راگەهاندنا زانکۆیا دهۆک؛ ١٤ـی چریا دووێ ٢٠٢٢
د ڤەکۆلینەکێ دا ل پشکا مێژوو یا کولیژا زانستێن مرۆڤایەتی ل زانکۆیا دهۆک، ڤەکۆلەر (جیهان تاهر حەجی) ناما خۆ یا دکتۆرایێ ئەوا ب ناڤونیشانێ (هونەرێ جەنگی ل سەردەمێ ئەیۆبیان ٥٧٠-٦٥٢ک/١١٧٤-١٢٥٤ز)، سالۆخدان و شرۆڤەکرنەکا تێروتەسەلا هۆنەرێ جەنگیێ دەولەتا ئەیۆبی کر.
ژ بلی باسکرنا بنەمایێن هۆنەرێ جەنگی ب گشتی، ڤەکۆلەرێ گەلەک هویرکاریێن لەشکەری یێن دەولەتا ناڤبری شرۆڤەکرینە، وەکو؛ پێکهاتێن جڤاکی یێن جەنگی، چەک و ئامیرێن جەنگی، هێزێن دەریایی یێن دەولەتا ئەیۆبی، چەوانیا خۆبەرهەڤکرنێ بۆ جەنگا و شێواز و تەکنیکێن لەشکەری.
هەر د ڤەكۆلینێ دا، باس ل جۆرێن چەكی ل سەردەمێ ئەیۆبیان هاتیە کرن، كو سەركردە و میرێن وان ژ كورد و تورك و عەرەبا بوون، ڤەکۆلەرێ ئەوژی دیارکریە كو دوو جۆرێن چەكی ل وی سەردەمی هەبوون، ئەوژی چەکێن سڤک و یێن گران، کو د هێرشبرنێ و بەرەڤانیکرنێ دا دهاتنە بکارئینان.
ڤەکۆلەرێ ئەو یەکە ژی دیارکریە کو هێز و پشتەڤانێن لەشكەری یێن دەولەتا ئەیۆبی پێكهاتیبوون ژ هێزێن ئەندازیاری، خزمەتگوزاری، خۆبەخش و خەلكەكی ئاسایی، کو رۆلەكێ گرنگ د رێكخستنا لەشكەرێ ئەیۆبی دا دگێرا، و ل دویڤ شێوازێن هەر شەرەكی و ژینگەها جەنگێ، ئەڤ پێکهاتە دهاتنە بکارئینان.
هەژی ئاماژێ یە ئەڤ ناما دکتۆرایێ ل رێکەڤتی ١٠/١١/٢٠٢٢ هاتە گەنگەشەکرن و بریار ب بەخشینا باوەرناما دكتورایێ ب ڤەكۆلەرێ هاتە دان، لژنا گەنگەشێ ژی ژ ڤان بەرێزان پێكهاتبوو:
د. محەمەد صالح تەیب، خانەنشین/ دەرەكی، سەرۆك.
د. زرار سەدیق تەوفیق، زانكۆیا دهۆك/ ئەندام.
د. ناصر عەبدولرزاق عەبدولرەحمان، زانكۆیا مویسل/ ئەندام.
د. شەوكەت عارف محەمەد، زانكۆیا زاخۆ/ ئەندام.
د. حەكیم عبدولرەحمان زوبێر، زانكۆیا دهۆك/ ئەندام.
د. كەڕەڤان محەمەد ئەحمەد، زانكۆیا دهۆك/ ئەندام و سەرپەرشت.