راگەهاندنا زانکۆیا دهۆک؛ ٢٤ـی کانوونا ئێکێ ٢٠٢٢
د رێورەسمەکی دا و ب هەلکەڤتا ٣٠ سالیا دامەزراندنا زانکۆیا دهۆک، زانکۆیا دهۆک ئێکەم باوەرناما دکتۆرایا فەخری ب جڤاکناس و کوردناسێ تورک، دۆست و پارێزەرێ گەلێ کورد د. ئیسماعیل بەشکچی بەخشی.
د ڤی رێورەسمی دا سەرۆکێ زانکۆیا دهۆک د. داود سلێمان ئەتروشی و د. عەلی تەتەر ب هەلکەڤتا ٣٠ سالیا دامەزراندنا زانکۆیا دهۆک دوو پەیڤ پێشکێشکرن، پاشی ڤیدیۆیەکا ئینفۆگرافیکی ل دۆر زانکۆیا دهۆک هاتە نمایشکرن کو ژ لایێ راگەهاندنا زانکۆیا دهۆک ڤە هاتبە ئامادەکرن. ژ لایەکێ دی ڤە، ئەو مامۆستایێن ئەڤ سالە پلا پرۆفیسۆریێ بدەستڤەئینای و هەروەسا ئەوێن شیاین ب رێکا پرۆژێن خۆ فەندێن جودا بۆ زانکۆیا دهۆک بدەستڤەبینین، ژ لایێ سەرۆکاتیا زانکۆیا دهۆک ڤە هاتنە رێزلێنان.
زانكۆیا دهۆك ئێكەم سازیا ئەكادیمیا فراوانە ل دەڤەرا بادینان، کو سالا ١٩٩٢ـێ ب هەردوو كۆلیژێن پزیشكی و چاندنێ هاتە دامەزراندن و نوکە ژی ژ ١٩ كۆلیژان و پەیمانگەهەكی پێكدهێت، كو ٦٩ پشكێن زانستی لێ هەنە. هەتا نوكە ٢٧ گەرێن قوتابیان ژ زانكۆیا دهۆك دەرچووینە، كو دبنە ٤٩٩٣٨ قوتابی، باوەرناما بەكالۆریۆسێ ژ زانكۆیا دهۆك ب بسپۆریێن جودا وەرگرتینە.
نوکە ٢٣٢١٠ قوتابی ل زانکۆیا دهۆک هەنە، زێدەباری ستافێ ئەکادیمی یێ خودان باوەرنامێن بلند، كو هژمارا وان ١٩٥٤ مامۆستانە و ٧٦٤ ژ وان هەلگرێن باوەرناما دکتۆرایێنە و ١١٩٠ ژی هەلگرێن باوەرناما ماستەرێنە، ژ وان ژی ١١٨ پرۆفیسۆرن و ٣٩٩ پرۆفیسۆرێن هاریکارن. زێدەباری هەلگرێن باوەرنامێن دیتر وەكو دبلوما بلند و سالانە هژمارا مامۆستایان د زێدەبوونێ دایە، چونكو هەر كۆلیژەك ل دویڤ پێدڤیاتیێ كورسیێن خواندنا بلند ڤەدكەت.
زانكۆیا دهۆك باشترین پەیوەندی ل گەل زانكۆ و ناڤەندێن هەرەباش و ناڤدارێن جیهانی هەنە و هەر ژ دەستپێكێ بزاڤ هاتینە كرن ئەڤ پەیوەندیە بهێنە گرێدان و بهێز كرن، و ئێكەم رێككەڤتن ژی زانكۆیا دهۆك دگەل زانكۆیا بەیلەر یا ئەمریكی ل شواتا سالا ١٩٩٦ـێ ئیمزا كریە. د نوکە دا زانکۆیا دهۆک پرۆژە و بەرنامە و رێککەڤتن دگەل 33 سازیێن نیڤدەولەتی و عیراقی و کوردستانی هەنە و بەردەوام هەولددەت ڤان پەوەندیان فراوانتر لێ بکەت.
لەورا زانکۆیا دهۆك ئێك ژ باشترین زانكۆیانە ل هەرێما كوردستانێ ژ لایێ پەیوەندیان ڤە، كو ب رێكا ڤان پەیوەندیان چەندین پرۆژە و كارێن هەڤپشك ئەنجامداینە، ژ وان ژی پەیمانگەها چارەسەریا دەروونی و چارەسەریا تراومایێ ل ئادارا سالا ٢٠١٧ـێ ب هەڤكاری ل گەل زانكۆیا (تـوبینگـن) یا ئەلمانی، زێدەباری ڤەكرنا چەندین پشكێن زانستیێن هەڤپشك ل گەل زانكۆیێن ناڤدارێن جیهانی، بۆ نموونە کولیژا پلاندانانا جهەكی ب هەڤکاری دگەل زانکۆیا تەکنیکی یا دۆرتموند، و پشكا ئەندازیاریا بایۆمێدیکال ل كۆلیژا ئەندازیاری كو ئەڤ پشكە ب هاریكاریا زانكۆیا (THM) یا ئەلمانی و ب پشتەڤانیا رێكخراوا DAAD هاتیە ڤەكرن.
هەژی ئاماژێ یە ل رۆژا پێنجشەمبی رێکەڤتی ٢٢ـی کانوونا ئێکێ ٢٠٢٢ و ل سەنتەرێ کۆنفرانسان، د رێورەسمەکی دا و ب ئامادەبوونا پتر ژ هزار مامۆستا و قوتابی و فەرمانبەرێن زانکۆیا دهۆک و کاربدەست و نوینەێن سازیێن جودا، یادا ٣٠ سالیا دامەزراندنا زانکۆیا دهۆک هاتە گێڕان.