ل رۆژا 6/11/2022 گەنگەشا ناما ماستەرێ یا قوتابیێ خواندنا بلند ل پشكا مێژوویێ (صالح زاهیر محمد ابراهیم) ل ژێر ناڤونیشانێ (پەرتۆكا مێژوویا ئبن خەلدۆن: ژێدەرەك بۆ مێژوویا كوردان یا سیاسی و شارستانی) ل كۆلیژا پەروەردە- ئاكرێ ب سەركەڤتیانە هاتە ئەنجامدان.
د ڤێ ڤەكۆلینێ دا، ڤەكۆلەری كار ل سەر پەرتۆكا مێژوویا ئبن خەلدۆنی كریە وەكو ئێك ژ پەرتۆكێن مێژوویی یێن ناڤدار ل سەر مێژوویا ئیسلامی ب گشتی و مێژوویا كوردان ب تایبەتی، ڤەكۆلەری ژ دەستپێكا ڤەكرنا دەڤەرێن كوردی بەحس كریە ب زنجیرەیی و پێگیربوون ب وان پێزانینێن مێژووی كو د پەرتۆكێ دا هاتی ب بەراورد ل گەل ژێدەرێن دیتر یێن رەسەن و نێزیکی ڕویدانان. هەروەسا ئەڤ پەرتۆكە تاكە ژێدەرێ سەرەكیە كو بەحسێ سێ دەولەتێن كوردی دكەت ل چەرخێن ناڤین ب ناڤێ دەولەتێن (حەسنەوی و دۆستەكی و ئەیۆبی). پەرتۆكا مێژوویا ئیبن خەلدۆنی ژێدەرێ سەرەكی یە بو وان كوردێن ئاوارەی رۆژئاڤا ئیسلامی بووین (لاوینی و بابیری) وەكو دوو هوزێن ناڤدارێن كوردان.
دەرئەنجامێن سەرەكی یێن ڤەكۆلەر گەهشتیێ ئەو بووینە كو د ڤێ پەرتۆكێ دا گەلەك ئاماژە ب مێژوویا كوردان هاتیەكرن لێ شاشیێن زۆر هەنە و پێدڤی ب دووبارە پێداچوونێ یە، سەرەرای وێ چەندێ دڤێ پەرتۆكێ دا مێژوویا كوردان ب پشتبەستن ب ژێدەرێن بەری خۆ ڤەگێرایە و وێنەیەكێ گشتی ل سەر مێژوویا كوردان ددەت هەتا سەدێ هەشتێ كۆچی/ چواردێ زاینی.
پشتی گەنگەشەكا زانستی ل سەر ڤێ ڤەكۆلینێ هاتیە كرن، بریار ب بەخشینا باوەرناما ماستەرێ ب ڤەكۆلەرێ هاتە دان، كو ب سەرپەرشتیا د. خەتاب ئیسماعیل احمد بوو ژ زانكۆیا زاخۆ، و لژنا گەنگەشێ ب سەرۆكاتیا د. حكیم احمد مام بكر بوو ژ زانكۆیا صلاح الدین و ئەندامەتیا هەر ئێك ژ د. عوسمان عبدالكریم عمر ژ زانكۆیا زاخۆ و د. حكیم عبدالرحمن زبیر ژ زانكۆیا دهۆك.