ل هۆلا کونفرانسان ل زانکۆیا دهۆک و ب ئامادەبوونا د. داوود سلێمان ئەترووشی، سەرۆکێ زانکۆیێ و د. لوقمان هادی حەسەن، هاریکارێ سەرۆکێ زانکۆیێ بۆ کاروبارێن زانستی و د. ئیسماعیل عەلی، بەرپرسێ تیما بۆلۆنیا پرۆسێس و سەرۆک پشک و بەرپرسێن پەرەپێدانا پرۆگرامێن خواندنێ و نوینەرێن مامۆستایان، روینشتنەکا ڤەکری لدۆر پرسگرێکێن خواندنێ و قۆناغێن بجهئنانا بۆلۆنیا پرۆسێس و کرنگیا وێ هاتە ئەنجامدان.
سەرۆکێ زانکۆیا دهۆک د. داوود ئەترووشی دا زانین "بۆلۆنیا پرۆسێس ئێکە ژ گرنگترین پێنگاڤێن چاکسازیێ د خواندنا بلند دا و پێدڤیە ئەم ل زانکۆیا دهۆک ب باشترین شێوە پەیرەوبکەین". دیسان سەرۆکێ زانکۆیا دهۆک رەخنە لدۆر ئاوایێ برێڤەچوونا بۆلۆنیا پرۆسێس ل هندەک پشکان هەبوون و گۆت: "سالا بهێت هەر ٦۷ پشکێن زانستی دێ ل زانکۆیا دهۆک ڤێ پرۆسێسێ بجهئینن. پێدڤیە مامۆستا هەمی بەرهەڤییان بۆ بجهئینانا ڤێ پرۆسێسێ بکەن".
د. داوود ئەترووشی تیشک ئێخستە سەر ڤێ پرۆسێسێ و گۆت: چونکو پێزانینێن مە لدۆر ڤێ پرۆسێسێ نە ل ئاستێ پێدڤینە، جاران ئەم دژایەتیا وێ دکەین، لێ ئەگەر مە بڤێت قوتابیەکێ زانا و خودان شیان بۆ جڤاکەکێ ساخلەم بەرهەمبینین، پێدڤیە بۆلۆنیا پرۆسێس بجهبینین. هەروەسا سەرۆکێ زانکۆیا دهۆک دیارکر کو پێدڤیە قوتابیەکی بەرهەمبینین، باوەری ب خۆ هەبیت و گەلەک ئارمانجا بۆ دروستبکەین و بشێت بۆ خۆ پاشەرۆژا هەلبژێریت و ببیتە کەسانەکێ خودان شیان و زانین و کارامەیی".
هەروەسا سەرۆکێ زانکۆیا دهۆک راگەهاند، هەر پشکەکا زانستیا باشتر ڤێ پرۆسێسێ بجهبینیت، دێ هێتە خەلاتکرن.
بابەتەکێ دیێ گرنگێ د ڤێ روینشتنێ دا هاتیە گەنگەشەکرن، دەستپاکیا ئەکادیمی بوو، کو دانوستاندنێن رژد لدۆر هاتنەکرن. لدۆر پێشێلکرنا دەستپاکی و رەوشتێن ئەکادیمی، سەرۆکێ زانکۆیا دهۆک خویاکر "پێشێلکرنا دەستپاکیا ئەکادیمی بومبەکا مەترسیدارە لسەر پرۆسێسا ئەکادیمی و ناڤێ زانکۆیێ، هەر پێشێلکرنەکا دەستپاکی و رەوشتان بهێتە پشتراستکرن، لێبوورین نابیت".
د تەوەرەکێ دی دا، د. داوود ئەترووشی باس ل نەرماتی و دلفرەهیێ دگەل ئاریشە و رفتارێن قوتابیا کر، دیارکر ژی کو پێدڤیە قوتابی سەنتەرێ پرۆسێسا خواندنێ بیت و پێدڤیە مامۆستا و سەرۆک پشک هەڤسەنگییەکێ دروستبکەن د ناڤبەرا کەتوارێ قوتابی و چەوانیا بلندکرنا ئاستێ وی دا.
سەرۆکێ زانکۆیا دهۆک خواندنا ئێڤاران ب ئەگەرەکێ کێمکرنا بوهایێ زانکۆ و مامۆستای هژمارت و دیسان کێمکرنا دەستپاکیێ د کارێ ئەکادیمی دا، نەمانا وێ ناڤ و بوهای ددەتە مامۆستای و زانکۆیێ و رێبازا ئاکادیمی.
د ڤێ دیدارێ دا هژمارەک ژ سەرۆک پشکان پشکداری گەنگەشێ بوون و بۆچوونێن خۆ لدۆر بۆلۆنیا پرۆسێس پێشکێشکرن و دیارکرن کو پێدڤیە ئەڤ پرۆسێسە ب شێوەیەکێ ئێکگرتی ل هەمی پشکێن زانستی بهێتە بجهئینان.
ل دویماهیێ سەرۆکێ زانکۆیێ گرنگیدا بابەتێ بکارئینانا مەلزەما و دیارکر کو ل سالا بهێت، نابیت ب هیچ شێوەیەکی مەلزەمە بهێنە بکارئینان و پێدڤیە ئەم هەمی کاربکەین بۆ هندێ زانکۆیا دهۆک بەر ب ئاستێن بلندتر ببەین.