ل ڕێکەڤتی ٢١-٢٢ـی شواتا ٢٠٢٤ـێ، ب ئامادەبوونا زێدەتر ژ ٢٥٠ نۆژداران ژ چەندین وەلاتان، کۆنگرەیێ شەشێ یێ سالانه یێ باسکێ دەریا ناڤین تایبەت ب نۆژداریا زارۆکان ل باژێرێ جدە، وەلاتێ سعودیێ هاتە ئەنجامدان و سێ مامۆستایێن زانکۆیا دهۆك ژی سەرپەرشتیا کۆنگرەیی دکر.
کۆنگرە ب سەرۆکاتیا د. خەلەف حسێن گەرگەری مامۆستایێ زانکۆیا دهۆك بوو، کو ڕۆلەکێ سەرەکی و بلند هەبوو د کۆنگرەیی دا، هەروەسا د.نزار بەکر هاریکارێ سەرۆکێ کۆنگرەیی بوو، د.ئازاد عەبدولجەبار سكرتيرێ گشتییێ کۆنگرەیی بوو. د کۆنگرەیدا، ٤٦ وانە ل دۆر بابەتێن نوی ب نۆژداریا زارۆکان ڤە هاتنە گۆتن و ژ وان ژی ١٨ ڤەکۆلین هاتنە کرن. د هەمان دەمدا، ٢٥٠ نۆژدار ژ وەلاتێن ( عیراق، سعودی، مسر، ئۆردن، فەلەستین، لبنان، سوريا، کوێت، بەحرین، ئیمارات، عومان، ئەمريكا و بریتانیا ) پشکداری کۆنگرەیی بوون.
هەروەسا ژبەر ڕۆلێ سەرەکی یێ زانکۆیا دهۆك د ئەڤی کۆنگرەیدا، ب ڕێیا د. دلدار حاجی موسا ڕاگرێ کۆلیژا پزیشکی یا زانکۆیا دهۆك سوپاسیەك پێشکێشێ سەرۆکێ زانکۆیا دهۆك کر.
دهێتەزانین، سالانە ئەڤ کۆنگرەیە دهێتە ئەنجامدان، ل سالا ئێکێ باژێرێ سەلالە، سالا دووێ ل دووبەی، سالا سێیێ ب ڕێکا ونلاین، سالا چارێ ل ئیستەنبۆلێ و سالا پێنجێ ل ئەنتالیا هاتە ئەنجامدان.
ڕاگەهاندنا زانکۆیا دهۆك؛