رێکخراوا ناڤدەولەتی یا کۆچبەریێ IOM ب هەڤکاری دگەل زانکۆیا دهۆک، کۆرسەکێ هاڤینی ل دۆر "ساخلەمیا دەروونی و پشتەڤانیا دەروونی و جڤاکی" بۆ هژمارەکا قوتابیێن پزیشکی و دەروونناسی یێن زانکۆیا دهۆک ڤەکر. ئەڤرۆ د رێورەسمەکی دا و ب ئامادەبوونا د. داود سلێمان ئەتروشی، سەرۆکێ زانکۆیا دهۆک، ئیڤانز بینان، رێکخەرێ پرۆگرامێ ساخلەمیا دەروونی و پشتەڤانیا دەروونی و جڤاکی ل عیراقێ یێ رێکخراوا ناڤدەولەتی یا کۆچبەریێ و نوینەرێن رێکخراوا ناڤبری، د. رەمەزان عابد محەمەد، راگرێ کولیژا بەروەردا بنیات ل زانکۆیا دهۆک، د. محەمەد سەعید محەمەد ، بسپۆرێ دەروونی ل زانکۆیا دهۆک و هژمارەکا قوتابیێن زانکۆیا دهۆک، کۆرسەکێ هاڤینی ل دۆر بابەتێ ناڤبری هاتە ڤەکرن و بۆ ماوێ شەش رۆژان ئەڤ کۆرسە دێ یێ بەردەوام بیت.

ل دەستپێکا ڤان رێورەسمان، سەرۆکێ زانکۆیا دهۆک سوپاسیا ستافێ رێکخراوا ناڤدەولەتی یا کۆچبەریێ کر بۆ کار و ماندیبوونا وان د دیزایکرن و دەستپێکرنا ڤی کۆرسێ گرنگ دا و دلخۆشیا خۆ ب پشکداریا قوتابیێن زانکۆیا دهۆک د ڤی کۆرسی دا دەربڕی و باس ل گرنگیا ڤی بواری کر ب تایبەتی بۆ زانکۆیا دهۆک، کو ل سەر ڤی بنەمای پشکێن زانستی و پەیمانگەهەکا تایبەت ب ڤی بواری ڤە دامەزراندنیە و خزمەتێن جودا پێشکێشی جڤاکی دکەت، ب تایبەتی بۆ پەنابەر و ئاوارەیان، ل دویماهیێ ژی داخوازا سەرکەڤتنێ بۆ پشکدارا کر.

دهێتە زانین ئەڤ کۆرسە دێ ل پەرتۆکخانا ناڤەندیا زانکۆیا دهۆک تا ٢٥ـی ڤێ مەهێ بەردەوام بیت و بابەتێن جودایێن گرێدای ساخلەمیا دەروونی هێنە گەنگەشەکرن. زۆربەیا قوتابیێن پشکدار ژی ژ کولیژا پزیشکی یا زانکۆیا دهۆکن و هەروەسا پشکا دەروونناسی ل کولیژا پەروەردا بنیات یا زانکۆیا دهۆک.

راگەهاندنا زانکۆیا دهۆک

فۆتو: حسێن تتمى