ل ژێر ناڤۆنیشانێ (سرۆشت و قەیرانێن ژینگەھێ د رۆمانا كوردی دا)، مامۆستایێ زانكۆیا دھۆك، د. ئەمین عەبدولقادر عومەر، پشكداری د كۆنفرانسێ ناڤدەولەتی یێ سالانە یێ كۆمەلا بریسمێس یا بەریتانی یا ڤەكۆلینێن رۆژھەلاتا ناڤین كر، كو ل رۆژێن ٣ تا ٥ـی گولانێ ٢٠٢٣ ل زانكۆیا ئێكستەرا یا بەریتانی ب ئامادەبوونا نێزیكی ٥٠٠ ڤەكۆلەر و ئەكادیمیا ل سەرانسەری جیھانێ ھاتیە ئەنجامدان.

د. ئەمین عەبدولقادر دەربارەی ئارمانجا كۆنفرانسی دیاركر، كو گوھۆرینا سەقای و مەترسیا وێ ل سەر ژیان و ساخلەمیا مرۆڤا بوویە جھێ گرنگی پێدانەكا زۆر، ژبەركو ڤەرێژا گوھۆرینێن سەقای كاریگەریەكا زۆر ل ژلایێ ساخلەمی و ئابووری ڤە ل سەر جیھانێ ھەمیێ ھەیە و كاریگەریەكا زۆرتر ل سەر وەلاتێن ھەژار و پاشكەڤتی دكەت، لەورا ئەڤ بابەتێ مەترسیدار زێدەباری گرنگیپێدانا زانا و بسپورێن تایبەتمەند، بوویە جھێ سەرنجا رێكخراوێن نێڤدەولەتی و حكومەت و نڤێسەر و رەوشەنبیرا، نڤێسەرێن كورد ژی د بەرھەمێن خۆدا ئەڤ مژارە بەرچاڤكریە.

دەربارەی ڤەكۆلینا خۆ د. ئەمین عەبدولقادری گۆت "ڤەكۆلینا مە بزاڤەکە بۆ دویڤچوونا پرسگرێکا ژینگەھ و سرۆشتی د خەیالا رۆماننڤیسێن کورد دا، كا ب چ ئاوا ڤێ مەترسیا ل سەر ژینگەهێ دشۆپینن. ئەڤ بابەتە ب گورەی دیتنا زانستێن مرۆڤایەتی و د خەیالا نڤیسەر و هونەرمەنداندا ببوو تەوەرەکێ کۆنفرانسێ ناڤبری.

ناڤبری د ڤەكۆلینا خۆدا باس ل ئازراندنا ئاریشا ژینگەھێ د رۆمانێن كوردی یێن دەڤەرا بەھدینان دا كریە، كو ھەردوو رۆمانێن (ئاترا: دوماهی ئادەمێ ل سەر ئەردی) یا دیار ئەرەدنی، و (کویسەلە: ئەو مرۆڤێ ژ مرنێ رەڤی) یا حەسەن ئیبراھیمی وەرگرتینە، و ب پەیرەوكرنا میتۆدا رەخنەیا ژینگەھێ، شیایە دیارترین پرسگرێكێن ژینگەھێ د خەلایا نڤێسەرێن كورد دا ئاشكرا بكەت.

دیسان ژ دیارترین ئەنجامێن ڤەكۆلینا ناڤبری گەھشتیێ، ئەوە كو نڤێسەرێن كورد ب رێكا ڤەگێرانا خەیالی، ھوشیاریا ل سەر پاراستنا ژینگەھ و سروشتی بەلاڤ دكەن و مەترسیێن تێكچوونا ژینگەھ و سروشتی بۆ تاكێ كورد ئاشكرا دكەن.

‎هەژی گۆتنێیە ئەڤ کۆنفرانسە سالانە دهێتە گێران، كو گەنگەشا ئاریشێن گرێدای رۆژهەلاتا ناڤین دكەت و ھەر سالەكێ ل دۆر مژار و ئاریشەكا تایبەت دھێتە ئەنجامدان، كۆنفرانسێ ئەڤ سالە ل دۆر ئاریشا ژینگەھێ و گوھۆرینا سەقای بوو ل سەر ئاستێ جیھانێ ب گشتی و رۆژھەلاتا ناڤین ب تایبەتی، كو پتری ١٥٠ ڤەكۆلین تێدا ھاتنە پێشكێشكرن. زانكۆیا دھۆك ب رێكا مامۆستا و ڤەكۆلەرێن خۆ ھەولا ڤەدیتنا چارەسەریا بۆ كێشەیێن جیھانی ددەت، ب رێكا پشكداربوون د كۆنفرانسێن نێڤدەولەتی ب تایبەتی ئاریشا گوھۆرینا سەقای ل سەر ئاستێ جیھانێ.

راگەھاندنا زانكۆیا دھۆك؛ ٧ـی تەباخێ ٢٠٢٣

راپۆرت: ماھر كێستەیی