شاندەكێ زانكۆیا دهۆك ل 21- 24/3/2022 ل باژێرێ برایتون ل بریتانیا پشكداری د وۆركشۆپەكێ دا كر، کو ب هەلكەڤتا ب دویماهی هاتنا پرۆژێ كۆمكرنا كەلتۆرێ پێكهاتەیێن جودا ل هەرێما كوردستانێ ژ لایێ پەیمانگەها ڤەكۆلینێن گەشەپێدانێ IDS یا سەر ب زانكۆیا Sussex یا بەرێتانی ڤەیە هاتبوو رێكخستن.
پرۆژێ كۆمكرنا كەلتۆرێ پێكهاتەیێن جودا ل هەرێما كوردستانێ، جەختێ لسەر كۆمكرنا كەلتۆرێ ئاشووری، ئێزدی، ئەرمەن، شەبەك، بەهائی و زەرەدەشتیان ل هەرێما كوردستانێ دكەت، و هەر مامۆستایەكێ شاندێ زانكۆیا دهۆك سەرپەرشتیا ٢٠ گەنجان ژ هەردوو رەگەزان بۆ ماوێ ١٦ هەیڤان دكر بۆ ئەنجامدانا ڤی كاری.
د رۆژا ئێكێ دا ژ ڤی وۆركشۆپی، هەردوو بەرێزان بەرێز د. لقمان هادی حەسەن، هاریكارێ سەرۆكێ زانكۆیێ بۆ كاروبارێن زانستی، و د. رەند حەمۆدی، بەرپرسا پەیوەندییێن نێڤدەولەتی ل زانكۆیا دهۆك، پەیڤێن خۆ پێشكێشكرن، تێدا باس ل پێشبینیێن ڤێ سەرەدانێ هاتەكرن دگەل رۆلێ زانكۆیا دهۆك د پاراستنا كەلتۆرێ پێكهاتەیێن جیاوازێن جڤاكێ هەرێما كوردستانێ دا، لدویڤدا باس ل ئارمانجێن وۆركشۆپی هاتە كرن، د. رەند حەمۆدی ژ لایێ خۆ ڤە پێشەكیەكا گشتی لدۆر وان گەنجێن زانكۆیێ دگەل كاركری پێشكێشكر، و ئەنجام و دەستكەڤتێن پرۆژەی دیاركرن.
ژ لایێ خۆ ڤە د. سۆفیا ژ پەیمانگەها IDS كو رێڤەبەرا پرۆژەی بوو، ئاماژەدا ئەنجامێن كۆمكرنا كەلتۆری ژ لایێ گەنجان ڤە. پاشی هەلسەنگاندنا پرۆژەی هاتەکرن و ئەنجام هاتنە شرۆڤەكرن ژلایێ د. ئەندریا، بەرپرسێ هەلسەنگاندنێ ل پەیمانگەها IDS و رۆژا ئێكێ ب مێزگەردەكێ دگەل زانكۆیا دهۆك كو ژلایێ د. لوقمان ڤە هاتە برێڤەبرن ب دویماهی هات، کو باس لسەر پەیوەندیێن پێكهاتەیان و بەردەوامبوونا پرۆژەی هاتەكرن.
د رۆژا دووێ دا ژ وۆركشۆپی، هەر ئێك ژ مامۆستایێن پشكدار ژ زانكۆیا دهۆك سمینارەک لدۆر كار و ئەنجام و ئاستەنگێن هاتینە پێش دماوێ كاركرنێ دگەل گەنجان د ڤی پرۆژەی دا پێشكێشكر، و د رۆژا سێیێ دا، هەر مامۆستایەك ژ مامۆستایێن پشكدار د ڤی وۆركشۆپێ دا ڤەكۆلینا خۆ یا ئەكادیمی پێشكێشكر كو لدۆر بابەتەكێ كەلتۆری هاتیە نڤیسین ب پەیوەندی دگەل تایبەتمەندیا خۆ، د رۆژا چوارێ دا، شاندێ زانكۆیا دهۆك سەرەدانا زانكۆیا Sussex كر بۆ پشكداریكرنێ د رێورەسمێن دەرچوونێ و بەلاڤكرنا باوەرنامان لسەر مامۆستایێن پشكدار د ڤی وۆركشۆپێ دا.