ل رۆژا 6/10/2021 ل هۆلا كۆنفرانسان ل زانكۆیا دهۆك كۆنفرانسێ زانستی یێ نێڤدەولەتی یێ چارێ یێ ئەندازیاری و زانستێن كەرەستان هاتە گێران كو ئەڤ كۆنفرانسە یێ هەڤپشك بوو د ناڤبەرا زانكۆیێن (دهۆك، نهرین یا عیراقی، برلیس و زانست یێن مالیزی و برمینگهام یا بریتانی) و ئەڤ كۆنفرانسە دێ بۆ دوو رۆژان یێ بەردەوام بیت.
ل رێورەسمێن دەستپێكرنا كۆنفرانسی، سەرۆكێ زانكۆیا دهۆك، د. داود سلیمان ئەتروشی، د پەیڤەكی دا گۆت "گێرانا ڤی كۆنفرانسی بۆ خرڤەكرنا زانا و شارەزایێن ئەكادیمی و ڤەكۆلەرانە، بۆ لێكگوهارتنا شارەزایێ و ئەنجامێن ڤەكۆلینان ل دۆر لایەنێن جودا یێن ئەندازیاری" ئاماژە دا وێ چەندێ ژی كو "ئاڤاكرنا ئابوورێن ركابەر ئاماژەكن كو زانست و ئەندازیاری و داهێنان سەركێشیا وەرار و گەشەپێدانێ و خۆشگوزەرانیا ژیانێ دكەن، بەلێ ئەڤ داهێنانە ژ نیشكێ ڤە پەیدا نابن بەلكو ئەڤ جۆرە كۆنفرانسە دەلیڤێن ببهانە بۆ ڤەكۆلەر و تایبەتمەندان ل چێكرن و چێكەرێن بریاران بۆ لێكگوهورینا شارەزایان".
ل دویف دا سەرۆكێ كۆنفرانسی، د. عمر دهام، ژ زانكۆیا نەهرین بەحسێ گرنگیا گێرانا ڤی كۆنفرانسی كر، كو یێ تایبەتە د بیاڤێ زانستێن ئەندازیاری دا، هەروەسا بەحسێ شێوازێ كۆنفرانسی ژی كر كو 150 ڤەكۆلەر ژ هەشت وەلاتان پشكدارن تێدا، و هندەك ژ ڤان ڤەكۆلینان بشێوێ ئونلاین دێ هێنە گەنگەشە كرن.