ب درویشمێ (بەرەڤ پراکتیزکرنا پزیشکی یا پاراستی و پرۆفێشنال)، سەندیکا نۆژدارێن کوردستانێ- لقا دهۆکێ ب هەماهەنگی دگەل زانکۆیا دهۆک، کۆلیژا پزیشکی و هەروەسا زانکۆیا زاخۆ، کۆلیژا پزیشکی، دگەل رێڤەبەریا گشتی یا ساخلەمیێ ل پارێزگەها دهۆکێ، دێ ئێکەم کۆنفرانسێ زانستی و پیشەیی ل سەنتەرێ کۆنفرانسان ل زانکۆیا دهۆک، ل رێکەڤتی ١١-١٢ـی گولانێ ئەنجامدەت.
ئەڤ کۆنفراسە ژ دوو پشکان پێکدهێت، پشکا زانستی و پشکا پیشەیی، کو دوو پانێل د پشکا پیشەیی دا دێ هێنە ئەنجامدان، کو تێدا هژمارەکا دکتۆرێن بسپۆر و شارەزا ژ کوردستانێ و دەرڤەی کوردستانێ دێ پشکدار بن و ل دۆر بابەتێن پزیشکی یێن جودا دانوستاندنێ کەن. پانێلێ ئێکێ دێ ل دۆر کەرتێ ساخلەمیێ و چەوانیا پێشئێخستنا ڤی کەرتێ بیت، هەروەسا د پانێلێ دووێ دا بابەتێ گرێدایی فێرکرنا پزیشکی ل هەرێما کوردستانێ دێ هێتە گۆتۆبێژ کرن. د هەمان دەم دا، پشکا زانستی ژی یا پێکهاتیە ژ ١٨ ڤەکۆلینان، کو دێ ژ لایێ دکتۆرێن کۆلیژا پزیشکی ل زانکۆیا دهۆک و هژمارەکا نۆژدارێن دهۆکێ هێنە پێشکێشکرن، کو بۆ جارا ئێکێ یە ئەڤ جۆرە ڤەکۆلینە دهێنە ئەنجامدان.
هەر د ڤی کۆنفرانسی دا، دوو روینشتنێن تایبەت دێ هێتە برێڤەبرن، روینشتنا ئێکێ دێ ل دۆر نشتەرگەری و نەخۆشێێن گرێدایی گولچیسکا و جوبارێن میزێ بیت، تێدا هژمارەکا نۆژدارێن کوردستانێ و هەروەسا ئیراقێ دێ پشکداری دانوستاندنا بن. ژ لایەکێ دی ڤە، روینشتنا دووێ دێ یا گرێدای نەخۆشیێن شەکرێ و قەلەوییێ و نەخۆشیێن رژێنا بیت، ئەڤ بابەتە دێ ژ لایێ دوو دکتۆرێن زانکۆیا رۆیال یا پزیشکی ل وەلاتێ بریتانیا ڤە هێنە پێشکێشکرن.
راگەهاندنا زانکۆیا دهۆک؛ ٧ـی گولان ٢٠٢٣
فرمێسک حەسۆ