چێكرن و ئەو دەرچووی دشێت پێزانینێن خۆ د وی ئەكاونتی دا بەلاڤ بكەت و بەردەوام نوی بكەت، كو ئەڤە ژی دێ‌ یا هاریكار بیت بۆ دیتنا دەلیڤێن كاری و پشكداری كرنێ‌ د خۆلێن پێشخستنێ‌ دا. 
پ. د. مصلح دهۆكی هەروەسا بەحسێ‌ نویاتیان ل زانكۆیا دهۆك كر و گۆت زانكۆیا دهۆك گرنگی دایە ب نویكرنەڤا سەنتەرێن تایبەتمەند ئەوێن راستەوخۆ خزمەتێ‌ پێشكێشی جڤاكی ب گشتی و بازارێ‌ كاری دكەن و سالانە ئەڤ سەنتەرە ل دویف پێدڤیا كاری دهێنە ڤەكرن، دیسا سالانە پشكێن نوی یێن زانستی ل زانكۆیا دهۆك دهێنە ڤەكرن بۆ پركرنا وێ‌ ڤالەتیا ل سەكتەرێ‌ پەروەردێ‌ و وانەگۆتنێ‌ داهەی، بزاڤ ژی دهێنە كرن هەمی بسپۆریێن زانستی مە ل زانكۆیا دهۆك هەبن و ل چ بسپۆریان ڤالاتی نەبیت. 
ژ لایێ‌ پەیوەندیان ڤە ژی ل زانكۆیا دهۆك سەرۆكێ‌ زانكۆیێ‌ گۆت سالانە ڤان پەیوەندیان پێش دئێخیت، ئەڤجا چ رێككەفتێن زانستی بن ل گەل زانكۆ و ناڤەندێن ئەكادیمی یێن نێڤدەولەتی یان ژی ڤەكرنا پشكێن زانستی یێن هەڤپشك ل گەل زانكۆیێن ناڤدارێن جیهانی، كو ئەڤە ژی دەستكەفتێن زانستی نە بۆ زانكۆیا دهۆك و ئەم شانازیێ‌ پێ‌ دبەین، هەوەسا مە پەیوەندی و بەرنامێن هەڤپشك د ناڤبەرا زانكۆیا دهۆك و زانكۆیێن ناڤدارێن جیهانی یێن هەین و دێ‌ د بەردەوام بین ژی ل سەر زێدەكرنا ڤان بەرنامان چونكو مە ئەزموونەكا سەركەفتی یا د ڤان بەرنامان دا هەی و ئەڤ جۆرە بەرنامە بۆ جارا ئێكێ‌ یە ل زانكۆیێن عیراقی و هەرێما كوردستانێ‌ دهێنە ئەنجام دان. 
وەزیرێ‌ خواندنا بلند و ڤەكۆلینێن زانستی ل حكومەتا هەرێمێ‌ د. ئارام محمد قادر د پەیڤەكی دا كو ب نوینەراتیا سەرۆكێ‌ حكومەتێ‌ بەهەڤی ڤان رێورەسمان ببوو بناڤێ‌ سەرۆكێ‌ حكومەتێ‌ بەرێز مەسرور بارزانی پیروزباهی ل دەرچوویان و مالباتێن وان و دەڤەرا دهۆكێ‌ كر و دەستخۆشی ژی ل سەرۆكێ‌ زانكۆیێ‌ و ئەندامێن جڤاتا زانكۆیێ‌ و مامۆستایان كر كو د پرۆسا پێگەهاندنا ڤان گەنجان دا ماندووی بووینە، گۆت ژی دهۆك جهێ‌ شانازیا مەیە و خەلكێ‌ ڤێ‌ دەڤەرێ‌ هەردەم ل رێزێن بەراهیێ‌ یێن خەبات و قوربانیدانێ‌ بوون ژ پێناڤی ب دەستڤەئینانا مافێن رەوا یێن گەلێ‌ مە. 
ل دویف دا پەیڤا دەرچوویان هاتە خواندن و داخاز ژ حكومەتا هەرێما كوردستانێ‌ هاتە كرن كو دەرفەتێن كاری بۆ دەرچوویان بهێنە دیتن، ل دووماهیا رێورەسمان ژی سویندا دەرچوونێ‌ هاتە خواندن و رێورەسمێن دانا باوەرنامێ‌ ژی برگا دووماهیێ‌ بوو كو راگرێن كۆلیژان داخاز ژ سەرۆكێ‌ زانكۆیێ‌ كر باوەرنامێن بەكالوریوسێ‌ پێشكێشی دەرچوویان بكەت و سەرۆكێ‌ زانكۆیێ‌ ژی راگەهاند كو باوەرنامێن وان پێشكێش كرن هەر ئێكی ل دویف بسپۆریا وی.