Internship Programme of UoD Student

ل رۆژا 31/1/2018 سەنتەرێ‌ گەشەپێدانا كاری ل زانكۆیا دهۆك باوەرنامێن جڤاتا وەزیرێن هەرێما كوردستانێ‌ یێن خولەكا راهێنانێ‌ پێشكێشی 57 قوتابیێن زانكۆیا دهۆك كرن.
د رێورەسمێن دانا باوەرنامان دا رێڤەبەرێ‌ سەنتەرێ‌ گەشەپێدانا كاری ل زانكۆیا دهۆك شڤان خەلیل دیاركر كو سەنتەرێ‌ گەشەپێدانا كاری ل زانكۆیا دهۆك ل بێنڤەدانا هاڤینێ‌ ئاگەهداریەك بەلاڤكربوو كو ئەو قوتابیێن دچنە مەشقا هاڤینێ‌ (كو پتریا قوتابیان دچنە رێڤەبەریێن میری) ئەو دشێن ب رێكا سەنتەرێ‌ گەشەپێدانا كاری بچن كو وان بەرنامەك یێ‌ ل گەل جڤاتا وەزیران هەی بۆ راهێنانا هاڤینێ‌ یا قوتابیان.
گۆت ژی ل دویف ڤێ‌ ئاگەهداریێ‌ ل هاڤینا بۆری 57 قوتابیێن قووناغا سیێ‌ ناڤێ‌ خۆ بۆ ڤێ‌ خولێ‌ ل سەنتەری توماركربوو و توماركرن یا ئازد بوو هەر قوتابیەكێ‌ ڤیابا دا شێت ناڤێ‌ خۆ توماركەت، ئەڤ قوتابیە ئەڤ سالە ل قووناغا چارێ‌ نە ل زانكۆیا دهۆك، دیار ژی كر كو پشتی ڤان قوتابیان خولا خۆ یا هاڤینێ‌ ب رێكا جڤاتا وەزیران ب دووماهی ئیناین باوەرنامێن وان گەهشتینە كو ژلایێ‌ وەزیرێ‌ خواندنا بلند و هەروەسا جێگرێ‌ سەرۆكێ‌ حكومەتا هەرێما كوردستانێ‌ ڤە هاتینە ئیمزا كرن و دێ‌ پێشكێشی دەرچوویێن خولێ‌ كەن.

سەرۆكێ‌ زانكۆیا دهۆك پرۆفیسۆر د. مسلح دهۆكی د پەیڤەكی دا گۆت زانكۆیا دهۆك هەردەم گرنگی دایە شیانێن قوتابیان كو ژ بلی وەرگرتنا باوەرنامێ‌ هەروەسا زانست و زانین و رەوشەنبیریا گشتی ل نك پەیدا ببیت و دهەمان دەم دا ببنە كەسێن ب باوەرنامە و خودان شیان و كەسێن ئاڤاكەر بن ل ناڤ جڤاكی و بشێن پشتبەستنێ‌ ل سەر شیانێن خۆ بكەن، ئەو چەند ژی دیاركر كو ڤەكرنا سەنتەرێ‌ گەشەپێدانا كاری ژی ل زانكۆیا دهۆك مەرەم ژێ‌ پەیداكرنا دەلیڤێن كاری یە بۆ دەرچوویێن زانكۆیێ‌ و راهێنانا قوتابی و دەرچوویێن زانكۆیێ‌ بۆ چێكرنا (CV) و پێشكێش كرنا كاری بۆ كۆمپانی و رێڤەبەریێن میری، د ڤی بیاڤی دا چەند پێشانگەهێن كاری بۆ دەرچوویێن زانكۆیا دهۆك ڤەكرینە و بەردەوام د خزمەتا قوتابی و دەرچوویێن زانكۆیێ‌ دایە.
پرۆفیسۆر د. مسلح دهۆكی هەروەسا گۆت یا فەرە ژی دەمێ‌ قوتابی ژ زانكۆیێ‌ دەردچیت هەر گرێدانەك ب زانكۆیێ‌ ڤە هەبیت و ئەڤ سەنتەرە ئەو پرا گەهاندنێ‌ یە كو دەرچوویێن زانكۆیێ‌ هەر ب زانكۆیێ‌ ڤە د پەیوەندیێ‌ دا بن، زانكۆ چەند پتر دەلیڤێن كاری بۆ دەرچوویێن خۆ ببینیت ئەو هند زانكۆ هەست ب پشتراستی و شانازیێ‌ دكەت هەمبەر دەرچوویێن خۆ.
ل دووماهیا رێورەسمان ژی باوەرنامێن دەرچوویان ژ لایێ‌ سەرۆكێ‌ زانكۆیێ‌ ڤە هاتنە پێشكێش كرن و سەرۆكێ‌ زانكۆیێ‌ پیرۆزباهی ل وان قوتابیان كر ئەوێن باوەرنامێن خۆ وەرگرتین و داخازا سەركەفتنێ‌ بۆ خاست.