سەنتەرێ بێشکچی و سەنتەرێ ڤەکۆلینێن جینۆسایدێ ل زانکۆیا دهۆک، وۆرکشۆپەکا هەشت دەمژمێری ل پەرلەمانێ کوردستانێ لدۆر جینۆسایدێ ئەنجامدا و تێدا ب تێروتەسەلی دانوستاندن لدۆر بابەتێن جودایێن گرێدای جینۆسایدا گەلێ کوردستانێ هاتنە ئەنجامدان و سەنتەرێ ڤەکۆلینێن جینۆسایدێ ل زانکۆیا جەرمۆ پشکداربوو.
د ڤێ وۆرکشۆپێ دا، و ب ئامادەبوونا جێگرێ سەرۆکێ پەرلەمانێ کوردستانێ و وەزیرێ پەروەردێ نوینەرێن وەزارەتا شەهید و ئەنفالکریان، وەزارەتا خواندنا بلند و ڤەکۆلینێن زانستی، وەزارەتا ئەوقاف و کاروبارێن ئایینی و لیژنە و راوێژکارێن جودایێن پەرلەمانێ کوردستانێ، هەشت ڤەکۆلین د سێ پەنەلان دا هاتنە پێشکێشکرن لدۆر ڤان بابەتێن گرێدای جینۆسایدێ:
• رێکێن دانەنیاسینا جینۆساید و ئەنفالێن دژی گەلێ کورد بۆ جڤاکا نیڤدەولەتی.
• چەوانیا سازیکرنا جینۆساید و ئەنفالان لسەر ئاستێ پەروەردێ و خواندنا بلند.
• رێکێن یاسایی بۆ قەرەبۆکرنا کەس و کارێن شەهید و ئەنفالکرییان ژ لایێ حکوومەتا ناڤەندی ڤە.
• رێکێن بهێزکرنا لۆبیێ سیاسیێ کوردی لسەر ئاستێ نیڤدەولەتی.
• چەوانیا مفاوەرگرتنێ ژ سەربۆرێن وان مللەتان یێن تۆشی جینۆسایدێ و هەوێن قڕکرنێ بووین.
• بهێزکرنا هشیاریا نەتەوەیی و نیشتیمانی یا تاکێ کورد و کوردستانی.
د وۆرکشۆپێ دا، ڤەکۆلەر و کەسایەتیێن پشکدار، دانوستاندنێن هوین و رژد و زانستی لدۆر بابەتێن باسکری کرن و لسەر وێ یەکێ رێککەڤتن کو پتر هەماهەنگی و هەڤکاری دناڤبەرا سازیێن جودایێن هەرێمێ دا بهێتەکرن داکو ئەڤ هەولە بگەهنە ئارمانجان.
ل دویماهیێ، نوینەرێن سەنتەرێ بێشکچی و سەنتەرێ ڤەکۆلینێن جینۆسایدێ ل زانکۆیا دهۆک، روینشتنەک دگەل هێمن هەورامی، جێگرێ سەرۆکێ پەرلەمانێ کوردستانێ ئەنجامدا و تێدا باس ل رێکێن بەردەوامیدانی ب دویڤچوونا بابەتێ جینۆسایدێ هاتەکرن. جێگرێ سەرۆکێ پەرلەمانی ژ لایێ خۆ ڤە بەرهەڤی بۆ هەر هاریکاریەکێ د ڤی بواری دا دیارکر بۆ سەرئێخستنا ئارمانجێن زانکۆیا دهۆک د بوارێ بابەتێ جینۆسایدێ دا.