رۆژا سێشەمبی رێکەڤتی ١٦ی تەباخا ٢٠٢٢ـێ و ب سەرپەرشتیا د. ئارام محەمەد قادر، وەزیرێ خواندنا بلند و ڤەکۆلینێن زانستی، و ب ئامادەبوونا برێکارێ وەزارەتێ و سەرۆک و نوینەرێن زانکۆیێن هەرێما کوردستانێ، وەزارەتا خواندنا بلند کۆمبوونا ژمارە پێنجی یا ئەنجومەنێ وەزارەتێ بۆ گۆتوبێژکرنا رێنمایێن خواندنا بلند و هەوەسا پەسەندکرنا ڤەکرنا دوو زانکۆیێن نوی و هندەک پرسێن دی یێن گرنگ ئەنجامدا.
ل دەستپێکا کۆمبوونێ، وەزیرێ خواندنا بلند، ئاماژە ب ئامادەکاریێن وەزارەتا خواندنا بلند دا ب مەبەستا پێشوازیکرنێ ل سالا نوی یا خواندنێ، سوپاسیا سەرۆکاتیا ئەنجومەنێ وەزیران و وەزارەتێن پەیوەندیدار و سەڕۆک و نوینەرێن زانکۆیا کر بۆ پالپشتی و پشتەڤانیا وان بۆ وەزارەتا خواندنا بلند و ڤەکۆلینێن زانستی.
د پشکەکا دی یا گۆتارا خۆ دا، وەزیرێ خواندنا بلند ئاماژە دا ئامادەکاریێن رەشنڤیسێ رێنماییێن خواندنا بلند، ماستەر و دکتۆرایێ و دوپاتی ل وێ چەندێ کر کو رێنمایی ب شێوەکی بهێنە دارشتن کو زۆرترین شیانێن زانکۆیان بۆ بهێنە دابینکرن کو تێدا پیڤەر و ستاندارتێن زانستی لبەرچاڤ وەربگرن.
هەروەسا وەزیرێ خواندنا بلند دوپاتی ل وێ چەندێ کر کو پێدڤیە رێنمایی ب شێوەکی بهێنە دارشتن کو زۆرترین دەرفەتێن درێژەپێدانێ خواندنا بلند بۆ گەنجێن هەرێما کوردستانێ پەیداببن و شیانێن خۆ یێن زانستی زێدەتر بکەن. هەروەسا راگەهاند "پێدڤیە رێگر بین ژ چوونا دەرڤە یا سەرمایێ ماددی و مرۆڤی یێ هەرێما کوردستانێ، پێدڤیە دەرفەتان د ناڤ زانکۆیێن هەرێما کوردستانێ دا پەیدابکەین"، بۆ ڤێ چەندێ ژی ئەنجومەنێ وەزارەتا خواندنا بلند، پشتێ گۆتوبێژێن زانستی، ب سەرجەمێ دەنگان رێنمایێن خواندنا بلند (دبلوما بلند، ماستەر و دکتۆرا) پەسەندکرن، کو د دەمەکێ نێزیک دا رێکارێن دەرێخستن و بەلاڤکرنا رێنمایان دێ ب دویماهی هێن.
ژ لایەکێ دی ڤە، ئەنجومەنێ وەزارەتا خواندنا بلند و ڤەکۆلینێن زانستی، پرۆپۆزەلێ (زانکۆیا پۆلیتەکنیکی گەرمیان و زانکۆیا ئاکرێ بۆ زانستێن کرداری) ل هەرێما کوردستانێ پەسەندکر. ڤەرکرنا ڤان هەردوو زانکۆیێن حکومی د چارچووڤێ ستراتیجیا وەزارەتاخواندنا بلند و ڤەکۆلینێن زانستی دایە، ب مەرەما زێدەکرنا دەرفەتێن خواندنا تەکنیکی و بوارێ زانستێن کرداری ل هەرێما کوردستانێ. پشتی پەسەندکرنا هەردوو زانکۆیان ژ لایێ ئەنجومەنێ وەزارەتێ ڤە، پێشنیارا ڤەکرنا هەردوو زانکۆیان دێ هێتە ئاراستەکرن بۆ سەرۆکاتیا ئەنجومەنێ وەزیران بۆ بریاردانا دویماهیێ ل سەر ڤەکرنا وان.
هەروەسا پلانا وەرگرتنا خواندنا دەستپێکی (دبلۆم و بەکالۆیوس) ل زانکۆیێن حکومیێن هەرێما کوردستانێ دیارکر، پلان ژ لایێ زانکۆیان ڤە هاتە ئاراستەکرن بۆ وەزارەتی ب شێوازەکی کو (زانکۆلاین، پارالێل،ئێڤاران)لدویڤ پێداویستی و پلانێن زانکۆیانە. دەربارەی ڤێ چەندێ وەزیرێ خواندنا بلند هەمی زانکۆ راسپاردن کو پێدڤیە هویری کاربکەن کو زۆرترین رێژا قوتابیان ل زانکۆیێن حکومی بهێنە وەرگرتن.
ل دویماهیا کۆمبوونا ئەنجومەنێ وەزارەتا خواندنا بلند، گۆتوبێژ دەربارەی رێنمایێن یەکسانیکرنا بڕوانامان هاتەکرن، لژنەکا تابیەت یا وەزارەتێ هاتە راسپاردن بۆ ئامادەکاریێن رەشنڤیسێ دویماهیێ یێ رێنمایان.