راگەهاندنا زانکۆیا دهۆک؛ ٢١ـی کانوونا ئێکێ ٢٠٢٢
سوباهی رۆژا پێنجشەمبی رێکەڤتی ٢٢ـی کانوونا ئێکێ ٢٠٢٢ و ل دەمژمێر ١٠ـی سپێدێ ل سەنتەرێ کۆنفرانسان، دێ ب رێورەسمەکی یادا سیهـ سالیا دامەزراندنا زانکۆیا دهۆک دێ هێتە گێڕان. د ڤی رێورەسمی دا، بۆ ئێکەم جار باوەرنامەکا دکتۆرایا فەخری دێ هێتە پێشکێشکرن، هەروەسا هژمارەکا ستافێ ئەکادیمیێ زانکۆیا دهۆک، دێ هێنە خەلاتکرن.
دهێتە زانین بۆ ئێکەمین جار باوەرنامەکا دکتۆرایا فەخری ژ لایێ زانکۆیا دهۆک ڤە دێ هێتە پێشکێشکرن، کو د ڤی رێورەسمی دا، زانکۆیا دهۆک دێ باوەرناما دکتۆرایا فەخری پێشکێشی جڤاکناس و کوردناسێ تورک و دۆست و پشتەڤانێ گەلێ کورد، د. ئیسماعیل بێشکچی کەت.
د ڤی رێورەسمی دا و وێرای پێشکێشکرنا پەیڤێن گرێدای ڤێ هەلکەڤتێ، ڤیدیۆیەکا ئینفۆگرافیکی ل دۆر زانکۆیا دهۆک دێ هێتە نمایشکرن. ژ لایەکێ دی ڤە، ئەو مامۆستایێن ئەڤ سالە پلا پرۆفیسۆریێ بدەستڤەئینای و هەروەسا ئەوێن شیاین ب رێکا پرۆژێن خۆ فەندێن جودا بۆ زانکۆیا دهۆک بدەستڤەبینین، دێ ژ لایێ سەرۆکاتیا زانکۆیا دهۆک ڤە هێنە رێزلێنان.
زانكۆیا دهۆك ئێكەم سازیا ئەكادیمیا فراوانە ل دەڤەرا بادینان، کو سالا ١٩٩٢ـێ ب هەردوو كۆلیژێن پزیشكی و چاندنێ هاتە دامەزراندن و نوکە ژی ژ ١٩ كۆلیژان و پەیمانگەهەكی پێكدهێت، كو ٦٩ پشكێن زانستی لێ هەنە. هەتا نوكە ٢٧ گەرێن قوتابیان ژ زانكۆیا دهۆك دەرچووینە، كو دبنە ٤٩٩٣٨ قوتابی، باوەرناما بەكالۆریۆسێ ژ زانكۆیا دهۆك ب بسپۆریێن جودا وەرگرتینە.
نوکە ٢٣٢١٠ قوتابی ل زانکۆیا دهۆک هەنە، زێدەباری ستافێ ئەکادیمی یێ خودان باوەرنامێن بلند، كو هژمارا وان ١٩٥٤ مامۆستانە و ٧٦٤ ژ وان هەلگرێن باوەرناما دکتۆرایێنە و ١١٩٠ ژی هەلگرێن باوەرناما ماستەرێنە، ژ وان ژی ١١٨ پرۆفیسۆرن و ٣٩٩ پرۆفیسۆرێن هاریکارن. زێدەباری هەلگرێن باوەرنامێن دیتر وەكو دبلوما بلند و سالانە هژمارا مامۆستایان د زێدەبوونێ دایە، چونكو هەر كۆلیژەك ل دویڤ پێدڤیاتیێ كورسیێن خواندنا بلند ڤەدكەت.