ئەڤرۆ رێکەڤتی ٨/٢/٢٠٢٢ کولیژا پزیشکیا ددانان ل زانکۆیا دهۆک و ب هەڤکاری دگەل رێڤەبەریا گشتیا ساخلەمیێ ل پارێزگەها دهۆکێ، وۆرکشۆپەک لدۆر چەوانیا کونترۆلکرنا نەخۆشی و ڤایرۆسان و تافیلکرنا ئامیرێن نۆژدارێن ددانان بۆ نۆژدار و هاریکارێن نۆژدارا هاتە ئەنجامدان، بۆ پتر بەلاڤکرنا هشیاریا خۆپاراستنێ ژلایێ نۆژدار و هاریکارێن نۆژداران ڤە و هەروەسا پاراستنا ساخلەمیا خەلکێ سەرەدانا کلینیکێن وان دکەن.
لدۆر گرنگیا ڤێ وۆرکشۆپێ د. بوهار جەعفەر راگرا کولیژا پزیشکیا ددانان گۆت: "کونترۆلکرنا ڤایرۆس و نەخۆشیان و تافیلکرنا ئامیرێن نۆژداری و راگرتنا بلندترین ئاستێن پاقژیێ گرنگیەکا مەزن هەیە، لەورا ئەڤ وۆرکشۆپە پێدڤیە بەردەوام بهێنە ئەنجامدان و رێک و پێرابوونێن راگرتنا ئاستەکێ بلندێ پاقژیێ بهێنە نیشاندان، ب مەرەما پاراستنا ساخلەمیا نۆژدار و هاریکارێن وان و وی خەلکێ سەرەدانا کلینیکێن وان دکەت".
ژلایێ خۆ ڤە، د. زیاد عەبدلئەحەد ژ رێڤەبەریا گشتیا ساخلەمیێ لدۆر هەماهەنگیا رێڤەبەریا ساخلەمیێ دگەل زانکۆیا دهۆک گۆت: "گەلەک گرنگ دبینین کو مە ب بەردەوامی هەماهەنگی دگەل کولیژا پزیشکیا ددانان هەبیت، چونکو مە گەلەک ئارمانجێن هەڤپشک هەنە. چالاکیا ئەڤرۆ ژی دێ پتر خزمەتا کەرتێ ساخلەمیێ ل پارێزگەها دهۆکێ کەت".
هەژی گۆتنێ یە کو ٤٠ نۆژدار و هاریکارێن نۆژدارا د ڤێ وۆرکشۆپێ دا پشکدارن و دێ بۆ ماوێ ٢ رۆژان بەردەوامبیت.