پشتی مامۆستایێ نابینا (ئازاد عەبدولرەحمان) شیای ب هەمی هەول و تێکۆشان و ماندیبوون، باوەرناما ماستەرێ ل کولیژا یاسا ل زانکۆیا دهۆک بدەستڤەبینیت، ئەڤرۆ رێکەڤتی ١ـی تەباخێ ٢٠٢٣، د. داود سلێمان ئەتروشی، سەرۆکێ زانکۆیا دهۆک و ب ئامادەبوونا د. ئەڤین خالد، راگرا کولیژا یاسا، پێشوازی ل مامۆستا ئازادی کر و ژبەر کارێ نایابێ ژ لایێ وی ڤە هاتیە ئەنجامدان، هاتە رێزلێنان و لۆگۆیێ زانکۆیا دهۆک ب شانازی ڤە پێشکێشی مامۆستای کر..
ل دەستپێکێ سەرۆکێ زانکۆیا دهۆک دەستخۆشی و پیرۆزباهیێن زانکۆیێ ئاراستەی مامۆستا ئازادی کرن، کو سەرەرای کاودانان ئەو تێدا، شیای ب کار و ماندینەناسیا خۆ باوەرناما ماستەرێ بدەستڤەبینیت، بەرهەڤیا زانکۆیا دهۆک ژی بۆ هەر پشتەڤانیەکێ دیارکر. د. داود ئەتروشی هەروەسا باس ل گرنگیا پتر خزمەتکرن و کارئاسانیا کر بۆ خودان پێدڤیێن تایبەت ل زانکۆیا دهۆک، ب مەرەما دروستکرنا سەقایەکێ گونجای بۆ باشتر پێگەهاندنێ و مفاوەرگرتنێ ژ ڤێ تەخا بلیمەتا جڤاکی.
ژ لایێ خۆ ڤە مامۆستا ئازاد عەبدولرەحمان گەلەک کەیفخۆش و دلشاد بۆ ب پێشوازیا گەرما سەرۆکێ زانکۆیا دهۆک و هەروەسا وێ پشتەڤانیا رژدا ژ لایێ راگریا کولیژا یاسا ڤە لێ هاتیە کرن. دیسان سوپاسیا سەرۆکێ زانکۆیا دهۆک کر بۆ پشتەڤانیێ و گرنگیدانا وی ب تەخێن جودا د ناڤ زانکۆیا دهۆک دا. پاشی ناڤبری باس ل کاودانێ نڤێسینا ماستەرناما خۆ کرن و رێگرێن کەڤتینە پێشیا وی و چەوانیا بەزاندنا وان رێگرا و سوپاسیا هەڤال و مامۆستا و هەمی کەس و لایەنێن هاریکار و پشتەڤان کر.
مامۆستا ئازاد عەبدولرەحمان، ل سالا ١٩٦١ـێ ل باژێرێ دهۆکێ ژدایکبوویە، هەر ژ زارۆکینیا خۆ کەسەکێ بلیمەت بوویە، لێ د قۆناغا زارۆکینێ دا و ژ ئەگەرێ نەخۆشیا خوینبەربوونا بۆماوەیی (هیمۆفیلیا) بیناهیا خۆ ژدەستدایە. سەرەرای ڤێ یەکێ، کەسەکێ کۆلنەدەر بوویە و بەردەوام خۆ پێگەهاندیە و ل قۆناغا ئامادەیی یەکەم بوویە و پاشی کولیژا یاسا ل زانکۆیا دهۆک وەکو ئێک ژ یەکەما دەرباسکریە. پاشی، هەر ل زانکۆیا دهۆک، ب سەرکەڤتیانە باوەرناما ماستەرێ بدەستڤەئینایە.
ب ناڤێ سەرۆکاتیا زانکۆیا دهۆک پیرۆزباهیێن گەرم ئاراستەی مامۆستا ئازادی دکەین، کەسانێن وەکو مامۆستای چیرۆکێن پڕی وانەیێن خۆراگریێنە و ئەم ل زانکۆیا دهۆک وەکو ستێرەکا بەردەوام گەش تەماشا دکەین.
راگەهاندنا زانکۆیا دهۆک؛ ١ـی تەباخ ٢٠٢٣