ل ژێر درویشمێ (ب لێکگوهارتنا زانیاریان نەتەوە پێشدکەڤن) پشکا مێژووێ ل کولیژا زانستێن مرۆڤایەتی یا زانکۆیا دهۆک دگەل زانکۆیا واست و ب ئامادەبوونا هەردوو هاریکارێن سەرۆکێ زانکۆیا دهۆک د. ئەحمەد محەمەد سالح و د. لوقمان هادی حەسەن و هژمارەکا مامۆستا و ڤەکۆلەر و کەسانێن تایبەتمەند و پەیوەندیدارێن بوارێ میژووێ، کۆنفرانسێ خۆ یێ زانستیێ دووێ بۆ ماوێ دوو رۆژا ل هۆلا کونفراسان یا زانکۆیا دهۆک ل ١-٢/٦/٢٠٢٢ گێرا.
پشتی سروودێن نشتیمانی یا عیراقێ وهەرێمێ پەیڤێن بخێرهاتنێ و ڤەکرنا کونفراسی یێن هەردوو زانکۆیان هاتنە خواندن.
د. لوقمان هادی حەسەن هاریکارێ سەرۆکێ زانکۆیێ بۆ کاروبارێن زانستی پەیڤا سەرۆکاتیا زانکۆیا دهۆک پێشکێشکر و تیژک ئێخستە سەر گرنگیا سازکرنا ڤان جۆرە کونفراسان و راگەهاند "پێدڤیە دویر بین ژ دەمارگیرێ و حزبایەتی و نەتەوەپەرێسییا بەرتەنگ، چونکو خویایە ئەو شارستانیا هاتیە ئاڤاکرن، د ناڤبەرا گەلەک نەتەوا دا بوو و نە بتنێ ئێک نەتەوە شارستانیەت داناینە، لەورا ئاڤاکرنا گەنجەکێ پێگەهشتیێ هەست ب وەلاتیبوونێ بکەت ل عیراقێ گەلەک گرنگە، نەکو گەنجەکێ دەمارگیر و هزر داخستیێ بەرامبەر خۆ قەبوول نەکەت".
ژ لایێ خۆ ڤە د. ئەحمەد جەعفەر زوبەیدی د پەیڤا سەرۆکاتیا زانکۆیا واست دا باس ل چەوانیا ئامادەکاریا بۆ ڤی کۆنفرانسی کر و دیارکر "پێشوەخت ڤەکۆلینێن مامۆستایا هاتنە وەرگرتن و نێزیکی ۱٥ ڤەکۆلینا هاتنە رەتکرن، چونکو کێماسیێن ئەکادیمی تێدا هەبوون"، ناڤبری هەروەسا باس ل گرنگیا لێکگوهارتنا زانینێ کر ب تایبەت ب رێکا لێک نێزیکبوونا مامۆستا و ئەکادیمیێن هەردوو زانکۆیا.
د. نیبار بەدیع بەرپرسێ راگەهاندنا کۆنفرانسی دیارکر "ئەڤ کۆنفرانسە ژ هژمارەکا تەوەران پێکدهات، ئەوژی: مێژوویا جیهانی یا کەڤن و شینوارێن وێ، مێژوویا جیهانی یا ناڤەندی و شینوارێن وێ، کەلتۆر و مێژوویا جیهانی یا هەڤچەرخ، فەلسەفا مێژوویێ و رێکێن نڤێسینا وێ و چەوا ببیتە کەرەستێ وانەگۆتن و تەوەرێ دویماهیێ ژی لدۆر دیتنا هەڤچەرخ د مێژوویێ دا و پەیوەندییا وێ ب زانستێن دی ڤە بوو، بابەت ژی هەمەجۆر بوون".
ل دویماهیا کۆنفرانسی، نوینەرێ سەرۆکێ زانکۆیا واست د. ئەحمەد زوبەیدی داخباریا خۆ ن زانکۆیا دهۆک و پارێزگەها دهۆک دیارکر و گۆت "مە سەربۆرەکا گەلەک جوان ژ زانکۆیا دهۆک و باژێرێ دهۆکێ وەرگرت، شێواز پێشوازی و سەرەدەریا دگەل کاریگەری ل مە کر، وە ئەم مەزنکرین، دخوازم ئەم هەماهەنگیێ دگەل زانکۆیا دهۆک بەرفرەهبکەین، نە ب تنێ د بوارێ ڤەکۆلینێن مێژوویی دا، بەلکو د هەمی بواران دا". پاشی خالێن گەنگەشەکرن و لێکتێگەهشتنێ و پێشنیار و پێشبینی و ڤەکۆلین هاتنە خرڤەکرن ب مەرەما تۆمارکرنێ داکو ببنە بەرهەمێ ڤی کۆنفرانسی.