راگەهاندنا زانکۆیا دهۆک؛ ١٥ـی چریا دووێ ٢٠٢٢
سیستەمێ پێزانینێن جیوگرافی(GIS) وەکو تەکنیکەکا تەکنۆلۆجیایا سەردەمیانە د گەلەک بوارێن زانستی دا دهێتە بکارئینان، مفایەکێ مەزن د بوارێ چاندن و پلاندانان و دارستانا و خزمەتگوزاریێن ناڤ مالان دا هەیە.
سالانە ب هەلکەڤتا رۆژا جیهانی یا سیستەمێ پێزانینێن جیوگرافی (GIS) ب رێکا خو تومارکرنێ ژلایێ کومپانیا ESRI یا ئەمریکی ڤە چالاکی دهێنە گێران، ئەنجامدانا ئەڤێ چالاکیێ ل زانکۆیا دهۆک ب رێکا خۆ تۆمارکرنێ، زانکۆیا دهۆک دچیتە ل سەر نەخشەیا وان زانکۆیێن جیهانی، ئەوێن ب هەلکەڤتا ئەڤێ رۆژێ چالاکیان ئەنجامددەن. دەستپێکا ئەڤێ رۆژێ وەکو رۆژا جیهانی یا سیستەمێ پێزانینێن جیوگرافی (GIS) ڤەدگەریتە ١٦ـی چریا دووێ ١٩٩٩.
ل دۆر ڤێ یەکێ د. مزگین محەمەد حەسەن مامۆستایێ پشکا جیوگرافی ل کولیژا زانستێن مرۆڤایەتی، ل زانکۆیا دهۆک، دیارکر "مفایەکێ مەزن ژ سیستەمێ پێزانینێن جیوگرافی (GIS)دهێتە وەرگرتن، ب تایبەتی پشکێن جیوگرافی ل کولیژێن زانستێن مرۆڤایەتی و پەروەردا بنیات و کولیژا پلاندانانا جهەکی، ژبەرکو بکارئینا GPS د ژیانا خۆ یا رۆژانە دا ئەم پێدڤی ب سیتەمێ پێزانینێن جیوگرافی دبین".
بۆ ساخکرنا ڤێ هەلکەڤتێ، پشکا جیوگرافی ل کولیژا زانستێن مرۆڤایەتی رۆژا دووشەمبی رێکەڤتی ١٤-١١-٢٠٢٢ ، ل هۆلا بەدلیسی و ب ئامادەبوونا راگرێ کولیژێ د. سەعید خودێدا عەلۆ و مامۆستا و قوتابیێن پشکا ناڤبری، رۆژا جیهانی یا سیستەمێ پێزانینێن جیوگرافی(GIS) ب ئەنجامدانا پانێلەکێ زانستی هاتەساخکرن.
د. سمیر صباح رجب، وەکو ئێک ژ پانێلیستان، ب دانەنیاسینا پلاتفۆرمێ (ArcGIS Online) بۆ قوتابیان دەست ب پانێلی کر و ئەو پرۆگرامێن تایبەت ب رێڤەبرنا داتایێن جهەکی و دروستکرنا نەخشێن ئونلاین ل سەر تۆرێن ئەنترنێتێ بۆ قوتابیان دانە دیارکرن و گرنگیا ڤان پرۆگرامان د بوارێن گشتی و ئابووری و تایبەت دانە نیاسین. هەروەسا ئاماژە ب وێ چەندێ کر کو "ژ بەرکو ئەڤ پرۆگرامە پشکەکا بنەرەتە د زانست و پراکتیکێن جیوگرافی دا و مفایێن زۆر هەنە، هژمارەکا زۆر ژ دام و دەزگەهێن حکۆمی پێدڤی ب ئالاڤێن (Arc GIS) هەیە بۆ پێشئێخستنا کارێن رۆژانە".
د سمینارا دووێ دا مامۆستا شەمال ئەحمەد ئەمین) رۆلێ (GIS) د دەستنیشانکرنا مەترسیێن رامالینا ئاخی دا دیارکر. هەروەسا ئاماژە ب تەکنیکێن سەردەم کر کو رۆلەکێ بەرچاڤ د بیاڤێ دەستنیشانکرنا پلا مەترسیێن سرۆشتی دا، کو ئێک ژ وان رامالینا ئاخی یە برێکا جۆراتیا پیڤەران.
پاشی مامۆستا ئاشتی ئیسماعیل سمینارەک ب ناڤونیشانێ (هەلسەنگاندنەکا جهەکی بۆ خزمەتگوزاریێن وێستگەهێن ئاگرڤەمراندنێ ل باژێرێ زاخۆ) پێشکێشکر، کو دباغەدا ڤەکۆلینەک بوویە و ژ لایێ مامۆستایێ ناڤبری ڤە هاتیە ئەنجامدان. د ڤێ ڤەکۆلینێ دا پرۆگرامێن سیستەمێ پێزانینێن جیوگرافی هاتینە بکارئینان بۆ دەستنیشانکرنا خزمەتا وێستگەهێن ئاگرڤەمراندنێ ل باژێرێ زاخۆ. ل دۆر ڤێ یەکێ ڤەکۆلەری دیارکر "ئەڤ پرۆگرامە رۆلەکێ مەزن دبینن د بوارێ دەستنیشانکرنا خزمەتگوزاریێن ناڤا باژێرا و پێشبینیکرنا باشترین جهێن دانانا ڤان خزمەتگوزاریا ل سەر بنەمایێن پیڤەرێن پلاندانانی".