مامۆستایێ پشكا پەروەردا تایبەت ل كۆلیژا پەروەردا بنیات یا زانكۆیا دھۆك، د. چاچان جومعە محەمەد ب ڤەكۆلینەكێ ب پشكداری د كۆنفرانسێ ناڤدەولەتی یێ شەشێ یێ ژنان دا كر.

ھژمارەكا زۆر یا ڤەكۆلەرا ل سەرانسەری جیھانێ پشكداری كۆنفرانسێ ناڤبری ببوون، ڤەكۆلینا د. چاچان جومعە محەمەد ب ناڤێ "نیگەرانیا بێكاریێ ل دەف قوتابیێن كچ و پەیوەندیا وێ ب رێزگرتنا خودی ڤە" بوو، ئارمانج ژ ڤەكۆلینێ پیڤانا ئاستێ نیگەرانیا بێكاریێ بوو ل دەف قوتابیێن كچ یێن زانكۆیا دھۆك، ھەروەسا پیڤانا ئاستێ رێزگرتنا خودی ل دەف وان" بوو. ئەنجامێن ڤەكۆلینێ دیاركر نیگەرانیا بێكاریێ ل دەف قوتابیێن قۆناغا چارێ ل كۆلیژێن زانكۆیا دھۆك د ئاستەكێ بلنددایە، بەلێ ئاستێ رێزگرتنا خودی ل دەف وان یا د ئاستەكێ ناڤنجی دا. ھەروەسا جوداھیا ئاستێ نیگەرانیا بێكاریێ بۆ بسپۆری ڤەدگەریت، ژبەركو ئاستێ نیگەرانیا بێكاریێ ل دەف قوتابیێن بسپۆرێن مرۆڤایەتی بلندترە ژ یێن زانستی، ھەروەسا پەیوەندیەكا نەرێنی دناڤبەرا ھەردوو گۆراوێن نیگەرانیا بێكاریێ و رێزگرتنا خودی دا ھەیە.

ڤەكۆلەری ھندەك راسپاردە پێشكێشكرینە ژ وان "بەرھەڤكرنا بەرنامێن راوێژكرنێ ژلایێ بسپۆرێن دەرونناسیێ بۆ كێمكرنا ئاستێ نیگەرانیا بێكاریێ ل دەف قوتابیێن زانكۆیێ، دیسان پالپشتیكرنا دەرچوویێن زانكۆیان ژ رەگەزێ مێ ژلایێ رێكخراوێن جڤاكێ سڤیل بۆ دروستكرنا پرۆژێن بچویك، ھەروەسا جەختكرن ل سەر پەرەپێدانا رەھوانیێن كەسایەتی ل دەف قوتابیا ل شوینا رەھوانیێن زانینێ داكو دەرچوویێن زانكۆیێ ب تایبەتی رەگەزێ مێ پتر پشتبەستنێ ل سەر خۆ بكەن بۆ كاركرن د كەرتێ تایبەت دا.

ھەژی ئاماژەدانێ یە، كۆنفرانسێ ناڤدەولەتی یێ شەشیێ یێ ژنان WCWS 2023 ب ھەڤكاری ل گەل شارەوانیا ئەنقەرە و و زانكۆیا باكو یا ژنان BWU و كۆلیژا ماتا سوندری یا كچان یا زانكۆیا دەلھی و پەیمانگەھا IKSAD یا ڤەكۆلینا، ل باژێرێ ئەنقەرە ل وەلاتێ توركیا ل رۆژێن ١٧ – ١٩ـی ئەیلولێ ٢٠٢٣ ھاتیە ئەنجامدان. ئارمانجا كۆنفرانسی كۆمكرنا ڤەكۆلەر و ھۆنەرمەند و ئەكادیمی و سیاسەتمەدارا یە بۆ لێكگوھۆرینا ھزرا ل دۆر ئاریشێن ژنان، ھەروەسا كۆنفرانسێ ناڤدەولەتی یێ ژنان ل سەرانسەری جیھانێ پالپشتیا ژنان دكەت و ھاندانا ڤەكۆلەر و چالاكڤانێن بوارێ ژنێ ددەت بۆ ئەنجامدانا ڤەكۆلینا ل دۆر نەھێلانا ئاستەنگا بەرامبەر ژنێ و شیاندانا ژنێ.

راگەھاندنا زانكۆیا دھۆك؛ ١٩ـی ئیلۆن ٢٠٢٣

راپۆرت: ماھر كێستەیی