ئەڤرۆ رێکەڤتی ١٨/٥/٢٠٢٢ زانكۆیا دهۆك رێورەسمەكێ رێزگرتنێ بۆ پرۆفیسۆر دكتۆر مصلح دهۆكی سەرۆكێ بەرێ یێ زانكۆیا دهۆك ل هۆلا كۆنفرانسان ب بەرهەڤبوونا راگر و سەرۆک پشک و مامۆستایێن زانکۆیێ و نوینەرێن سازی و لایەنێن جودا رێكخست.
ل دەستپێكا رێورەسمان سەرۆكێ زانكۆیا دهۆك د. داود سلێمان ئەتروشی د پەیڤەكی دا ئاماژە دا وێ چەندێ كو كولتۆرێ رێزگرتنێ یێ گرنگە، مە پێخۆشە ڤی كولتۆری بكاربێخین و دەستخۆشیێ ل هەر كەسەكی بكەین ئەوێن رۆژەكی خزمەتا ڤێ زانكۆیێ كری، داكو دیاربكەین كا چەوا رۆژێن كاری هەنە هەروەسا رۆژێن رێزگرتنێ ژی دێ هەبن.
سەرۆكێ زانكۆیا دهۆك هەروەسا گۆت "د وی ماوێ دكتۆر مصلح دهۆكی سەرۆكاتیا زانكۆیا دهۆك وەرگرتی، كوردستان د كاودانەكێ نەخۆش دا دەربازدبوو، هەر ژ قەیرانێن دارایی و هێرشێن تیرۆرستێن داعش و هاتنا ئاواران و پەیدابوونا ڤایرۆسێ كۆرۆنایێ، بەلێ زانكۆیا دهۆك شیا هەر لسەر پێت خۆ رابوەستیت، ئەڤەژی ڤەدگەریت بۆ ئیدارا حەكیمانەیا پرۆفیسۆر دكتۆر مصلح دهۆكی".
هەر د رێورەسمان دا پرۆفیسۆر دكتۆر مصلح دهۆكی پەیڤەك پێشكێشكر و گۆت "ئەڤرۆ ڤان رێورەسمان بۆ من جوداهی و رامانەكا تایبەت هەیە، د ڤان رێورەسمان دا دیاردبیت چ كار بەرزە نابیت، هەر پێنگاڤەك ئێكا دی تمام دكەت بەرەڤ سەركەڤتنێ، هەر گوپیتكەكێ بناغەكێ بەرفرەهـ بۆ دڤێت"، هەروەسا د پەیڤا خۆ دا سوپاسیا وان كەسا كر ئەوێن د وی ماوەی دا دگەل كاركری هەر ژ هاریكارێن سەرۆكێ زانكۆیێ و راگرێن كولیژان و هەمی مامۆستا و فەرمانبەرێن زانكۆیا دهۆك، گۆت ژی "رێزگرتن ل كارێ مە، رێزگرتنە ل وان كەسێن زانكۆیا دهۆك ب مالا خۆ دزانن و خەما وان پێشخستن و وەرارا زانكۆیێ" و سوپاسیا سەرۆكێ زانكۆیا دهۆك د. داود ئەتروشی ژی كر، كو ل پێنگاڤێن وان یێن پێشیێ دگەل دابوو.
پرۆفیسۆر دكتۆر مصلح دهۆكی ئەوژی گۆت "سەرەرایی هەمی كاودان و قەیرانان، هەر ژ هاتنا تیرورستێن داعش بۆ دەڤەرێن سنووری یێن هەرێما كوردستانێ، و پەیدابوونا قەیرانا دارایی و برینا بودجە و مۆچێن خەلكێ كوردستانێ ژ لایێ حكوومەتا عیراقێ ڤە و بەلاڤبوونا پەتایا كۆرۆنایێ، بەلێ بۆ ئێك رۆژ ژی دەوام ل زانكۆیا دهۆك نەهاتە راگرتن، بەلكو لدویڤ هەمی وان رێزبەندیێن ناڤخۆیی و نێڤدەولەتی یێن دهاتنە كرن، زانكۆیا دهۆك هەردەم یا پێشەنگ بوو و هەردەم ل رێزێن پێشیێ بوو"، ل دویماهیێ ژی سوپاسیا هەمی لایەكی كر ب تایبەت سەرۆكێ زانكۆیێ بۆ ڤێ رێزگرتنا لێ گرتی، گۆت ژی "ب ئانەهیا خودێ ئەم هەر پشتەڤان و رێنیشادەرین بۆ زانكۆیا دهۆك، و زانكۆیێ ب مالا خۆ دزانین".
د رێورەسمێن رێزلێنانێ ل سەرۆکێ بەرێ یێ زانکۆیا دهۆک دا، پارچەکا ڤیدیۆیی لدۆر کار و رۆلێ پ.د. مصلح دهۆکی د پێشڤەبرن و سەرئێخستنا زانکۆیا دهۆک دا و د کاودانێن جودا دا هاتە نمایشکرن، ئەڤ پارچە ڤیدیۆیە ژ لایێ رێڤەبەریا راگەهاندنا زانکۆیا دهۆک ڤە هاتبوو ئامادەکرن.
هەر د ڤان رێورەسمان دا و ب ناڤێ نوینەرێن مامۆستایێن زانکۆیا دهۆک، د. نیبار بەدیع دیاریەک پێشکیشی پ.د. مصلح دهۆکی، سەرۆکێ بەرێ یێ زانکۆیا دهۆک کر و سوپاسی و رێزلێنانا مامۆستایێن زانکۆیا دهۆک بۆ دەربڕین.
د. داود سلێمان ئەتروشی ئەو چەند ژی دیار كر كو مە ئەڤ رێورەسمە ب دەلیڤە دیت كو هندەك كەسێن دیتر ژی رێز لێ بهیتە گرتن ئەوێن د ماوێ بۆری دا خزمەتا ڤێ زانكۆیێ كری و ئەرکێ خۆ یێ راگریێ ب سەرکەڤتیانە ب دویماهی ئینای، و سوپاسی و رێزگرتن پێشكێشی هەر ئێك ژ (د. ئەحمەد محەمەد سالح، هاریكارێ سەرۆكێ زانكۆیێ و راگرێ كولیژا پزیشكی ب وەكالەت، د. لقمان هادی حەسەن، هاریكارێ سەرۆكێ زانكۆیێ و راگرێ كولیژا پەرستاری ب وەكالەت، د. محەمەد سالح بەرواری، راگرێ كولیژا زمانان، د. عزەت رەئۆف، راگرێ كولیژا زانست، د. ئیسماعیل بریفكانی، راگرێ كولیژا زانستێن تەندروستی، د. بەهزاد محەمەد، هاریكارێ راگرێ كولیژا چاندنێ) كرن.
هەژی ئاماژێ یە سێ بڕگێن مۆزیکی د ڤان رێورەسمان دا ژ لایێ تیپا مۆزیکی یا زانکۆیا دهۆک ڤە هاتنە پێشکێشکرن، کو ل دەمێ پێشوازیێ پیانۆ ژەن و سەرپەرشتێ تیپا مۆزیکی یا زانکۆیێ خەتاب ئەرتووشی چەندین پارچێن مۆزیکی بۆ ئامادەبوویان ژەنین و د ناڤ رێورەسمان دا کەمان ژەن رێکار وەسفی پارچە مۆزیکەک ژەنی و ل دویماهیا رێورەسمان تیپا مۆزیکی یا زانکۆیا دهۆک دوو پارچێن مۆزیکی پێشکێشکرن و ئامادەبووی ب ئاستێ وان یێ بلند و مۆزیکا وان یا جوان دلخۆش بوون.