كولیژێن ئەندازیاری یێن هەردوو زانكۆیێن دهۆك و سەلاحەدین کۆربەندەكێ نیڤدەولەتی لدۆر بابەتێ پارێزگاریكرنا ژێدەرێن ئاڤێ و مەترسیێن لافاوان، بەرهنگاری و چارەسەری، ل سەنتەرێ رەوشەنبیری و جڤاكی یێ زانكۆیا سەلاحەدین ل هەولێرێ ئەنجامدا. ئەڤ کۆربەندە ب ئامادەبوونا سەرۆكێ زانكۆیا دهۆك، د. داوود سلێمان ئەترووشی و نوینەرێن وەزارەتا خواندنا بلند و ڤەکۆلینێن زانستی، و پارێزگارێ هەولێرێ، ئومێد خۆشناو و چەند بسپۆر و تایبەتمەند و دكتۆرێن زانكۆیێن دهۆك و سەلاحەدین هاتە ئەنجامدان.
راگرێ كولیژا ئەندازیاری ل زانكۆیا دهۆك د. جێمس حەسدۆ هەیدۆ لدۆر ڤێ کۆربەندێ گۆت: "ئێك ژ ئەركێن زانكۆیێ ئەوە چارەسەریان بۆ ئاریشێن جڤاكی ببینیت، پشتی لافاوێن هەولێری، مە گرنگ زانی و دەستپێشخەربووین هەماهەنگیێ دگەل زانكۆیا سەلاحەدین بكەین بۆ ئەنجامدانا کۆربەندەكی، داکو چارەسەرییان بدەینە جهێن پەیوەندیدار، پێدڤیە هەڤكاری هەبیت دگەل هەمی زانكۆیێن كوردستانی و جیهانی بۆ ئەنجامدانا ڤەكۆلینێن زانستی لسەر هەر ئاریشەكا پەیدادبیت".
د. جێمس هەیدۆی لدۆر ئەگەرێن لافاون دا دیارکرن "هەر چەندە مە داتا نینن ئەم ئەگەر سەرەكی بزانین، لێ وەکو گریمانە، پەیدابوونا لافاوان دوو ئەگەرێن سەرەکی هەنە، یان ئاریشێن ئەندازیارینە بۆ ئاڤا سەر ئەردی، یانژی ئەگەرێن ئیدارەكرنا ئاڤێ یە، نوكە ئەم ل زانكۆیا دهۆك د پەیوەندیێ داینە دگەل زانكۆیەكا هۆلەندی لدۆر ئاریشێن ئاڤێ و ئاریشێن ئیدارەكرنا ئاڤێ ل كوردستانێ وعیراقێ کاربکەین، ڤێ زانكۆیێ جەختکرنا خۆ یا ئێخستیە سەر زانكۆیا دهۆك ب رێكا كولیژا ئەندازیاری و هندەك قوتابیێن ماستەرێ ل زانكۆیێ، لەورا هەر ئەڤ زانكۆیە دێ سپۆنسەریا ڤێ چەندێ كەت، ئەڤەژی دەرفەتەكا باشە بۆ قوتابیێن ماستەر و دكتۆرایێ".
دكتۆر دانا خدر مەولوود سەرۆكێ پشكا ئەندازیاریا سارشتانی ل زانكۆیا سەلاحەدین گۆت: "ئەم ڤێ بیرۆكێ ب ئەنجامەكێ پیرۆز دزانین، كو بسپۆرێن هەردوو زانكۆیان پێكڤە بگەهنە ئەنجامەكێ باش بۆ چارەسەریا ئاریشا ئاڤێ ل كوردستانێ، پێدڤیە لایەنێن پەیوەندیدار كار سەر وان ئاڤرێژان بكەن، ئەوێن رێژا هەرەمەزن لسەر، ژبەركو ئەو ئاڤرێژێن هاتینە دانان كەڤن و بچویكن، لەورا گەلەكا گرنگە كار لسەر ڤان ئاڤرێژان بهێتە کرن و بهێنە مەزنكرن، داکو کاریگەریا لافاوان لسەر باژێری كێم بكەن، لافاو دیاردەکا سرۆشتیە، دبیت ئەڤرۆ یان سوبەهی یان سالەكادی رویبدەت، بەلێ پێدڤیە ئەم خۆ ئامادەبكەین بۆ ڤان جۆرە رویدانان".
ژ لایێ خۆ ڤە رەمەزان حەمزە رێڤەبەرێ سەنتەرێ ڤەكۆلینێن سازیان ل زانكۆیا دهۆك گۆت: "ئەگەرێ سەرەكی یێ پەیدابوونا لافاوان، دەمێ باژێر مەزنتربن ژ پلانێن خۆ، یان زێدەگاڤی سەر ئەردی دهێنەكرن بێی ڤەكۆلینا وی یەکێ بكەن کا دێ چەوا خۆ ژڤان ئاڤرێژا قورتالكەین، و ئەم چێكرنا ڤان ئاڤرێژان ب زانستی وەرناگرین، هەتا نوكە ژی ئاڤاهی دهێنە ئاڤا كرن بێی پلان، پێدڤیە ل دەمێ گوهورینا سەقای گەلەك ب زانستیانە کاربکەین داکو بشێین دیزاینا باژێری یان پرۆژە و بەنداڤان دروست بهێتە دانان، بۆ چارەسەریا لافاوێ ژی ب دەهان رێكارێن زانستی هەنە لسەر شێوازێ باژێری و جیۆگرافیا وێ و هەر جهەكی دیزاینا خۆیا تایبەت هەیە، پێدڤیە باژێرەكێ وەكو دهۆك ئاڤرێژێن وێ بهێنە بەرفرەهكرن، چونكو باژێر رۆژ بۆ رۆژێ مەزنتر دبیت".
هەژی ئاماژێ یە زانکۆیا دهۆک بەردەوام بزاڤا فراوانکرنا سنوورێ هەڤپشکێن خۆ دکەت بۆ هندێ پتر هەماهەنگی هەبیت بۆ چارەسەرکرنا ئاریشەیێن د کەرتێن جودایێن جڤاکی دا. ئەڤ کۆربەندە ژی بۆ وێ یەکێ بوو خزمەتێن زانینێ د بوارێ پاراستنا ژێدەرێن ئاڤێ کونترۆلکرن و کێمکرنا زیانێن لافاوان بۆ لایەنێن پەیوەندیدار بهێنە پێشکێشکرن.